Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xviij. Capittel.

1. Uijf verspieders van Dan wtgheschict, keeren by Micha in, 5. vraghen synen Priester na haren wech, 8. ende wederghekeert, raden hare broederen het verspiedde lant in te nemen, 13. Micha worden syne Afgoden ende Priester, 22. metten ghewade ontuoert, 27. Lais wort ghewonnen, ende Dan ghenoemt, 30. ende Michas beelt wort opghericht.

A.1

TE ^a dier tijt en was daer geen Koninck in Israel: ende den stam der Daniten socht haer een erfdeel daer sy woonen mochten: ^b want daer en was tot op dien dach, noch gheen erue voor hen gheuallen, onder den stammen Israels.

a Iudic. 17.a.6. ende 21.c.25.

b Iosue. 19.f.51.

2

Ende de kinderen Dan sonden wt haren gheslachten, ⁺ van haren eynden, vijf strijdtbare mannen, van Zarea ende Esthaol, het lant te verspieden, ende te ondersoecken, ende spraken tot hen: Treckt henen, ende verspiedt het lant: ende sy quamen op het geberchte Ephraim, aent huys Micha, ende bleuen aldaer den nacht ouer.

+ De Daniters schicken vijf mannen wt, het lant te verspieden.

3

Ende dewijle dat sy aldaer by den ghesinne Micha waren, kenden sy de stemme des Ionghelincx des Leuiten: ende sy weken daerhenen, ende spraken tot hem: Wie heeft dy hier ghebracht? wat doestu daer? ende wat hebstu hier?

4

Hy antwoordde hen: So ende so heeft Micha by my ghedaen, ende heeft my ghehuert, dat ick zijn Priester zy.

5

Sy spraken tot hem: Lieue, ^c vraecht God, dat wy bekennen, oft onsen wech dien wy wandelen, oock wel ghelucken sal.

c Iudic. 1.a.1. ende 20.b.18.

6

De Priester antwoordde hen: Treckt henen met vreden: uwen wech is recht voor den Heere, dien ghy treckt.

7

Doe ghinghen de vijf mannen henen, ende quamen tot Lais, ende saghen het volck dat daerin was, seker woonen, na de wijse, als de Zidoniters, stil ende seker, ende daer was niemant die hen ^d leedt dede inden lande, oft een heere ouer hen ware: ende waren verre van den Zidoniten, ende hadden met den lieden niet te doen.

d Dat is, Sy en hadden noch vyanden noch heeren.

8

Ende sy quamen tot haren broederen te Zarea ende Esthaol: ende hare broeders spraken tot hen: Hoe staet het met v toe?

9

Sy spraken: Op, ende laet ons tot hen op trecken, want wy hebben het lant besien, dat is gantsch goet: daerom haest v, ende en weest niet luy opwaerts te trecken, dat ghy henen koemt dat lant in te nemen.

B.10

Wanneer ghyer henen koemt, so sult ghy tot eenen sekeren volcke komen: ende dat lant is wijt ende breedt, want God heeft het in uwe handen ghegheuen: een sulcken plaetse daer niet en ontbreeckt, alles wat op Aerden is.

11

Doe toghen van daer, wt den gheslachte Dan, van Zarea ende Esthaol, ses hondert mannen gherustet met haren wapenen ten krijghe.

12

Ende toghen op, ⁺ ende legherden hen tot Kiriath Iearim in Iuda: daeruan noemden sy de plaetse, het legher Dan, tot op desen dach, dat achter Kiriath Iearim is.

+ Dans legher.

13

Ende van daer ginghen sy op het gheberchte Ephraim, ende quamen ten huyse Micha.

[fol. 88r]

14

Doe antwoordden die vijf mannen die wtghegaen waren het landt Lais te verspieden, ende spraken tot haren broederen: Weet ghy oock dat in desen huyse eenen Lijfrock, heylichdom, beelden, ende Afgoden zijn? nu moecht ghy ghedencken, wat v te doen is.

15

Sy weken daer henen, ende quamen aen het huys des Ionghelincx, des Leuiten, inden huyse Micha, ende groetteden hem vriendelick.

16

Nu de ses hondert gheruste met haren harnasche, die vanden kinderen Dan waren, stonden voor der poorte.

17

Ende de vijf mannen die wtghetoghen waren, het lant te verspieden, gingen op, ende quamen daerhenen, ende namen het beelt, den lijfrock, het heylichdom, ende Afgod: dewijle stont de Priester voor de poorte, by de ses hondert gheruste met haren harnasch.

18

Als nu ghene int huys Micha ghekomen waren, ⁺ ende namen het beelt, den lijfrock, het heylichdom, ende Afgod, sprack de Priester tot hen: Wat maeckt ghy?

+ De Daniters nemen Micha zijn Afgoden, ende den Priester.

19

Sy antwoordden hem: Swijcht, ende houdt den mont toe, ende trect met ons, dat du onse vader ende Priester zijst: ist dy beter dat du in des eenighen mans huys Priester zijst, oft onder eenen gantschen stamme ende gheslachte in Israel?

C.20

Dat beuiel den Priester wel, ende nam beyde den lijfrock, het heylichdom ende beelt, ende quam mede onder het volck.

21

Ende doe sy hen keerden, ende wech toghen, schickten sy de kinderkens ende het vee, ende wat sy ^e† kostelicx hadden, voor hen henen.

e† And. verhinderlicx, of, den krijchtrosse.

22

Doe sy nu verre van Michas huys quamen, schreydden de mannen die inden huyse waren, by Michas huys, ende volchden de kinderen Dan na,

23

Ende riepen den kinderen Dan: sy daerenteghen keerden haer aensicht om, ende spraken tot Micha: Wat is dy, dat du sulck een geschrey makest?

24

Hy antwoordde: Ghy hebt myne Goden ghenomen, die ick ghemaeckt hadde, ende den Priester, ende treckt wech, ende wat hebbe ick nu meer? ende ghy vraecht noch, wat my ghebreeckt?

25

Daerenteghen de kinderen Dan spraken tot hem: Laet dijn stemme niet hooren by ons, dat niet ouer dy en komen toornighe lieden, ende dyne ziele, ende dijns huys zielen niet wech gheruymt en worden.

26

Also gingen de kinderen Dan haers weechs: ende Micha, doe hy sach dat sy hem te sterck waren, keerde hy hem, ende quam weder in zijn huys.

27

Sy dan, ⁺ namen dat Micha ghemaect hadde, ende den Priester dien hy hadde, ende quamen aen Lais, aen een stil seker volck: ende sloeghense met de scherpte des sweerts, ende verbrandden de stadt met vyere.

+ Lais wort ghewonnen, ende Dan genoemt.

38[28]

Ende daer en was niemant diese verloste: want sy lach verre van Zidon, ende en hadden met den lieden niet te doen: ende sy lach in de leechte die aen BethRehob leyt: doe bouden sy de stadt, ende woonden daerin,

29

^f Ende noemdense Dan, na den name haers vaders Dan, die van Israel gheboren was: ende de stadt hiet in voortijden Lais.

f Iosue. 19.e.48.

D.30

^g Ende de kinderen Dan, richteden voor hen op dat beelt, ende Ionathan de sone Gerson, des soons ^h Manasse, ende syne sonen waren Priesters onder den stamme der Daniten, ⁱ tot aen den tijt, doe sy wt den lande gheuanghen wechgheuoert werden.

g 1.Reg. 12.c.28.

h Niet van gheboorte, na welcker Gersom Moses sone was, mer van ghelijckheyt in sonden, wegen, dewijle Manasse oock een Afgoden dienaer was.

i 1.Sam. 4.b.10.11.

31

^k Ende setteden also onder hen dat beelt Micha, dat hy ghemaeckt hadde, so langhe als het huys tot Silo was.

k 2.Reg. 17.c.27.