Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiij. Capittel.

1. Hier beghint de beschrijuinghe der wtdeylinghe des lants, als God hen toegheseyt hadde, 7. der negen stammen ende des haluen Manasse dese zijde, 8. ende 15. Ruben, 24. Gad, 29. ende des anderen haluen Manasse ghene zijde der Iordanen, 14. het erue Leui is des Heeren offer.

A.1

DOe nu Iosua oudt was, ⁺ ende wel bedaecht, sprack de Heere tot hem: Du bist oudt gheworden ende wel bedaecht, ende des lants is noch vast veel ouerbleuen in te nemen,

+ Beschrijuinge der wtdeylinge des lans.

2

Namelick, het ^a† gantsche Galilea der Philisteen, ende gantsch Gessuri:

a† And. alle lantpalen of lantschappen der etc.

3

Van Sihor aen, die voor Egypten vliet, tot aen de lantpale Ekron tegent Noorden, die den Cananiten toegherekent wordt, vijf heeren der Philisteen, namelick, de Gasiten, de Asdoditen, de Askloniten, de Gethiten, de Ekroniten, ende de Auiten.

4

Nu van den Zuyden aen, het gantsche lant der Cananiten, ende Maara der Sydoniers tot Aphek toe, tot aen de lantpale der Amoriten.

5

Daertoe het lant der Gibliten, ende den gantschen Libanon teghen den opganck der Sonnen, van BaalGad aen, beneden aen den berge Hermon, tot datmen koemt tot Hamath:

6

Alle die op het gheberchte woonen, van Libanon aen, tot aen de warme wateren, ende alle Sydoniers: Ick wilse verdrijuen voor den kinderen Israels: legt slechts het Lot daerom, haer wt te deylen onder Israel, als ick dy geboden hebbe.

7

So deylt nu dit lant ten erue onder de negen stammen, ende onder den haluen stamme Manasse.

8

Want de Rubeniten ende Gadditen hebben met den anderen haluen Manasse, ⁺ erfdeel ontfanghen, ^b dat hen Mose gaf op ghene zijde der Iordanen, teghen den opganck der Sonnen, als hen dat selue Mose de knecht des Heeren, ghegheuen heeft,

+ Het lant Ruben, Gad, ende des haluen stamme Manasse, ghene zijde der Iordanen.

b Nume. 32.d.33. Deute. 3.b.12. Iosue 1.b.13. ende 12.a.6. ende 22.a.4.

9

Van Aroer aen, die aen den Oeuer des waters ^c† by Arnon leyt, ende van der stadt midden int water, ende alle ^d† contreye Mebda tot Dibon toe.

c† and. Arnon

d† and. lantstreke

B.10

Ende alle steden Sihon des Konincks der Amoriten, die tot Hesbon regeerde, ^* tot aen de lantpale der kinderen Ammon:

* Iosue 12.a.2.

11

Daertoe Gilead, ende de lantpale aen Gessuri ende Maachati, ende den gantschen berch Hermon, ende het gantsche Basan tot Salcha toe.

12

Het gantsche Rijcke Og tot Basan, die tot Astaroth ende Edrei regeerde, die noch een van den ouerbleuen ^e† Reusen was: Mose sloechse ende verdreefse.

e† and. Rephaim

13

De kinderen Israels nu, verdreuen de Gessuriters ende Maachiters niet, maer beyde Gessur ende Maachat woonden onder den kinderen Israels tot op desen dach.

14

^f Nu den stamme der Leuiten, gaf hy gheen erfdeel: want het offer des Heeren des Gods Israels, is haer erfdeel, als hy hen gheseydt heeft.

f Nume. 18.c.20. Deute. 10.a.9. Iosu. 13.b.14.d.33

15

^g Also gaf Mose den stamme der kinderen Ruben, ⁺ na haren gheslachten.

g Nume. 32.d.33.

+ Ruben.

16

Dat hare lantpalen waren van Aroer, die aen den Oeuer des waters ^h† by Arnon leyt, ende de stadt midden int water, met allen effen velden, tot Makeda toe.

h† And. Arnon

17

Hesbon ende alle hare steden, die inden effen velde ligghen, Dibon, BamothBaal, ende BethBaalMeon,

18

Iahza, Kedemoth, Mephaath,

19

Kiriathaim, ^i† Sabama, SerothSahar op het gheberchte ^k† in den dale,

i† And. Sibame

k† And. Emek

C.20

BethPeor, de beke aen Bisga ende BethIesimoth,

21

Ende alle steden op den effen velde: ende het gantsche Rijck Sihon des Konincx der Amoriten, die tot Hesbon regeerde, ^l dien Mose sloech met tsamen den Vorsten Midian, Eni, Rekem, Zur, Hur, ende Reba, de gheweldighe des Konincks Sihon, die in den lande woonden.

l Nume. 21.c.24. ende 31.a.8.

22

^m Daertoe Bileam den sone Beor, ⁺ den waerseggher, verworchden de kinderen Israels met den sweerde, met tsamen den verslaghenen.

m Nume. 31.a.8.

+ Bileam werdt verworcht.

23

Ende de landtpale der kinderen Ruben, was de Iordaen: dat is het erfdeel der kinderen Ruben in haren gheslachten, van steden ende dorpen.

24

Den stamme der kinderen Gad na haren geslachten gaf Mose, ⁺

+ Gad.

25

Dat hare landtpalen waren, Iaeser, ende alle steden in Gilead, ende het halue landt der kinderen Ammon, tot Aroer toe, die daer leyt voor ^n† Rabbath:

n† and. Rabba

26

Ende van Hesbon tot ^o† Ramath toe, Mizpe ende Bethonim, ende van Mahanaun tot aen de lantpale Debir.

o† and. Ramath in Mizpe

27

Maer int dal BethHaram, BethNimra, Sucoth ende Zaphon, die ouerbleuen was van den Rijcke Sihon des Konincks tot Hesbon, dat de Iordaen de landtpale was tot aen het eynde der Zee Cinneroth, op dese zijde der Iordanen teghen den opganck der Sonnen.

28

Dat is het erfdeel der kinderen Gad, in haren gheslachten van steden ende dorpen.

29

^p Den haluen stamme der kinderen Manasse, ⁺ na haren gheslachten, gaf Mose,

p Iosue 17.a.1. 1.Paral. 5.c.23.

+ Manasse.

D.30

Dat hare lantpalen waren van Mahanaim aen, het gantsche Basan, het gantsche Rijck Og des Konincks tot Basan, ende alle vlecken Iair, die in Basan ligghen, namelick, tsestich steden.

31

Ende het halue Gilead, Astaroth, Edrei, de steden des Konincrijcks Og tot Basan, gaf hy den kinderen Machir des soons Manasse, dat is, de helft der kinderen Machir, na haren gheslachten.

32

Dat isset dat Mose wtghedeylt heeft op den velde Moab, op ghene zijde der Iordanen voor Ieriho, teghen den opganck der Sonnen.

33

^q Nu den stamme Leui gaf Mose gheen erfdeel: want de Heere de God Israels, is haer erfdeel, ^r als hy hen ghesproken heeft.

q Nume. 18.c.20. Iosue 13.b.14. Hesek. 44.c.28.

r Nume. 18.c.20.