Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvi. Capittel.

1. Het erfdeel Ephraim, ende des haluen stamme Manasse, 5. de landtpale Ephraim.

A.1

ENde het Lot viel den kinderen Iosephs, ⁺ van der Iordanen teghen Ieriho, totten water by Ieriho, van Oostenwaert: ende de woestijne, die wt gaet van Ieriho, door het gheberchte BethEl,

+ Het erfdeel Ephraim, ende des haluen stamme Manasse.

2

Ende koemt van ^a BethEl wt na Luss, ende gaet door de lantpale ArchiAtaroth.

a Iudic. 1.c.22.

3

Ende treckt haer af teghent Westenwaert, ⁺ na de lantpale Iaphleti, tot aen de lantpalen des nederen BethHoron, ende tot Gaser toe, ende het eynde is aen de Zee.

+ De lantpale Ephraim.

4

Dat hebben de kinderen Iosephs, Manasse ende Ephraim ten erfdeel ghenomen.

5

De landtpale der kinderen Ephraim in haren gheslachten, haers erfdeels van Oostenwaert, was AtarothAdor, totten hoogen BethHoron,

6

Ende gaet wt teghent Westen by Michmethath, die teghent Noorden leyt, aldaer gheeft sy haer om teghent Oosten der stadt ThaenathSilo, ende gaet daer door van Oostenwaert na Ianoha:

7

Ende koemt af van Ianoha, na Ataroth ende Naaratha, ende schiet aen Ieriho, ende gaet wt aen de Iordane.

8

Van Thapuah gaet sy tegent Westenwaert, na NahalKana, ende haren wtganck is aen de Zee: dat is het erfdeel des stams der kinderen Ephraim, in haren gheslachten.

9

Ende alle de lanpalen, steden met tsamen haren dorpen der kinderen Ephraim, waren verstroeyt onder het erfdeel der kinderen Manasse:

B.10

^b Ende sy en verdreuen de Cananiters niet, die tot Gaser woonden: also bleuen de Cananiters onder Ephraim tot op desen dach, ende werden chijnsbaer.

b Nume. 33.f.50 Iudic. 1.c.29.