Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xx. Capittel.

1. Israel verbindt hem teghen BenIamin, 12. ende eyscht de schandelicke boeuen tot Gibea ter straffe, 13. BenIamin en gheeft gheen gehoor, maer stelt hem in teghenweer. 18. Israel wert eenmael, 22. ende andermael grouwelicken gheslagen, 26. ende so sy God ten derdenmael om raet vraghen, 28. hooren sy, hy wil de eere hebben, ende BenIamin in hare handen gheuen, 33. den strijdt gaet aen, 35. den stamme BenIamin wert schier gantsch wtgheroeyt.

A.1

DOe ^a toghen de kinderen Israels wt, ende vergaderden hen te hoope als een man, van Dan tot Berseba toe, ende vanden lande Gilead, tot den Heere te Mizpa.

a Hose. 10.a.9.

2

Ende ^b† traden te hoope, de Ouersten des gantschen volcx, aller stammen Israels, inder Ghemeynte Gods, vier hondert duysent mannen te voet, die het sweert wt trocken.

b† And. het traden te hoope van allen hoecken des volcx, ende van allen stammen, etc.

3

Nu de kinderen BenIamins hoorden, dat de kinderen Israels ^c† opwaert na Mizpa getogen waren: ende de kinderen Israels spraken: Segt, hoe is doch dat quaet toeghegaen?

c† And. waren ghetogen, ende hadden geseyt: Segt ghy kinderen Israels, hoe is, etc.

4

Doe antwoordde de Leuijt, der vrouwen man, die ^d verworcht was, ende sprack: Ick quam tot Gibea in BenIamin met mynen bywijue, om den nacht ouer daer te blijuen.

d Of, gedoot was

5

Doe maeckten hen teghen my op, de burgers te Gibea, ende omringden my in den huyse des nachts, ende dachten my te verworghen: ende hebben mijn bywijf geschendt, dat sy gestoruen is.

6

Doe nam ick mijn bywijf, ende hieuwse in stucken, ende sandtse in alle velden des erues Israels: want sy hebben eenen moetwille ende dwaesheyt ghedaen in Israel.

7

Siet, daer zijt ghy kinderen Israels alle, houdt raet, ende doet hier toe.

8

Doe maeckte hem alle dat volck op, als een man, ende sprack: Daer en sal niemant in zijn hutte gaen, noch in zijn huys wijcken:

9

Maer dat willen wy als nu doen tot Gibea, Laet ons het lot daerom worpen,

B.10

Ende nemen thien mannen van hondert, ende hondert van duysent, ende duysent van thien duysent wt allen stammen Israels, dat sy spijse nemen voor het volck, dat sy komen, ende doen met Gibea BenIamin, na alle hare dwaesheyt, die sy in Israel ghedaen hebben.

11

Also vergaderden hen tot der stadt alle mannen Israels, als een man, ende verbonden hen.

12

Ende de stammen Israels sonden mannen tot allen gheslachten BenIamin, ende lieten hen segghen: ^e Wat is dat voor een boosheyt die by v gheschiet is?

e Iosue. 22.b.16.

13

^f So gheeft nu wt die mannen, die boose boeuen tot Gibea, dat wyse dooden, ende het quaet van Israel wech doen: doch de kinderen BenIamin, en wouden niet hooren der stemme haerder broederen, der kinderen Israels:

f 2.Sam. 20.c.21.

14

Maer sy vergaderden hen wt den steden na Gibea, wt te trecken inden strijdt teghen de kinderen Israels.

15

Ende dies daechs worden de kinderen BenIamin wt den steden ghetelt, ses ende twintich duysent mannen die het sweert wttrocken, behaluen de burghers tot Gibea, dier werden seuen hondert ghetelt, wtghelesen mannen.

16

Ende onder alle desen volcke, waren seuen hondert mannen wtghelesen, ^g die slincx waren, ende konden met den slingheren een hayr treffen, dat het hen niet en miste.

g Iudic. 3.b.15.

17

Nu, der mannen van Israel (behaluen die van

[fol. 89r]

BenIamin) werden ghetelt, vierhondert duysent mannen, die het sweert voerden, ende alle strijdtbare mannen waren.

18

Ende de kinderen Israels maecten hen op, ende toghen opwaerts ten huyse Gods: ^h ende vraechden God, ende spraken : ⁱ Wie sal voor ons op trecken, den strijdt te beghinnen metten kinderen BenIamin? de Heere sprack: Iuda sal beghinnen.

h Iudicum. 1.a.1. ende 18.a.4.

i Sy en bidden niet om ouerwinninge, maer staen ende vertrouwen op hare kracht ende gherechticheyt, ende nemen eenen moet wt der kinderen BenIamins boosheyt.

19

Also maeckten hen de kinderen Israels des morghens vroech op, ende legherden hen voor Gibea.

C.20

Ende een yeghelick man van Israel ghinck wt te strijden met BenIamin, ende schicten hen ten strijde teghen Gibea.

21

Doe vielen de kinderen BenIamin daer wt, wt Gibea, ende sloeghen op dien dach van Israel, twee ende twintich duysent daerneder.

22

Doch het volck der mannen van Israel, vermandde hen, ende rusteden hen noch beter te strijden, aen de selue plaetse, daer sy hen des vorighen daechs gherustet hadden.

23

Ende de kinderen Israels togen op, ende weenden voor den Heere, tot aenden auont, ende vraechden den Heere, ende spraken: ^k Sullen wy ons noch meer ghenaken te strijden met den kinderen BenIamin onsen broederen? de Heere sprack: Treckt opwaerts tot hen.

k Noch en bidden sy niet, ende hen en wort derhaluen gheene ouerwinninghe toeseyt.

24

Ende doe hen de kinderen Israels maeckten aen den kinderen BenIamin, des anderen daechs,

25

Vielen de BenIamiters wt Gibea, hen teghen desseluen daechs, ende sloeghen vanden kinderen Israels, noch achthien duysent daer neder, die alle het sweert voerden.

26

Doe toghen alle de kinderen Israels op, ende alle het volck, ende quamen ten huyse Gods, ende weenden, ende bleuen aldaer voor den Heere, ende vasteden dien dach tot aenden auont, ende offerden brantoffer ende danckoffer voor den Heere.

27

Ende de kinderen Israels vraechden den Heere (de Arcke des verbondts Gods was te dier tijt aldaer,

28

Ende ^l Pinehas de sone Eleasar, Aarons sone stondt voor hem te dier seluer tijt) ende spraken: Sullen wy noch meer wttrecken, te strijden met den kinderen BenIamin onsen broederen, oft sullen wy af laten? de Heere sprack: Treckt op, morghen wil ^m Ickse in uwe handen gheuen.

l Pinehas was hooghe Priester te Silo, ende leefde so de Hebreen geuoelen 300. Iaer.

m Ick, spreeckt God, wilt doen: tot nu toe hebt ghijt willen doen, maer het heet Ic, niet ghy.

29

ⁿ Ende de kinderen Israels bestelden een achterwachte op Gibea rontom.

n Iosue 8.a.4.

D.30

Ende also toghen de kinderen Israels op des derden daechs, aen de kinderen BenIamin, ende rusteden hen aen Gibea, ghelijck als te voren tweemael.

31

Doe voeren de kinderen BenIamins wt, den volcke teghen, ende gauen hen van der stadt, ende begonden te slaen, ende verwondden sommighe vanden volcke, ghelijck als te voren tweemael, inden velde op twee straten, daer de eene na BethEl, de ander na Gibea gaet, by dertich mannen in Israel.

32

Doe dochten de kinderen BenIamins: Sy zijn gheslaghen voor ons, ghelijck als te voren: doch de kinderen Israels spraken: Laet ons vlieden, dat wyse vander stadt trecken, op de straten.

33

Doe maeckten hen op alle mannen van Israel van haerder stede, ende rusteden hen te BaalThamar: ende de achterwachte Israels brack voor van syner plaetse, vanden ^o hole Gaba,

o groeue

34

Ende quamen teghen Gibea thien duysent mannen, wtghelesen wt den gantschen Israel, dat den strijdt hardt wert: sy en wisten niet, dat hen het ongheluck treffen woude.

35

Also sloech de ^p Heere BenIamin voor den kinderen Israels: dat de kinderen Israels op dien dach verdoruen, vijf ende twintich duysent ende hondert mannen in BenIamin, die alle het sweert voerden.

p De Heere sloechse, niet Israel: want het heet Gloria in excelsis Deo.

36

Want doe de kinderen BenIamin saghen dat sy gheslaghen waren, gauen hen de mannen Israels ruymte: want sy verlieten hen op de achterwacht die sy by Gibea ghestelt hadden.

37

Ende de achterwacht haestede haer oock, ende brack voorwaerts na Gibea toe, ende tooch haer daer aen, ende sloech de gantsche stadt met de scherpte des sweerts.

38

Ende sy hadden een lose met malcanderen, de mannen van Israel, ende de achterwachte, met den sweerde hen te oueruallen, wanneer den roock vander stadt opginghe.

39

Doe hen nu de mannen van Israel keerden inden strijdt, ende BenIamin begonst te slaen, ende verwondden in Israel by dertich mannen: ende dachten: Sy zijn voor ons gheslagen, ghelijck als inden voorgaenden strijdt.

E.40

Doe begonst hem te verheffen vander stadt eenen roock, recht opwaerts gaende: ende BenIamin keerde hem te rugghe, ende siet, doe ghinck [het branden van] de gantsche stadt op in de locht.

41

Ende de mannen van Israel keerden hen oock om, ende verschricken de mannen BenIamins: want de mannen BenIamins sagen, dat hen het ongheluck treffen woude.

42

Ende keerden hen voor de mannen Israels op den wech na der woestijne: doch den strijdt volchde hen na: daer toe die vanden steden daer ghekomen waren, die verdoruense midden onder hen.

43

Ende sy omringden BenIamin, ende iaechden hem na tot Nenuah toe, ende vernederdense tot voor Gibea, teghen der Sonnen opganck.

44

Ende van BenIamin vielen achthien duysent mannen, die alle strijdtbare mannen waren.

45

Doe keerden sy hen, ende vloden na der woestijne, aenden rotzsteen Rimmon: ende op der seluer strate, sloeghen sy vijf duysent mannen, ende volchden hen achter na, tot Gideon toe, ende sloeghen haerder twee duysent.

46

Ende also vielen dies daechs van BenIamin, ⁺ vijf ende twintich duysent mannen, die het sweert voerden, ende alle strijdtbare mannen waren.

+ 25000. BenIamiters werden verslaghen.

47

Alleen ses hondert mannen keerden hen, ende vloden na de woestijne ten rotzsteen Rimmon, ende bleuen inden rotzsteen Rimmon vier maenden lanck.

48

Ende de mannen Israels quamen weder tot den kinderen BenIamins, ende sloegen met de scherpte des sweerts die in der stadt, beyde lieden ende vee, ende alles watmen vant, ende alle steden diemen vandt, verbranddemen met vyere.