Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxiij. Capittel.

1. Een schoone ernstlicke vermaninghe Iosue aen het volck, 6. dat sy hen in haerder ruste, met gantscher ernste des Wets des Heeren, ende zijns reynen dienst beulijtighen, 12. ende hoe sy met vermenginghe met den Heydenen vanden Heere afuallen, 14. dat niet weynigher syne ghedreychde straffe, als syne toegheseyde weldaet, aen hen falgeren sal.

A.1

ENde na eenen langhen tijt, ⁺ doe de Heere Israel hadde te ruste ghebracht, voor allen haren vyanden rontom, ende Iosua nu oudt ende welbedaecht was,

+ Een schoone vermaninghe Iosue, aen het volck Israels.

2

Doe eysschede hy het gantsche Israel, ende hare oudtste Hoofden, Richters ende Amptlieden te samen, ende sprack tot hen: Ick ben oudt ende wel bedaecht:

3

Ende ghy hebt gesien, alles wat de Heere uwe God gedaen heeft, aen allen desen volcke voor u henen, want de Heere uwe God heeft selfs voor v ghestreden.

4

^a Siet, ick hebbe v de ouerghebleuen volcken door het Lot wtghedeylt, eenen yeghelicken stamme zijn erfdeel, van de Iordane aen, ende alle volcken, die ick wtgheroeyt hebbe, ende aen de groote Zee, teghen den onderganck der Sonnen.

a Iudicum 1.a.2.

5

^b Ende de Heere uwe God, salse wtstooten voor v henen, ende van v verdrijuen, dat ghy haer lant inneemt, als v de Heere uwe God gesproken heeft.

b Deute. 12.c.29.

6

^c So hebt nu eenen gantsch vrijmoedigen moet, dat ghy houdt ende doet, alles wat gheschreuen staet int Wetboec Mose: ^d dat ghy daer niet van wijckt, noch ter rechter noch ter slincker hant.

c Iosue 1.a.7.

d Deute. 4.a.2. ende 6.c.24.

7

Op dat ghy niet onder dese ouerbleuen volcken koemt, die by v zijn, ende niet ghedenckt ^e noch sweert by den name haerder Goden, noch hen dient, noch hen aenbidt.

e Deute. 10.c.20.

8

Maer den Heere uwen God aenhanget, als ghy tot op desen dach ghedaen hebt.

9

^f So sal de Heere voor v verdrijuen groote ende machtighe volcken, ende niemandt heeft v wederstaen, tot op desen dach.

f Deuter. 7.a.1. ende 28.a.7.

B.10

^g Vwer een sal duysent iagen, want de Heere uwe God strijdt voor v, als hy v gesproken heeft.

g Leuitici 26.a.8 Esaie 30.b.17.

11

Daerom so bewaert op het aller neerstichste uwe zielen, dat ghy den Heere uwen God lief hebt.

12

^h So ghy v daerentegen omkeert, ende desen ouergebleuen volcke aenhangt, ende v met hen ^i† vermaechschapt, dat ghy onder hen, ende sy onder v komen,

h Deute. 7.a.2. ende 11.c.28.

i† And. verbindt door houwelick,

13

So wetet dat de Heere uwe God niet meer sal alle dese volcken voor v verdrijuen: maer sy sullen v ten stricke ende nette, ende ter gheessel in uwer zijden worden, ende ten doorn in uwen ooghen, tot dat hy v ombrengt vanden goeden lande, dat v de Heere uwe God gegeuen heeft.

14

Siet, ^k ick ga heden daeruan, als alle werelt: ende ghy sult weten van gantscher herten, ende van gantscher ziele, dat niet een woort ghefaelgeert en heeft aen allen den goeden, dat de Heere uwe God ghesproken heeft: het is alles ghekomen, ende niet een achterbleuen.

k 1.Reg. 2.a.2.

15

Ghelijck als alle het goet ghekomen is, dat v de Heere uwe God ghesproken heeft: ^l also sal de Heere oock ouer v komen laten, alle het quaet tot dat hy v verdelghe, van desen goeden lande, dat v de Heere uwe God ghegheuen heeft,

l Deut. 28.b.15.

16

^m Wanneer ghy ouertreedt het Verbondt des Heeren ws Gods, dat hy v gheboden heeft, ende henen gaet, ende anderen Goden dient, ende hen aenbidt, dat den toorn des Heeren ouer v vergrimmet, ende v haest ombrenghet, vanden goeden lande, dat hy v ghegheuen heeft.

m Iosue 24.c.20.