Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Iosua koemt metten volcke aen de Iordane, 6. de Leuiten worden geordineert metter Arcke vooraen henen te gaen, 7. Iosua versterct vanden Heere, 9. geeft den volcke een merckteecken der Godlicker tegenwoordicheyt, 15. de Iordane staet eensdeels, het ander deel loopt af, ende gaen alle drooch daer door.

A.1

ENde Iosua maeckte hem vroech op, ⁺ ende sy toghen wt Sittim, ende quamen aen de Iordane, hy ende alle kinderen Israels, ende bleuen aldaer den nacht ouer, eer sy ouer togen.

+ Het volck koemt aen de Iordane.

2

^a Ende na dry daghen ghinghen de Hooftlieden door den legher, ende gheboden den volcke, ende spraken:

a Isue 1.b.11.

3

Wanneer ghy de Arcke des Verbonts des Heeren ws Gods sien sult, ende de Priesters wt den Leuiten haer dragen, so trect wt van uwe plaetsen, ende volcht haer na.

4

Doch dat tusschen v ende haer ruymte zy, by twee duysent ellen: ghy en sult v niet tot haer genaken, op dat ghy wetet, op welcken wech ghy gaen sult, want ghy en hebt den wech te voren niet ghegaen.

5

Ende Iosua sprack totten volcke: ^b Heylicht v, want morghen sal de Heere, een wonder onder v doen.

b Leuit. 20.a.7. Num. 11.b.18. 1.Sam. 16.a.5.

6

Ende totten Priesteren sprack hy: Draecht de Arcke des Verbonts, ende gaet voor den volcke henen: ^c doe droegen sy de Arcke des Verbonts, ende ghinghen voor den volcke henen.

c Num. 7.a.9.

7

Ende de Heere sprack tot Iosua: ^d Heden wil ick beghinnen dy groot te maken voor het gantsche Israel, dat sy weten, dat ^e gelijck als ick met Mose gheweest ben, also oock met dy sy.

d Iosue 4.b.14.

e Iosue 1.a.5.

8

Ende ghebiet du den Priesteren, die de Arcke des Verbondts draghen, ende segt: Wanneer ghy koemt voor aen int water der Iordanen, so staet stille.

9

Ende Iosua sprack totten kinderen Israels: Herwaerts, ende hoort de woorden des Heeren ws Gods:

B.10

Ende sprack: Daerby sult ghy mercken, dat een leuendich God onder v is, ende dat hy voor v wtdrijuen sal, de Cananiten, Hethiten, Heuiten, Pheresiten, Gergesiten, Amoriten ende Iebusiten.

11

Siet, de Arcke des Verbonts des Heerschers ouer de gantsche Werelt, sal voor v henen gaen in de Iordane.

12

So neemt nu twaelf mannen wt den stammen Israels, wt eenen yeghelicken stamme eenen.

13

Wanneer hen dan de voetsolen der Priesteren, die des Heeren Arcke, des Heerschers ouer de gantsche Werelt draghen, in des Iordaens water laten, so sal hen het water dat van bouen af vliet in der Iordanen af trecken, dat het op eenen hoop staende blijue.

14

^* Doe nu het volck wt tooch wt syne hutten, dat sy ouer de Iordane ghingen, ^f ende de Priesters, die de Arcke des Verbonts voor den volcke henen droeghen,

* Dese geschiedenisse bediedet, dat ons Christus door de Apostelen voorgedragen inden Euangelio, leydet int Hemelrijcke, door de drooge Iordane, die doch op dat mael aent alderuolste was: dat is, de Wet die ons met wercken beangstet ende drijft, houdet op doort Euangelium, dat onse consciencien vrij, vrolick ende seker voor hem zijn, ende alleene Christo inden gelooue volghen.

f Iosue 4.b.18. Act. 7.e.45.

15

Ende aen de Iordane quamen, ende met haren voeten voor int water traden, ^g (ende de Iordane was vol aen alle haren Oeueren, den gantschen tijdt des oogsts.)

g Syrach 24.d.36

16

^h Doe stondt het water, dat van bouen neder quam, opgherichtet in eenen hoop, ^i† gantsch verre van den lieden der stadt, die ter zijden Zarthan leyt: daerentegen het water dat na der Zee af liep ter Soutzee, dat nam af, ende verliep: ^k also ginck het volck henen ouer teghen ^l† Ieriho.

h Psalm. 114.a.3.

i† an. ende swelde gantsch verre van der stadt Adom, die etc.

k Psal. 66.a.6.

l† an. Iericho.

17

Ende de Priesters, die de Arcke des Verbonts des Heeren droeghen, stonden also int drooghe, midden in de Iordane: ende het gantsche Israel ghinck droogh door, tot dat het gantsche volck, alle ouer de Iordane quam.