Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvij. Capittel.

1. Uan Micha, ende syner moeder Afgoderije, 7. Uan den ghehuerden Leuijt ten Priester in synen huyse

A.1

DAer was een man op het gheberchte Ephraïm, ⁺ met namen Micha,

+ De historie van Michas Afgoderije.

2

Die sprack tot syner moeder: De duysent ende hondert siluerlinghen, ^a† die du tot dy ghenomen hebst, ende ^b ghesworen, ende geseyt voor mynen ooren: siet, dat selue gelt is by my, ick hebbe het tot my ghenomen: doe sprack zijn moeder: Gheseghent zy mijn sone den Heere.

a† And. Dy ghenomen zijn worden, ende du hebst gheuloect, ende etc.

b Dese vrouwe sal beloeft hebben sulck gelt tot het beelt te geuen, ende dat en sal den sone int eerste niet beuallen hebben, ende heuet haer daerom ghestolen: daer na hem van haren klaghen bewegen latende, heeft het haer weder gegeuen, ende daermede doen laten, wat sy woude: maer dat het nu wel gelucte (ghelijck sulck dinck pleecht) so laet hijt hem oock wel gheuallen.

3

Also gaf hy syner moeder de duysent ende hondert siluerlinghen weder: ende zijn moeder sprack: Ick heb dat ghelt den Heere gheheylicht van myner hant voor mynen sone, datmen een ghegoten beelt ende Afgod daer wt maken sal: daerom gheue ick het dy nu weder.

4

Doch hy gaf syner moeder dat ghelt weder: doe nam zijn moeder twee hondert siluerlingen, ende brachtse tot den goutsmit, die maeckte een ghegoten beelt ende Afgod, ⁺ dat was daer na in den huyse Micha.

+ Een Afgod int huys Micha.

5

Ende de man Micha hadde also een Godshuys, ende maeckte eenen lijfrock, ende ^c† het heylighe, ^d ende vulde syner sonen een de hant, dat hy zijn Priester wert.

c† And. Theraphim, Dat verduytschen wy, het Heylige, oft Heylichdom: ghelijck te onsen tijden, de houten heyligen, dooden gebeente, dooden kleederen, ende derghelijcken, heyligen tant, gehouden is voor Godsdienst.

d Exod. 38.e.41. Nume. 3.a.3. ende 21.c.25.

6

^e Te dier tijt en was daer gheen Koninck in Israel, ende een yeghelick dede, wat hem recht dochte.

e Iudic. 18.a.1. 1.Sam. 8.a.5.

7

Daer was een Ionghelinck van Bethlehem Iuda, ⁺ onder den gheslachte Iuda, ende hy was een Leuijt, ende was aldaer vreemt.

+ Een Leuijt int huys Micha.

8

Ende hy tooch wt der stadt Bethlehem Iuda, te wandelen waer hy henen konde: ende doe hy op het gheberchte Ephraim quam, ten huyse Micha, dat hy synen wech ghinghe,

9

Vraechde hem Micha: Van waer koemstu? Hy antwoordde hem: Ick ben een Leuijt van BethLehem Iuda, ende wandele waer ick henen kan.

B.10

Micha sprack tot hem: Blijft by my, du salt mijn vader ende mijn Priester zijn: ick wil dy Iaerlicx thien siluerlinghen, ende ^f besproken kleederen ende dijn voedtsel gheuen: ende de Leuijt ginck met hem.

f Of, benoemde. and. tweerley, dat is, een wintersch, ende een somersche.

11

^g† De Leuijt begost te blijuen by den man, ende hy hielt den Ionghelinck ghelijck als eenen sone.

g† And. Also beliefdet den Leuijt te, etc.

12

Ende Micha vulde den Leuijt de hant, dat hy zijn Priester wert, ende was also inden huyse Micha.

13

Ende Micha sprack: Nu weet ick, dat my de Heere sal wel doen, dewijle dat ick een Leuijt tot eenen Priester hebbe.