Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxx. Capittel.

1. Barmherticheydt, 6. besnijdinghe des herten, 9. daertoe allerley seghen ende voorspoet, wort toegheseyt dien, die hen tot God bekeeren, 17. verderf daerentegen, die hen van hem afwenden, 15. Mose betuycht den volcke, hy hebbe hen leuen ende segen, doot ende vloeck voorgheleyt, 19. ende vermaentse met heftighe woorden, sy en willen gheen voor desen verkiesen.

A.1

VVanneer nu ouer dy koemt dit alles, ^{+ a} het zy den seghen ofte den vloeck, die ick dy voorgheleyt hebbe, ende in dijn herte gaest, waer du onder den Heydenen bist, daer dy de Heere dijn God henen verstooten heeft,

+ Barmherticheyt wort toegheseyt dien, die hen bekeeren.

a 1.Reg. 8.d.33. 2.Para. 33.b.12. Psalm. 106.e.45.

2

Ende bekeerest dy totten Heere dynen God, dat du syner stemme hoorest, du ende dyne kinderen van gantscher herten, ende van gantscher zielen, in allen dat ick dy heden ghebiede:

3

^b So sal de Heere dijn God dijn gheuanckenisse wenden, ende hem dyner ontfermen, ende sal dy weder vergaderen wt allen volcken, daer dy de Heere dijn God verstroyt heeft.

b Iere. 32.d.37. 2.Mach. 1.c.29 ende 2.b.18.

4

Wanneer du tot aen der Hemelen eynde verstooten warest, so sal dy doch de Heere dijn God, van daer vergaderen, ende dy van daer halen.

5

Ende sal dy in het lant brengen, dat dyne vaders beseten hebben, ende salt het innemen, ende sal dy wel doen, ende dy vermeerderen bouen dyne vaders.

6

^c Ende de Heere dijn God sal dijn herte besnijden, ⁺ ende het herte dijns zaets, dat du den Heere dynen God lief hebbest, van gantscher herten, ende van gantscher zielen, op dat du leuen moechst.

c Deut. 10.b.16. Ierem. 4.a.4. Rom. 2.c.29. Philip. 3.a.3. Coloss. 2.b.11.

+ De geestelicke Besnijdinghe.

7

Daerenteghen dese vloecken sal de Heere dijn God, alle op dyne vianden leggen, ende op die, die dy haten ende veruolghen.

8

Du dan salt dy bekeeren, ende de stemme des Heeren hooren, dat du doest alle syne geboden, die ick dy heden ghebiede.

9

Ende de Heere dijn God, sal dy gheluck gheuen in alle wercken dyner handen, aen de vrucht dijns lichaems, aen de vrucht dijns vees, aen de vrucht dijns landts, dat het ^d dy te goede kome: ^e want de Heere sal hem keeren, dat hy hem ouer dy verblijde, dy te goede, als hy hem ouer dynen vaderen verblijdt heeft:

d Want de Godloosen hebben ooc wel eere ende goet, ende dickwils meer als de heylighen, maer tot haren ende der anderen verderue.

e Ierem. 31.c.28. ende 32.e.41. Sach. 8.b.14.

B.10

Daerom dat du de stemme des Heeren dijns Gods hoorest, te houden syne gheboden ende rechten, die gheschreuen staen inden boeck deser Wet, so du dy salt bekeeren, totten Heere dynen God, van gantscher herten, ende van gantscher zielen.

11

Want dat ghebot, dat ick dy heden ghebiede, is dy niet verborghen, noch te verre:

12

Noch inden Hemel, dat du mochtest seggen: ^f Wie wil ons inden Hemel varen, ende ons halen, dat wy het hooren ende doen?

f Rom. 10.a.6.

13

Het en is oock niet op ghene zijde der Zee, dat du mochtest segghen: Wie wil ons ouer de Zee varen, ende ons halen, dat wy het hooren ende doen?

14

Want het woort is vast na by dy, in dynen mont ende in dyner herten, dat du het doest.

15

^g Siet, ick heb dy heden voor geleyt, het leuen ende het goet, den doot ende het quade,

g Deut. 11.c.27. Ierem. 21.a.8.

16

Die ick dy heden ghebiede, dat du den Heere dynen God lief hebst, ende wandelst in syne weghen, ende syne gheboden, wetten ende rechten houdest, ende leuen moechst, ende vermeerdert wordest, ende dy de Heere dijn God seghene in den lande daer du in treckst, dat selue in te nemen.

17

Keerstu daerenteghen dijn herte, ende hoorst niet, maer laetst dy verleyden, dat du andere Goden aenbiddest, ende hen dienst,

18

So verkondige ick v heden, dat ghy omkomen sult, ende niet langhe in den lande blijuen, daer du henen treckst ouer de Iordane, dat selue in te nemen.

19

^h Ick neme Hemel ende Aerde heden ouer v tot ghetuyghen, ick hebbe v het leuen ende den doot, den seghen ende vloeck, voorgheleydt, dat du het leuen verkiesest, ende du ende dijn zaet leuen moechst:

h Deut. 4.c.26. ende 31.c.28.

20

Dat ghy den Heere uwen God lief hebbet, ende syner stemme hoort, ende hem aenhangt: want ^i† dat is dijn leuen, ende dynen langen ouderdom, dat du in den lande woonest, dat de Heere dynen vaderen Abraham, Isaac ende Iacob ghesworen heeft, hen te gheuen.

i† and. hy