Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vij. Capittel.

1. Achan neemt vanden verbannen goede, 2. Ai wert verspiedt, 4. Israel vliedt voor syne vyanden, 6. Iosua is in grooten angste, ende roept tot God, 10. die troost hem, ende gheeft hem raet, 16. Iosua volcht hem, 19. Achan bekent syne misdaet, 22. ende so die wert beuonden, wert hy met den synen gesteent ende omgebracht.

A.1

DOch de kinderen Israels vergrepen hen aen den verbannen goede: ⁺ want ^a Achan de sone Charmi, des soons Sabdi, des soons Serah, vanden stamme Iuda, nam des verbanden goets wat: doe vergrimde den toorn des Heeren ouer de kinderen Israels.

+ Achan neemt vanden verbanden goede.

a Deuter. 7.c.25. Iosue 6.b.18. ende 22.c.20 2.Macha. 12.e.40 1.Para.2.a.7.

2

Doe nu Iosua mannen wtsandt van Ieriho na Ai, die by BethAuen leyt teghent Oosten voor BethEl, ⁺ ende sprack tot hen: Gaet henen op, ende verspiedt het lant: ende doe sy op gegaen waren, ende Ai verspiedt hadden,

+ Ai werdt verspiedt.

3

Quamen sy weder tot Iosua, ende spraken tot hem: Laet het gantsche volck niet op trecken, maer by twee of dry duysent mannen, dat sy op trecken, ende slaen Ai, dat hen het gantsche volck daer niet mede bemoeye,want harer is weynich.

4

Also toghen des volcks by dry duysent mannen op, ^{+ b} ende die vloden voor de mannen tot Ai.

+ Israel vluchtet voor syne vianden.

b Iosue 8.a.5.

5

Ende die van Ai sloeghen haerder by ses ende dertich mannen, ende iaechdense van der poorte

[fol. 74r]

aen tot op Sabarim toe, ende sloeghense den wech neder: doe werdt den volcke het herte verzaecht, ^c ende wert als water.

c Psalm. 22.b.15.

6

Ende doe verscheurde Iosua syne kleederen, ⁺ ende viel op zijn aensichte ter Aerden, voor de Arcke des Heeren tot aen den auondt, met tsamen den Oudtsten Israels, ende worpen stof op hare hoofden.

+ Iosua is in grooten ancxste, ende roept tot God.

7

^d Ende Iosua sprack: Och Heere Heere, waerom hebstu dit volck ouer de Iordane gheleydt, dat du ons in de handen der Amoriters gheuest, ons om te brenghen? O dat wy waren op ghene zijde der Iordanen ghebleuen, als wy begost hadden?

d Deute. 9.c.26.

8

Och mijn Heere, wat sal ick segghen, dewijle Israel synen vyanden den rugghe toekeert?

9

Wanneer dat de Cananiters, ende alle inwoonders des landts hooren, so sullen sy ons omuanghen, ende oock onsen name wtroeyen van der Aerden: wat wiltu dan by dynen grooten Name doen?

B.10

Doe sprac de Heere tot Iosua: Staet op, waerom ligstu also op dijn aensicht?

11

Israel heeft hem besondicht, ende hebben mijn Verbont ouertreden, dat ick hen gheboden hebbe, daertoe hebben sy des verbanden goets genomen ende ghestolen, ende versaeckt, ende onder haer ghereetschap gheleyt.

12

De kinderen Israels konnen niet staen voor hare vyanden, maer moeten haren vyanden den rugghe toekeeren, want sy zijn in den Ban: Ick sal voortaen niet meer met v zijn, so ghy den Ban niet wt v en roeyt.

13

Staet op, ende heylicht het volck, ende segt: ^e Heylighet v op morghen: want also seydt de Heere de God Israels: ^f Daer is eenen Ban onder dy Israel, daerom kanstu voor dyne vyanden niet staen, tot dat ghy den Ban wt v ^* wech doet.

e 1.Samu. 16.a.5.

f Deut. 13.b.17.

* Of, verdelghet

14

Ende sult v vroech hiertoe maken, eenen stamme na den anderen, ende welcker stamme de Heere raken sal, die sal hem hiertoe maken, een gheslachte na den anderen, ende welcker gheslachte de Heere raken sal, dat sal hem hiertoe maken, een huys na den anderen: ende welcker huys de Heere raken sal, dat sal hem hiertoe maken, een huysweert na den anderen.

15

Ende wie beuonden werdt in de Ban, dien salmen met vyere verbranden, met allen dat hy heeft: daerom dat hy het Verbondt des Heeren ouertreden, ende een dwaesheydt in Israel begaen heeft.

16

^g Doe maecte hem Iosua des morgens vroech op, ende brachte Israel hiertoe, eenen stamme na den anderen, ende den stamme Iuda werdt gheraeckt.

g 1.Sam. 10.c.21.

17

Ende doe hy de gheslachten in Iuda hiertoe brachte, wert het gheslachte der Serahiters geraect: ende doe hy het gheslachte der Serahiters hiertoe brachte, eenen huysweerdt na den anderen, wert Sabdi gheraeckt.

18

Ende doe hy zijn huys hiertoe brachte, eenen weerdt na den anderen, ⁺ werdt gheraeckt Achan de sone Charmi, des soons Sabdi, des soons Serah, wt den stamme Iuda.

+ Achan.

19

Ende Iosua sprack tot Achan: ^h Mijn sone, gheeft den Heere den God Israels de eere, ende gheeft hem het lof, ende segt my aen: Wat hebstu ghedaen? ende en versaeckt my daer niet van.

h 1.Sam. 14.e.43 Ioan. 9.c.24.

20

Doe antwoordde Achan Iosua, ⁺ ende sprack: Voorwaer ick hebbe my besondicht aen den Heere den God Israels: so ende so hebbe ick ghedaen.

+ Achan bekent syne misdaet.

21

Ick sach onder den roof eenen kostelicken Babylonischen mantel, ende twee hondert sikel siluers, ende een gulden ^i† tonghe, vijftich sikel weert aen den ghewichte, des lustede my, ende nam het: ende siet, het is begrauen in der Aerden in mijnder hutten, ende het siluer daer onder.

i† spancsel, als een tonghe ghestalt.

22

Doe sandt Iosua boden henen, die liepen ter hutten, ende siet, het was begrauen in zijnder hutten, ende het siluer daer onder.

23

Ende sy nament wt der hutten, ende brachtent tot Iosua, ende tot allen kinderen Israels, ende leydent voor den Heere.

24

Doe nam Iosua ende het gantsche Israel met hem, ⁺ Achan den sone Serah, met tsamen den siluer, mantel ende gulden tonghe, syne sonen ende dochteren, syne ossen, ende ezels, ende schapen, zijn hutte, ende alles wat hy hadde, ende voerdense opwaert in het dal Achor.

+ Achan werdt ghesteent.

25

Ende Iosua sprack: Dewijle dat du ons ^k† bedroeuet hebst, so bedroeue dy de Heere aen desen daghe: ^l Ende het gantsche Israel steenden hen, ende verbrandese met vyere.

k† And. eenen kommer aengherichtet hebst, so kekommere etc.

l 2.Sam. 18.b.17.

26

Ende doe syse ghesteent hadden, maeckten sy eenen grooten steenhoop ouer hen, die blijft tot op desen dach: also keerde hem de Heere van de grimmicheydt zijns toorns: ⁺ daer van heet de selue plaetse het dal Achor, tot op desen dach.

+ Het dal Achor.