Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiij. Capittel.

1. Israel koemt in de handen der Philisteen, 3. Simsons, 5. diese verlossen sal, onfanckenisse wort eerstlick der moeder, 8. ende daer na den vader, 12. met berichte wijse ende wercks des gheboren knechtkens, aengeseyt. 15. de Enghel des Heeren vaert in de vlamme des brantoffers (dat hy inde Rede syner spijse den Heere begheert) ten Hemel. 21. Manoah so hy hemseluen zijns lijfs ontseyt, wort van synen wijue ghesterckt, 24. des Heeren Gheest is in Simson.

A.1

ENde de kinderen Israels deden voortaen quaet voor den Heere, ^a ende de Heere gafse in de handen der Philisteen veertich Iaer.

a Iudic. 10.a.7.

2

Daer was een man te Sarga van eenen gheslachte der Daniten ⁺ ende zijn wijf was onuruchtbaer, ende en baerde niet.

+ Manoah Simsons vader.

3

Ende de Enghel des Heeren verscheen den wijue, ende sprack tot haer: Siet, du bist onuruchtbaer, ende baerst niet: doch du salt swanger worden, ende eenen sone baren.

4

^b So wacht dy nu, dat du gheenen wijn, noch stercken dranck drinckest, ende niet onreynes en etest.

b Nume. 6.a.3.

5

Want du salt swangher werden, ende eenen sone baren, ^c dien gheen scheermesse sal op het hooft komen: want dat knechtken sal een ^d Verloesder Gods zijn, van moeders lijue aen: ende hy sal beginnen Israel te verlossen wt der Philisteen hant.

c 1.Sam. 1.b.11.

d Een gheboren Nasir, oft Nasareus, niet na der Wet, van belofte weghen, maer van Gode sonderlick daer toe gemaect.

6

Doe quam dat wijf, ende seyde het haren man aen, ende sprack: Daer quam een man Gods tot my, ende zijn ghestalte was aen te sien, als een Enghel Gods, seer verschrickelick, dat ick hem niet en vraechde van waer, oft waer henen, ende hy en seyde my niet hoe hy hiet.

7

Hy sprac dannoch tot my: ^e Siet, du salt swangher worden, ende eenen sone baren: so drinckt nu gheenen wijn noch stercken dranck, ende eet niet onreyns: ^f want dat knechtken sal een Verloesder Gods zijn, van moeders lijue aen, tot in synen doot.

e Gene. 18.b.11. Luc. 10.d.31.

f Matth. 2.d.32.

8

Doe badt Manoah den Heere, ende sprack: Ach Heere, laet den man Gods weder tot ons komen, dien du ghesonden hebst: dat hy ons leere, wat wy met het knechtken doen sullen, dat gheboren worden sal.

9

Ende God verhoorde de stemme Manoah: ende de Enghel Gods quam weder totten wijue: Ende sy sat op den velde, ende haer man Manoah en was niet by haer.

B.10

So liep sy haestelick henen, ende seyde het haren man aen, ende sprack tot hem: Siet, die man is my verschenen, die heden tot my quam.

11

Manoah maeckte hem op, ende ginck synen wijue na, ende quam tot den man, ende sprack tot hem: Bistu de man die met den wijue ghesproken hebst? Hy sprack: Ia.

12

Ende Manoah sprac: Wanneer nu komen sal, dat du ghesproken hebst, wat sal des knechtkens wijse ende werck zijn?

13

De Enghel des Heeren sprack tot Manoah: ^g† Hy sal hem wachten voor alle dat ick den wijue gheseyt hebbe.

g† And. De vrouwe sal haer, etc. dat ick haer gheseyt heb. Sy en sal, etc. Nume. 6.a.3. Amos 2.b.12.

14

Hy en sal niet eten dat wt den wijnstock koemt, ende en sal gheenen wijn noch stercken dranck drincken, ende niet onreyns eten: alles wat ick haer gheboden hebbe, dat sal sy houden.

15

Manoah sprack totten Enghel des Heeren: Lieue, laet dy hier behouden, wy willen dy een bocxken bereyden.

16

Doch de Enghel des Heeren andtwoordde Manoah: Wanneer du my hier alreede behieldest, ^h so en ete ick doch dyner spijse niet: wiltu ^i† daerentegen den Heere een brantoffer doen, so machstu het offeren: want Manoah en wiste niet, dat het een Enghel des Heeren was.

h Gene. 18.a.8. ende 19.a.3. Tob. 12.b.19.

i† And. doch een brantoffer doen, so doet het den Heere.

17

Ende Manoah sprack tot den Enghel des Heeren: Hoe heetstu, dat wy dy prijsen, alst nu koemt dat du ghesproken hebst?

18

Doch de Enghel des Heeren sprack tot hem: ^k Waerom vraechstu na mynen name, die doch ^l† wonderlick is?

k Gene. 32.c.29. Exod. 3.b.13.

l† And. verborgen is?

19

^m Doe nam Manoah een bocxken ende spijsoffer, ende offerde het op eenen rotzsteen den Heere, ⁿ ende hy maeckte het ^o wonderbaerlick: Manoah ende zijn wijf saghen toe.

m Iudic. 6.c.20.

n Psal. 72.b.18. ende 136.a.4.

o Dat is, Het ginc wonderbaerlick toe, alsoot volcht dat de Enghel verdween, ende in de vlamme op voer.

C.20

Ende doe de ^p† vlamme opuoer, vanden Altaer na den Hemel, voer de Enghel des Heeren inder vlamme des Altaers op: doe dat Manoah ende zijn wijf saghen, vielen sy ter Aerden op haer aenghesicht.

p† And. laeye

21

Ende de Enghel des Heeren en verscheen Manoah ende synen wijue niet meer: doe bekende Manoah dat het een Enghel des Heeren was,

22

Ende sprack tot synen wijue: ^q Wy moeten den doot steruen, dat wy God ghesien hebben.

q Exod. 33.c.20. Iudic. 6.c.22.

23

Doch zijn wijf antwoordde hem: Wanneer de Heere lust hadde ons te dooden, so en hadde hy het brantoffer ende spijsoffer niet ghenomen van onsen handen: hy en hadde ons oock sulcks alles niet bewesen, noch ons sulcx hooren laten, ghelijck als nu gheschiet is.

24

Ende dat wijf baerde eenen sone, ende hiet hem ^r Simson, ende de Heere seghende hem.

r 1.Sam. 12.b.11.

25

Ende de Gheest des Heeren begonst met hem te zijn in den legher Dan, ⁺ tusschen Zarea ende Esthaol.

+ De Gheest des Heeren is in Simson.