Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. Hoe Ieriho gewonnen, ingenomen ende verweldicht wert, 22. Rahab met den haren wort behouden, 26. de oprichter ende bouwer Ieriho veruloeckt.

[fol. 73v]

A.1

^a† IEriho dan was ^b toeghesloten ende bewaert, om der kinderen Israels wille, dat daer niemant wt of in komen konde.

a† And. Iericho

b Iosue 24.b.11.

2

Doch de Heere sprack tot Iosua: Siet daer, Ick hebbe Ieriho, met tsamen haren Koninghen ende krijchslieden, in dyne hant ghegheuen.

3

Laet alle krijchsmannen rondtom de stadt henen gaen eenmael, ende doet also ses daghen lanck.

4

Aen den seuenden daghe nu, laet de Priesters seuen ^c† basuynen des Luytiaers nemen, voor de Arcke, ende gaet desseluen seuenden daechs, seuenmael om de stadt, ende laet de Priesters de basuynen blasen.

c† An ramshoornen nemen Dese basuynen van hoornen ghemaeckt, bedieden het Euangelium van Christo, door welcker geluydt ende predike, valt Ieriho, de werelt, ende alle hare macht: doch de sondersse Rahab met haren vrienden wert behouden, de werckheyligen zijn alle verloren.

5

Ende wanneermen het Luytiaers hooren blaest, ende het lange tuyt, dat ghy de basuynen hoort, so sal het gantsche volck een groot veltgeschrey maken, so sullen der stadt mueren om vallen: ende het volck sal daer in vallen, een yegelick stracks voor hem.

6

Doe riep Iosua de sone Nun de Priesteren, ende sprack tot hen: Draecht de Arcke des Verbondts, ende seuen Priesters laet seuen Luydtiaers basuynen draghen, voor de Arcke des Heeren henen.

7

Doch totten volcke sprack hy: Treckt henen, ende gaet om de stadt: ende wie wel gerustet is, die ga voor de Arcke des Heeren henen.

8

Doe Iosua sulcks den volcke gheseydt hadde, droeghen de seuen Priesters, seuen Luydtiaers basuynen, voor de Arcke des Heeren henen, ende ginghen ende bliesen de basuynen, ende de Arcke des Verbondts des Heeren volchde hen na.

9

Ende wie gherustet was, die ghinck voor de Priesters henen, die de basuynen bliesen, ende den hoop volchde de Arcke na, ende blies ^d† basuynen.

d† An. het klanck alles van basuynen.

B.10

Iosua dan gheboot den volcke, ende sprack: Ghy sult gheen veltgheschrey maken, noch uwe stemmen hooren laten, noch een woort wt uwen monde gheuen tot op den dach, wanneer ick tot v segghen sal: Maect een veltgheschrey, so maect dan een veltgheschrey.

11

Also ghinck de Arcke des Heeren rontom de stadt eenmael, ende quamen weder int legher, ende bleuen daer in.

12

Want Iosua plach hem des morghens vroech op te maken, ende de Priesters droeghen de Arcke des Heeren:

13

So droegen de seuen Priesters, de seuen Luytiaers basuynen voor de Arcke des Heeren henen, ende ginghen, ende bliesen de basuynen: ende wie gherustet was, ginck voor hen henen, ende den hoop volchde de Arcke des Heeren na, ende blies basuynen.

14

Des anderen daechs gingen sy oock eenmael om de stadt, ende quamen weder int legher: also deden sy ses daghen lanck.

15

Aen den seuenden daghe nu, doe den dagheraet opginck, maeckten sy hen vroech op ende ginghen na derseluer wijse, seuenmael om de stadt, dat sy desseluen eenigen daechs, seuenmael om de stadt quamen.

16

Ende aen den seuenden mael, doe de Priesters de basuynen bliesen, sprack Iosua totten volcke: Maect een veltgheschrey, want de Heere heeft v de stadt ghegheuen.

17

Doch dese stadt, ende alles wat daer in is, sal den Heere verbannen zijn: ^e alleen de ^f† hoere Rahab sal leuendich blijuen, ende alle die met haer in den huyse zijn: ^g want sy heeft de boden verborghen, die wy wtsonden.

e Iosue 2.b.14.

f† An. werdinne

g Iosue 2.a.4.

18

^h Alleen wacht v voor den verbanden goede, dat ghy v niet en verbannet, so ghy des verbanden goedts wat neemt, ende maeckt het legher Israels verbannen, ende brengt het tot ongheluck.

h Iosue 7.a.1.

19

Doch alle het siluer ende gout, met tsamen den metalen ende ijseren ghereetschappe, sal den Heere gheheylicht zijn, dat het tot des Heeren schat kome.

C.20

Doe maeckte het volck een veldtgheschrey, ende bliesen in de basuynen: want als het volck den klanck der basuynen hoorde, maecte het een groot veldtgheschrey: ^{+ i} ende de mueren vielen om, ende het volck klam in de stadt, een yeghelick stracks voor hem: ^k also ghewonnen sy de stadt.

+ Ieriho valt te gronde.

i Hebr. 11.d.30.

k 2.Mach. 12.c.28

21

^l Ende verbanden alles wat in der stadt was met de scherpte des sweerdts, beyde mannen ende vrouwen, ionck ende oudt, ossen, schapen ende ezels.

l Deute. 20.b.16.

22

Ende Iosua sprack tot den twee mannen, ^m die het lant verspiedt hadden: Gaet in het huys der hoeren, ende brengt het wijf van daer wt, met alle dat sy heeft, als ghy haer ghesworen hebt.

m Iosue 2.a.1.b.14.

23

Doe ghinghen de ionghelinghen de verspieders daer in, ende brachten Rahab wt, met tsamen haren vader ende moeder, ⁺ ende broederen, alles wat sy hadde, ende alle haer gheslachte, ende lietense buyten den legher Israels.

+ Rahab wert behouden.

24

Nu de stadt verbrandden sy met vyere, ende alles wat daer in was, alleen het siluer, ende gout, ende metalen, ende ijseren ^n† gereetschap, deden sy ten schatte in het huys des Heeren.

n† And. vaten.

25

^o Rahab daerenteghen de hoere, met tsamen den huyse haers vaders, ende alles wat sy hadde, liet Iosua leuen: ende sy woont in Israel tot op desen dach, daerom dat sy de boden verborghen hadde, die Iosua te verspieden wtghesonden hadde na Ieriho.

o Hebr. 11.d.31. Iacobi 2.c.25.

26

Te dier tijt swoer Iosua, ende sprack: ^p Veruloeckt zy de man voor den Heere, die dese stadt Ieriho, oprichtet ende bouwet: Als hy haren gront leyt, dat koste hem synen eersten sone, ende wanneer hy hare poorten settet, dat koste hem synen ioncxsten sone.

p 1.Reg. 16.d.34.

27

Also was de Heere met Iosua, datmen van hem seyde in allen landen.