Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 68v]

Dat xxvij. Capittel.

1. Steenen salmen aen ghene zijde der Iordanen oprichten. 3. ende daerop de gheboden des Heeren schrijuen, 12. Grisim eenen berch te segenen, 13. ende Ebal eenen berch te veruloecken.

A.1

ENde Mose gheboot met tsamen den Oudtsten Israels, ⁺ den volcke, ende sprack: Behoudt alle gheboden, die ick v heden ghebiede.

+ Groote ghedencksteenen op den berch Ebal.

2

^a Ende te dier tijt als ghy ouer de Iordane gaet, int lant dat dy de Heere dijn God gheuen sal, so saltu groote steenen oprichten, ende haer met kalck bestrijcken,

a Iosue 4.a.2.

3

Ende daerop schrijuen alle woorden deser Wet, wanneer du ouer koemst: op dat du komest int lant dat dy de Heere dijn God gheuen sal, een lant, daer melck ende honich in vloeyt, als dy de Heere dyner vaderen God gheseyt heeft.

4

Wanneer ghy nu ouer de Iordane gaet, so sult ghy sulcke steenen oprichten (daer ick v heden van ghebiede) op den berghe Ebal, ende met kalck bestrijcken.

5

^b Ende salt aldaer den Heere dynen God, eenen steenen Altaer bouwen, daer gheen ijser op en koemt.

b Iosue 8.d.30.

6

^c Van heelen steenen saltu desen Altaer, den Heere dynen God bouwen, ende brandoffer daer op offeren den Heere dynen God.

c Exodi. 20.c.25.

7

Ende salt danckoffer offeren, ende aldaer eten, ende vrolick zijn voor den Heere dynen God.

8

Ende salt op de steenen alle woorden deses Wets schrijuen, klaer ende duydelick.

9

Ende Mose met tsamen den Priesteren ende Leuiten, spraken met den gantschen Israel, ende seyden: Merckt ende hoort toe Israel: Heden op desen dach, bistu een volck gheworden des Heeren dijns Gods.

B.10

Dat du der stemme des Heeren dijns Gods ghehoorsaem zijst, ende doest na syne gheboden ende rechten, die ick dy heden ghebiede.

11

^d Ende Mose gheboot den volcke desseluen daechs, ende seyde:

d Deuter. 11.c.29. Iosue 8.d.33.

12

Dese sullen staen op den berch Grisim, ⁺ te seghenen het volck, wanneer ghy ouer de Iordane ghegaen zijt: Simeon, Leui, Iuda, Isaschar, Ioseph, ende BenIamin.

+ Grisim, eenen berch te ghebenedijden, ende Ebal te vermaledijden.

13

Ende dese sullen staen by den berch Ebal, ⁺ te vloecken, Ruben, Gad, Asser, Sebulon, Dan ende Naphthali,

+ Vermaledijdinghe der ouertreders des Wets.

14

Ende de Leuiten sullen beghinnen, ende seggen tot alle man van Israel met luyder stemmen:

15

^e Veruloeckt zy, wie eenen Afgod oft ghegoten beelt maect, eenen grouwel des Heeren, een werck des werckmeesters hant, ende settet verborghen: ende alle het volck sal antwoorden ende segghen: Amen.

e Exod. 20.a.4. Leuitici. 26.a.1. Esaie 57.a.8. Danie. 9.b.12.

16

^f Veruloeckt zy, wie synen vader oft moeder vloeckt: ende alle het volck sal segghen: Amen.

f Exod. 21.b.17. Leuitic. 20.a.9. Prouer. 20.c.20. Matth. 15..a.5.

17

^g Veruloect zy, wie zijns naesten palen enger maeckt: ende alle het volck sal segghen: Amen.

g Deute. 19.b.14.

18

^h Veruloeckt zy, ⁺ wie eenen blinden dwalen maeckt op den wech: ende alle het volck sal segghen: Amen.

h Leuitic. 19.b.14.

+ Blinden verdwalen.

19

ⁱ Veruloeckt zy, ⁺ wie het recht des vreemdelincx, des weesen, ende weduwen buycht: ende alle het volck sal segghen: Amen.

i Deuter. 24.b.17.

+ Recht richten. Verboden graden.

C.20

^k Veruloect zy, wie by zijns vaders wijf leyt, dat hy ontdeckt ^l† het decksel zijns vaders: ende alle het volck sal segghen: Amen.

k Leuitic. 18.a.8. Deuter. 22.d.30.

l† And. den geeren

21

^m Veruloeckt zy, wie erghens by een vee leyt: ende alle het volck sal segghen: Amen.

m Exod. 22.b.19. Leuit. 18.c.23. ende 20.b.15.

22

ⁿ Veruloeckt zy, wie by syner suster leyt, die zijns vaders oft zijns moeders dochter is: ende alle het volck sal segghen: Amen.

n Leuit. 18.a.9. 2.Sam. 13..b.14.

23

^o Veruloeckt zy, wie by zijn sweerinne leyt: ende alle het volck sal segghen: Amen.

o Leui. 18.a.6.b.15.

24

^p Veruloeckt zy, ⁺ wie synen naesten heymelicken slaet: ende alle het volck sal segghen: Amen.

p Exod 21.b.12. Leuitic. 24.b.17. Deuter. 19.b.11.

+ Sluypslagen.

25

^q Veruloeckt zy, wie gheschencken neemt, dat hy de ziele des onschuldigen bloets sla: ende alle het volck sal segghen: Amen. ⁺

q Hesek. 22.b.12. Deuter. 16.b.19.

+ Gheschencken.

26

^r Veruloeckt zy, wie niet alle woorden deser Wet veruult, dat hy daer na doe: ende alle het volck sal segghen: Amen.

r Galat. 3.b.10.