Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxiiij. Capittel.

1. Mose na dien hy het beloefde lant heeft ghesien, 5. sterft, 6. wordt vanden Heere begrauen, 8. ende van Israel beweent, 9. Iosua koemt na hem ten regimente, 10. Als Mose, staet voortaen geen Propheet meer op.

A.1

ENde ^a Mose ghinck vanden velde der Moabiten opten berch Nebo, ⁺ op de spitze des gheberchts Pisga, teghen Iericho ouer: ^* ende de Heere wees hem het gantsche lant tot Dan toe:

a Num. 27.b.12. Deut. 3.c.27.

+ Mose siet het beloefde lant, maer en mach daer niet in.

* 2.Mach. 2.a.4.

2

Ende het gantsche Naphthali, ende het lant Ephraim ende Manasse: ende het gantsche lant Iuda tot aen de wterste Zee:

3

Ende teghent Suyden, ende de contreyen der breedde Ieriho, der Palmenstadt tot Zoar toe.

4

Ende de Heere sprac tot hem: ^b Dit is het lant, dat ick Abraham, Isaac, ende Iacob ghesworen hebbe, ende gheseydt: Ick wil dat dynen zade gheuen: du hebst het met dynen oogen ghesien, ^c doch du salt niet ouer gaen.

b Gen. 12.a.7. ende 13.b.15. ende 15.b.18. ende 26.a.4.

c Num. 20.b.17. Deut. 31.a.3.

5

Also sterf Mose de knecht des Heeren aldaer inden lande der Moabiten, ⁺ na den woorde des Heeren.

+ Mose sterft.

6

^d Ende hy begroef hem in den dale inden lande der Moabiten, teghen den huyse Peor, ende niemant en heeft zijn graf vernomen tot op desen huydigen dach.

d Iude a.9.

7

^e Ende Mose was hondert ende twintich Iaer oudt, doe hy sterf: ⁺ syne ooghen waren niet doncker gheworden, ende syne kracht was niet veruallen.

e Deut. 31.a.2.

+ Mose heeft 120. Iaer gheleeft.

8

^f Ende de kinderen Israels beweenden Mose inden velde der Moabiten, dertich dagen, ⁺ ende de dagen des weenens ende klagens ouer Mose, werden voleyndt.

f Num. 20.c.29.

+ Iosua koemt na Mose totten regimente.

9

Iosua de sone Nun wert veruult metten Geest der wijsheyt: ^g want Mose hadde syne handen op hem gheleyt: ende de kinderen Israels hoorden hem, ende deden als de Heere Mose geboden hadde.

g Num. 27.c.23. Act. 6.a.6. ende 13.a.3. 1.Tim. 4.b.14. ende 5.c.22.

B.10

^h Ende daer stondt namaels gheen Propheet in Israel op, als Mose, dien de Heere gekent hadde van aenghesichte ^i†,

h Deut. 18.b.18.

i† and. tot aengesichte,

11

Tot allerley teeckenen ende wonderen, daer hem de Heere toe sandt, dat hyse dede in Egypten lant, aen Pharao ende allen synen knechten, ende aen allen synen lande:

12

Ende tot aller deser machtiger hant, ende groote ^k† ghesichten, die Mose dede, voor de oogen des gantschen Israels.

k† an. schricken.