Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxv. Capittel.

1. De boose salmen richtelick ende met billicheyt straffen, 4. ende den arbeyder zijn voeder niet ontwenden, 5. broeder sal den broeder zaet verwecken, 11. ende een onbeschaemt wijf haerder onbeschaemtheyt straffe draghen, 13. onrechten handel ende koopmanschap wort verboden, 17. ende datse de Amalekiters vernielen souden, gheboden.

A.1

VVanneer daer eenen ^a twist is tusschen mannen, so salmense voort gherichte brenghen, ende den gherechten recht spreken, ende den godloosen verdoemen.

a 1.Corint. 6.a.1.

2

Ende so de godloose slaghen verdient heeft, so sal hem de Richter heeten nederuallen, ende sullen hem voor hem slaen na der mate ende ghetale syner misdaet. ⁺

+ Veertich slaghen.

3

^b Wanneermen hem veertich slaghen ghegeuen heeft, so en salmen niet meer slaen: op dat hy niet, somen meer slaghen gheeft, te vele gheslaghen en worde, ende dijn broeder ^c† eysselick voor dynen ooghen en zy.

b 2.Corin. 11.c.24

c† And. Schuyslick, oft snoode

4

^d Du salt den osse den mont niet toebinden, die daer dorscht. ⁺

d 1.Corint. 9.a.9.

+ Gheeft den arbeyder zijn voeder.

[fol. 68r]

5

^e Wanneer broeders by malcanderen woonen, ende de eene sterft zonder kinderen, so sal dat wijf des verstoruenen, gheenen vreemden man daerbuyten nemen, maer haer swagher salse beslapen, ende ten wijue nemen, ende haer ^f† trouwen:

e Gene. 38.a.8. Ruth 4.a.5.b.10. Matth. 22.c.24. Marc. 12.b.19. Luce. 20.c.28.

f† And. vermaechschappen, of beurienden.

6

Ende den eersten sone dien sy baert, sal hy ^g bestedigen na den name zijns verstoruen broeders, dat synen naem niet wtghedaen en worde wt Israel.

g Of, in stede setten. And. oprichten

7

Beualt het nu den man niet, dat hy zijn swagherinne neme, so sal sy, zijn swagherinne, opwaerts gaen, onder de poorte voor de Oudtsten, ende segghen: Mijn swagher weyghert hem synen broeder eenen naem te verwecken in Israel, ende en wil my niet te houwelick nemen.

8

So sullen hem de Oudtsten der stadt roepen, ende met hem spreken: Wanneer hy dan staet, ende seyt: Het en beualt my niet haer te nemen:

9

So sal zijn swagherinne tot hem treden, voor de Oudtsten, ende hem eenen schoen wttrecken van synen voeten, ende in zijn aensicht spouwen, ende sal andtwoorden, ende segghen: Also salmen doen eenen yeghelicken, die zijns broeders huys niet bouwen en wil.

B.10

Ende synen naem sal in Israel heeten, des Baruoeten huys.

11

Wanneer twee mannen met malcanderen twisten, ende des eenen wijf loopt toe, dat sy haren man verlosse vander hant des ghenen die hem slaet, ende steect haer hant wt, ende grijpt hem by zijnder schamelheyt:

12

So saltu haer de hant af houwen, ende dijn ooghe en sal haerder niet verschoonen.

13

^h Du en salt niet tweerley gewichte in dynen sack, ⁺ groot ende kleyn hebben.

h Leuit. 19.b.35. Hesek. 45.a.9. Mich. 6.b.10. Prouerb. 1.a.1.

+ Onrechten handel ende koopmanschap wort hier verboden.

14

Ende in dynen huyse en sal niet tweederley ^i† schepel, groot ende kleyn zijn.

i† And. Epha. Epha is by den Hebreischen een seker mate dorrer dinghen, veruaet so veel alsmen met eenen holen eye op 430. mael soude mogen opmeten.

15

Du salt een volkomen ende recht ghewicht, ende eenen volkomen ende rechten schepel hebben: op dat dijn leuen langhe duere, inden lande dat dy de Heere dijn God gheuen sal.

16

Want wie sulcx doet, die is den Heere dynen God eenen grouwel, als alle die, die quaet doen.

17

^k Ghedenct wat dy de Amalekiters deden op den wech, doe ghy wt Egypten toocht: ⁺

k Exod. 17.a..8.

+ Tegen de Amalekiten.

18

Hoe sy dy aengrepen op den wech, ende sloeghen dyne achtersten, alle de swacken die dy achter na toghen, doe du moede ende mat warest, ^l ende en vreesden God niet.

l Te weten, de Amalekiters.

19

Wanneer dy nu de Heere dijn God tot ruste brengt, van alle dijn vyanden rontom, inden lande dat dy de Heere dijn God gheeft ten erue in te nemen, ^m so saltu de ghedachtenisse der Amalekiters wtroeyen onder den hemel: dat en vergheet niet:

m 1.Sam. 14.e 48. ende 15.a.3.