Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xviij. Capittel.

1. De hutte des Bescheydts werdt tot Silo opghericht, 4. dry mannen van den seuen ouerbleuen stammen werden wtgesonden het landt te besien ende wt te deylen, 10. het Lot werdt geworpen, ende het erfdeel BenIamin, 21. met tsamen synen steden beschreuen.

A.1

ENde de gantsche Ghemeynte der kinderen Israels vergaderden hen tot Silo, ⁺ ende richteden aldaer op de hutte des ^a† Bescheydts, ende het landt was hen onderworpen.

+ De hutte des Bescheydts, is te Silo opghericht.

a† An. Tuyghenisses oft Stifts,

2

Ende daer waren noch seuen stammen der kinderen Israels, dien sy haer erfdeel niet wtghedeylt hadden.

3

Ende Iosua sprack tot den kinderen Israels: Hoe langhe zijt ghy so traech, dat ghy niet henen gaet, het lant in te nemen, dat v de Heere uwer Vaderen God ghegheuen heeft?

4

Beschict v wt eenen yeghelicken stamme dry mannen, dat ickse henen sende: ende sy hen op maken, ende door het landt gaen, ende beschrijuent na haren erfdeelen, ende weder tot my komen.

5

Deyldt het landt in seuen deelen, Iuda sal blijuen op syne lantpalen van den Zuyden af, ende het huys Iosephs sal blijuen op syne lantpalen, van den Noorden af.

6

Ghy dan beschrijft het lant der seuen deelen, ende brengtse herwaerts tot my, so wil ick v het Lot werpen voor den Heere onsen God.

7

^b Want de Leuiten en hebben gheen deel onder v, maer het Priesterdom des Heeren is haer erfdeel: Gad nu ende Ruben, ende den haluen stamme Manasse, hebben haer erfdeel ghenomen op ghene zijde der Iordanen, teghent Oosten, ^c dat hen Mose de knecht des Heeren ghegheuen heeft.

b Iosue 13.b.14. ende 14.a.3.

c Nume. 32.d.33. ende 34.b.14. Deute. 3.b.12 ende 29.a.8. Iosue 12.a.6.

8

Doe maeckten hen de mannen op, dat sy henen ginghen: ende Iosua gheboot hen, ^d† dat sy henen wouden gaen, het landt te beschrijuen, ende sprack: Gaet henen, ende doorwandelt het landt, ende beschrijuet: ende koemt weder tot my, dat ick v hier het Lot werpe voor den Heere tot Silo.

d† And. doe

9

Also ginghen de mannen henen, ende doortoghen het landt, ende beschreuent op eenen brief, na den steden in seuen deelen, ende quamen tot Iosua int legher tot Silo.

B.10

Doe warp Iosua het Lot ouer haer tot Silo voor den Heere, ende deylde aldaer het landt wt onder de kinderen Israels, eenen yegelicken zijn deel.

11

Ende het Lot des stams der kinderen BenIamin, viel na haren gheslachten, ⁺ ende den landtpale haers Lots ghinck wt, tusschen den kinderen Iuda, ende den kinderen Iosephs.

+ Erfdeel des stams der kinderen BenIamin.

12

Ende haer landtpale was, na den hoeck teghent Noorden, van der Iordane aen, ende gaet opwaerts aen de zijde Ieriho vant Noordenwaert ende koemt op het gheberchte teghent Westenwaert, ende gaet wt aen der woestijne BethAuen.

13

Ende gaet van daer na Luss, aen de zijde aen Luss teghent Zuydenwaert, dat is, BethEl, ende koemt af na AtarothAdar, aen den berghe, die van het Zuyden herwaert leyt aen den nederen BethHoron.

14

Daer na neycht sy haer, ende kromt haer om na den hoeck des Westens, teghent Zuyden, van den berghe, die voor BethHoron teghent Zuydenwaert leyt, ende gaet wt aen KiriathBaal, dat is, KiriathIearim, de stadt der kinderen Iuda: dat is het eynde teghent Westen.

15

Nu het eynde teghent Zuyden, is van den KiriathIearim aen, ende gaet wt teghent Westen, ende koemt wt totter water fonteynen Nephtoah.

16

Ende gaet af aen des berchs eynde, die voor den dale des soons Hinnam leyt, welck in de leechte Raphaim teghent Noorden leyt, ende gaet af door het dal Hinnam, aen de zijde der Iebusiteren, tegent Zuyden, ende koemt af totter fonteynen Rogel.

17

Ende treckt haer vant Noordenwaert, ende koemt wt na EnSemes, ende koemt wt totten ^e† hoopen, die teghen Adumim opwaert ligghen, ende koemt af totten steen Bohen, des soons Ruben.

e† An. [plaetsen] Geliloth.

18

Ende gaet ter zijden henen by den vlacken velde, dat teghent Noorden leyt, ende koemt af op het vlacke velt.

19

Ende gaet aen der zijden BethHagla, die teghent Noorden leyt, ende zijn eynde is aen der tonghe des souten Zees, teghent Noorden, aen den ^f† hoeck der Iordanen teghent Zuyden: dat is de lantpale teghent Zuyden.

f† And. eynde

C.20

Nu het eynde teghent Oosten, sal de Iordaen eynden: dat is het erfdeel der kinderen BenIamin, in haren lantpalen rontom, na haren gheslachten.

21

De steden nu des stams der kinderen BenIamins in haren geslachten, zijn dese: Ieriho, BethHagla, EmekKezi,

22

BethAraba, Zemaraim, BethEl,

23

Auin, Hapara, Ophra.

24

CapharAmonai, Aphni, Gaba: dat zijn twaelf steden ende hare dorpen.

25

Gibeon, Rama, Beerath,

26

Mizpe, Caphira, Moza,

27

Reken, Ierpeel, Tarrala.

28

Zela, Eleph, ende de Iebusiters, dat is, Ierusalem, Gibeath, Kiriath, veerthien steden ende hare dorpen: dat is het erfdeel der kinderen BenIamin in haren gheslachten.