Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xij. Capittel.

1. De Ephraimiters verheffen hen tegen Iephthah, 4. ende werden haerder twee ende veertich duysent verslaghen, 7. Iephthah sterft, 8. Ebzan, 11. Elon, 13. ende Abdon, volghen hem na den anderen int regiment.

A.1

ENde die van Ephraim ^a† schreydden, ende ghinghen na den Noordenwaert, ende spraken tot Iephthah: ^b Waerom bistu inden krijch ghetoghen teghen de kinderen Ammon, ende hebst ons niet aengeseyt, dat wy met dy togen: wy willen dijn huys met dy, met vyere verbernen.

a† And. oproerden. and. versamelden hen,

b Iudic. 8.a.1.

2

Iephthah sprack tot hen: Ick ende mijn volc, hadden een groote sake met den kinderen Ammon, ende ick riep v aen, doch ghy en holpt my niet wt haren handen.

3

Doe ick nu sach, dat ghy niet helpen woudet, ^c settede ick myne ziele in myne hant, ende tooch henen teghen de kinderen Ammon, ende de Heere gafse in mijn hant: waerom koemt ghy nu tot my op, teghen my te strijden?

c Dat is, Ick waechde mijn leuen, ende settede my in de vare.

4

Ende Iephthah vergaderde alle mannen in Gilead, ende streedt teghen Ephraim: ende de mannen in Gilead, sloeghen Ephraim, daerom dat sy seyden: Sijt doch ghy Gileaditers, onder Ephraim ende Manasse, als ^d de vluchtighe te Ephraim.

d Dat is, die in noode tot Ephraim om hulpe gheuloden zijt: ons en kan gheen hulpe van v komen, maer v van ons, dewijle wy van eenen Konincklicken stam zijn.

5

Ende de Gileaditers namen in het Veyr der Iordanen, voor Ephraim: Wanneer nu de veltuluchtige Ephraim spraken: Laet my ouer gaen:

[fol. 86r]

so spraken de mannen Gilead tot hem: Bistu een Ephraiter? wanneer hy dan antwoordde: Neen:

6

So hieten sy hem spreken: ^e Schiboleth: so sprack hy: Siboleth, ende en kondes niet recht segghen, so grepen sy hem, ende versloeghen hem aen het Veyr der Iordanen: dat te dier tijt van Ephraim vielen, twee ende veertich duysent.

e Heet een onstuymich waterloop: andere bediedent een aren aent koren, of een lantstrate, of heyrstrate.

7

Iephthah doch richtede Israel ses Iaer: ⁺ ende Iephthah de Gileaditer sterf, ende wert begrauen inden steden tot Gilead.

+ Iephthah steruet.

8

Na desen richtede Israel, ⁺ Ebzan van BethLehem.

+ Ebzan de 10. Richter in Israel, regneert .7. Iaer lanck.

9

Die hadde dertich sonen, ende dertich dochteren gaf hy wt: ende dertich dochteren nam hy weder van buyten, synen sonen: ende richtede Israel seuen Iaer,

B.10

Ende sterf, ende wert begrauen te BethLehem. ⁺

+ Elon de 11. Richter in Israel, regneert 10. Iaer lanck.

11

Na desen richtede Israel Elon, een Sebuloniter: ende richtede Israel thien Iaer,

12

Ende sterf, ende wert begrauen tot Aialon, inden lande Sebulon.

13

Na desen richtede Israel Abdon, ⁺ een sone Hillel, een Piriathoniter.

+ Abdon de 12. Richter in Israel regneert 8. Iaer lanck.

14

Die hadde veertich sonen, ende dertich soons kinderen, ^f die op tseuentich Esels veulen reden: ende richtede Israel acht Iaer,

f Iudic. 10.a.1.

15

Ende sterf, ende wert begrauen te Piriathon inden lande Ephraim, op dat gheberchte der Amalekiten.