Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvij. Capittel.

1. Landt, 7. ende lantpale des haluen stamme Manasse, 13. chijnsbaerheyt der Cananiten, 14. Manasse ende Ephraim begheeren meer landts, ende werdt hen verwillicht.

A.1

ENde het Lot viel ^a den stamme Manasse: ^{+ b} want die is Iosephs eerste sone, ende viel op Machir, den eersten sone Manasse, den vader Gilead: want hy was een strijtbaer man, daerom werdt hem Gilead ende Basan.

a Iosue 13.c.29.

+ Het landt des haluen stamme Manasse.

b Gene. 41.f.51. ende 48.b.14.

2

^c Maer den anderen kinderen Manasse, na haren maechschappen, viel het oock, namelick, den kinderen Abieser, den kinderen Helec, den kinderen Asriel, den kinderen Sechem, den kinderen Hepher, ende den kinderen Semida: dat zijn de kinderen Manasse, des soons Iosephs, mans namen onder haren maechschappen.

c Nume. 26.c.29.

3

^d Nu Zelaphehad de sone Hepher, des soons Gilead, des soons Machir, des soons Manasse, hadde gheen sonen, maer dochteren: ende hare namen zijn dese: Mahala, Noa, Hagla, Milca, Tirza.

d Numer. 26.d.33

4

Ende sy traden voor den Priester Eleasar, ende voor Iosua den sone Nun, ende voor de Ouersten, ende spraken: ^e De Heere heeft Mose gheboden, dat hy ons soude erfdeel gheuen onder onsen broederen: ende men gaf hen erfdeel onder den broederen haers vaders, na het beuel des Heeren.

e Nume. 27.a.1. ende 36.a.2.

5

Daer vielen dan op Manasse thien snoeren, behaluen het landt Gilead ende Basan, dat op ghene zijde der Iordanen leyt.

6

Want de dochteren Manasse, namen erfdeel onder hare sonen: ende het lant Gilead, wert den anderen kinderen Manasse.

7

Ende de lantpale Manasse, was van Asser aen na Michmethath, die voor Sichem leyt, ende strect totter rechter zijden, aen die van EnThapuah.

8

Want het landt Thapuah wert Manasse, ende is de landtpale Manasse ^f† aen de kinderen Ephraim.

f† and. eynde der etcet.

9

Daer na koemt sy af, na NaHalkana, tegent Zuydenwaert, tot den beecksteden, die Ephraims zijn, onder den steden Manasse: Nu van den Noorden, is de lantpale Manasse aen de beke, ende gaet wt aen de Zee,

B.10

Den Ephraim teghent Zuyden, ende Manasse teghent Noorden, ende de Zee is syne lantpale: ende sal schieten, aen Asser vant Noorden, ende aen Isaschar vant Oosten.

11

^g So hadde nu Manasse, onder Isaschar ende Asser, BethSean, ende hare dochteren, Ieblaam ende hare dochteren, ende die tot Dor ende hare dochteren, ende die tot Endor ende hare dochteren,

g Iudic. 1.c.27.

[fol. 78r]

ende die tot Thanach ende hare dochteren, ende die tot Megiddo ende hare dochteren, ende het derde deel Naphet.

12

Ende de kinderen Manasse, konden dese steden niet innemen, ^h† maer de Cananiters begosten te woonen in denseluen lande.

h† And. hoewel de Cananiters hen afgeslaghen hadden, meer te woonen etcet.

13

Ende doe de kinderen Israels machtich werden, maeckten sy de Cananiters chijnsbaer, ende verdreuense niet.

14

Doe spraken de kinderen Iosephs met Iosua, ende seyden: Waerom hebstu my maer een Loth, ende een snoer des erfdeels ghegheuen? ende ick ben doch een groot volck, als my de Heere so wel gheseghent heeft

15

Doe sprack Iosua tot hen: Dewijle dat du een groot volck bist, so gaet opwaerts in het wout, ende houwet omme, ende maecht dy aldaer steden, in den lande der Pheresiteren, ende Raphaim, dewijle dat dy het geberchte Ephraim te enghe is.

16

Doe spraken de kinderen Iosephs: Dat gheberchte ^i† en sullen wy niet verkrijghen: want daer zijn ijseren waghenen by allen Cananiteren, die in den dale des landts woonen, by welcken leyt BethSean ende hare dochteren, ⁺ ende Iesreel in den dale.

i† And. is ons niet ghenoech: ende oock zijn daer ijseren etc.

+ Strijtwagenen.

17

Iosua sprack totten huyse Iosephs tot Ephraim ende Manasse: Du bist een groot volck, ende dewijle dat du so groot bist, moestu niet alleen een Lot hebben.

18

Maer dat gheberchte sal dijn zijn, daer het wout is, dat houwet omme, so sal het dijns Lots eynde zijn, wanneer du de Cananiteren verdrijfst, die de ijseren wagenen hebben, ende machtich zijn.