Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. Israel is gheuancklick onder Iabin, 4. Debora richtet Israel, 6. ende schickt Barak wt, te krijghen met Sissera, 12. die vergadert een gantsch groote macht; Israel te beiegenen, 15. wert vluchtich voor verschrickinghe des Heeren, 17. ende van Iael verworcht.

A.1

MAer ^a de kinderen Israels deden voort aen quaet voor den Heere, ⁺ doe Ehud ghestoruen was.

a Iudic. 2.b.11. ende 3.b.12. 1.Sam. 12.a.9.

+ Israel is gheuancklick onder Iabin.

2

Ende de Heere verkochtse in de hant Iabin, des Konincks der Cananiten, die tot Hazor regeerde, ende zijn Velthooftman was Sissera, ende hy woonde ^b† tot Haroseth der Heydenen.

b† an. inden woude, etc.

3

Ende de kinderen Israels scheydden tot den Heere: ⁺ want hy hadde negen hondert ijseren waghenen, ende dwanck de kinderen Israels met ghewelt, twintich Iaer lanck.

+ Sissera.

4

Ter seluer tijdt was een Richtersche in Israel, ⁺ de Prophetersche Debora, een echte wijf Lapidoth.

+ Debora Prophetinne, de vierde Richtersche in Israel, regneert 40. Iaer.

5

Ende sy woonde onder den palmboom Debora, tusschen Rama ende BethEl, op het gheberchte Ephraim, ende de kinderen Israels quamen tot haer opwaerts voort gherichte.

6

^c De selue sandt henen, ende liet eysschen Barak den sone AbiNoam, ⁺ van KedesNaphtali, ende liet hem seggen: Heeft dy de Heere de God Israels, niet gheboden: Gaet henen, ende treckt op het geberchte Thabor, ende neemt thien duysent mannen met dy, van den kinderen Naphthali ende Sebulon?

c Iudic. 5.b.11.

+ Barak Israels Hooftman.

7

Want ick wil Sissera den Velthooftman Iabin tot dy voortbrenghen aen het water Kison, met synen waghenen, ende met synen hoopen, ende wil hem in dyne handen gheuen.

8

Barak sprack tot haer: Wanneer du met my treckst, so wil ick henen trecken: treckstu ooc niet met my, so wil ick niet henen trecken.

9

Sy sprack: Ick wil met dy trecken, doch den prijs sal dijne niet zijn op dese reyse die du doest, maer de Heere sal Sissera in eens wijfs hant ouer geuen: also maeckte haer Debora op, ende tooch met Barak na Kedes.

B.10

Doe ontboot Barak Sebulon ende Naphtali, tot hem na Kedes, ende tooch te voete met thien dusyent mannen: Debora tooch oock met hem.

11

Maer Heber de Keniter, ⁺ was van den Keniteren, van den kinderen ^d Hobab, Moses sweer, ghetoghen, ende hadde zijn hutten opgheslaghen ^e† by de Eycken Zaanim by Kedes.

+ Heber.

d Num. 10.c.29.

e† an. tot ter effene Zaanaim.

12

Doe wert Sissera gheseyt, ⁺ dat Barak de sone AbiNoam, op den berch Thabor getogen ware.

+ Sissera.

13

Ende hy vergaderde alle syne waghenen te hoope, neghen hondert ijseren waghenen, ende alle het volck dat met hem was, van Haroseth der Heydenen, aen het water Kison.

14

Debora dan sprack tot Barak: Op, dit is den dach, in welcken dy de Heere, Sissera heeft in dyne hant ghegheuen: want de Heere sal voor dy wt trecken: also tooch Barak van den berch Thabor neder, ende de thien duysent mannen met hem.

15

^f Ende de Heere verschrickte den Sissera, met alle syne waghenen ende gantschen heyre, voor de scherpte des sweerts Barak, dat Sissera van synen waghen spranck, ende vluchte te voet.

f 1.Sam. 14.b.15.

16

^g Barak dan iaechde den waghenen ende den Heyre na, tot Hazoreth der Heydenen toe, ende alle het heyr Sissera viel voor de scherpte des sweerts, dat daer niet een ouer bleef.

g Psal. 83.b.10.

17

Maer Sissera vluchte te voet in de hutte Iael, des wijfs Heber des Kenithers: want de Koninck Iabin tot Hazor, ende het huys Heber des Kenithers, stonden met malcanderen in goeden vrede.

18

Iael dan ghinck wt Sissera te ghemoet, ⁺ ende sprack tot hem: ⁺ Wijckt mijn heere, wijckt tot my in, ende vreest dy niet: ende hy weeck tot haer in hare hutte, ende sy bedeckte hem met eenen mantel.

+ Iael.

+ Iael Hebers wijf, verbercht Sissera, ende verworcht hem.

19

Hy sprack daerna tot haer: ^h Lieue, gheeft my een weynich waters te drincken, want my dorstet: ^* doe dede sy eenen melckpot op, ende gaf hem te drincken, ende deckte hem weder toe.

h 1.Reg. 17.b.10.

* Iudic. 5.c.24.

C.20

Ende hy sprack tot haer: Treedt in der hutten deure, ende wanneer yemant koemt, ende vraecht: Oft hier yemant zy, so spreeckt: Niemant.

21

ⁱ Doe nam Iael Hebers wijf eenen Naghel van der hutten, ende eenen hamer in haer hant, ende ghinck ^k heymelick tot hem in, ende sloech hem den naghel door synen slaep, dat hy ^l† ter Aerden sanck: hy dan ontsluymerde, wert amechtich ende sterf.

i Iudith 9.b.15.

k of, lijflick.

l† an. in der Aerden stack, ende hy was ontslapen, was moede, ende sterf.

22

Doe nu Barak Sissera na iaechde, ginck hem Iael te ghemoet, ende sprack tot hem: Koemt herwaerts, ick wil dy den man wijsen, dien du soeckst: ende doe hy tot haer binnen in quam, lach daer Sissera doot, ende den nagel stac in synen ^m slape.

m of, den slaep zijns hoofts.

23

Also dempte God te dier tijt Iabin der Cananiten Koninck, voor den kinderen Israels.

24

Ende de ^n† hant der kinderen Israels voer voort, ende werdt sterck teghen Iabin der Cananiten Koninck, tot dat sy hen wtroeyden.

n† an. kracht van hen ghinck, ende vermeerderde teghen etc.