Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvi. Capittel.

1. Uanden dryen voornemelicken Feesten der Ioden, Paschen, 9. Pingsten, 13. ende Loofhuttenfeest, 16. die yeghelick manlick Iaerlicx ende met gauen sal houden, 18. vanden ampte der rechten Richters, 21. ende vermijden aller Afgoderije.

A.1

HOudt de maent ^a Abib, ⁺ dat du ^b Paschen houdest den Heere dynen God: want in der maent Abib, heeft dy de Heere dijn God wt Egypten gheleydt by der nacht.

a Abib is de maent die wy April heeten, want de Hebreen beghinnen haer nieuwe iaer na de natuere, wanneer alle dinc weder nieu groent ende wast, ende hem bezadet: daerom heet zy oock de maent der nieuwer vruchten, dat dan alle dinck nieu wordet.

+ Paschen.

b Exod. 12.a.3. ende 23.b.15. ende 34.b.18. Leuit. 23.a.5. Nume. 9.a.2. ende 28.b.16.

2

Ende salt den Heere dynen God het Passah slachten, schapen ende runderen, ^c aen der stede die de Heere verkiesen sal, dat synen Naem aldaer woone.

c Deuter. 12.a.6. ende 14.c.23. ende 15.c.20.

3

Du en salt niets gheheuelts op dat Feest eten: seuen daghen saltu ongheheuelt broot der ellenden eten: want met ^d† vreesen bistu wt Egyptenlant ghetoghen, op dat du dies daechs dijns wtgancx wt Egypten lant, gedenckest dijn leefdage.

d† And. haeste

4

Daer en sal in seuen daghen niet gheheuelts ghesien worden in alle dyne lantplane, ende sal oock niets van vleessche, dat des auonts aenden eersten dage gheslachtet is, den nacht ouer blijuen tot aenden morghen.

5

Du kanst het Passah niet slachten in eenighe van dyne poorten, die dy de Heere dijn God ghegheuen heeft:

6

^e Maer inder stede, die de Heere dijn God verkiesen sal, dat synen Naem ^f aldaer woone, daer saltu het Passah slachten, des auonts wanneer de Sonne is onderghegaen, tot der tijt, als du wt Egypten toghest.

e 2.Paral. 35.a.1.

f 1.Reg. 8.c.29.

7

Ende salt het koken, ende eten inder stede, die de Heere dijn God verkiesen sal, ende dy daer na keeren des morgens, ende te huys gaen in dyne hutten.

8

Ses daghen saltu des ongeheuelden eten, ende aenden seuenden dage is de vergaderinge des Heeren dijns Gods, so en saltu gheen arbeyt doen.

9

^g Seuen weken saltu dy tellen, ⁺ ende beginnen te tellen, wanneermen begint met de sickel int ^h zaet.

g Leuit. 23.b.15.

+ Pingsten.

h Of, gezaeytsel

B.10

Ende salt houden ⁱ het Feest der weken den Heere dynen God, dat du een vrijwillighe gaue dyner hant gheuest, na dien dy de Heere dijn God gheseghent heeft.

i Actuum 2.a.1.

11

Ende salt vrolick zijn voor God dynen Heere, du ende dijn sone, dijn dochter, dijn knecht, dyne maecht, ende de Leuijt die in dyner poorten is, de vreemdelinck, de weesen ende weduwen, die onder dy zijn, aen de stede, die de Heere dijn God verkoren heeft, dat synen Naem daer woone.

12

Ende ghedenckt dat du een knecht in Egypten gheweest bist, dat du houdest ende doest na dese gheboden.

13

^k Het Feest der loofhutten saltu houden seuen daghen, ⁺ wanneer du hebst ingesamelt van dynen ^l† dorschuloer, ende van dyner wijnperssen.

k Leuit. 23.d.34.

+ Loofhuttenfeest.

l† And. vele.

14

Ende salt vrolick zijn op dijn Feest, du ende dijn sone, dijn dochter, dijn knecht, dijn maecht, de Leuijt, de vreemdelinck, de weese ende de weduwe, die in dyner poorten zijn.

15

^m Seuen daghen saltu den Heere dynen God het Feest houden, in der stede die de Heere verkiesen sal: want de Heere dijn God sal dy seghenen in allen dynen inkomen, ende in allen wercken dyner handen, daerom saltu vrolick zijn.

m 1.Reg. 8.g.65.

16

ⁿ Drymael des Iaers, sal alles wat manlick is, voor den Heere dynen God verschijnen, aen der stede die de Heere verkiesen sal: op het Feest der ongeheuelden brooden, op het Feest der weken, ende op het Feest der loofhutten: ^o maer het en sal niet ijdel voor den Heere verschijnen.

n Exod. 23.b.17. ende 34.c.23. Leuitic. 23.a.4.

o Exodi. 23.b.15. ende 34.c.20. Syrach 35.a.6.

17

Een yegelick na der gaue zijnder hant, ⁺ na den seghen die dy de Heere dijn God gegeuen heeft.

+ Het ampt der rechten Richteren wort hier beschreuen.

18

^p Richters ende amptlieden saltu dy setten in allen dynen poorten, die dy de Heere dijn God gheuen sal, onder dynen stammen, dat sy het volck richten met rechten gherichte.

p Cap. xvij. na afdeylinge S. Pagnini ende der Duytschen. Exod. 18.c.21. ende 23.a. Leuitic. 29.a.6.

19

^q Du en salt het recht niet buyghen, ende en salt oock gheen persoonen aensien, noch gheschencken nemen: ^r want de gheschencken maken de wijsen blint, ende verkeeren de saken der rechtueerdighen.

q Deute. 24.b.17. 1.Samue. 8.a.3.

r Exod. 23.a.8. Syrach 20.d.31.

C.20

Wat recht is, dat saltu nauolghen, op dat du leuen ende innemen moghest het lant, dat dy de Heere dijn God gheuen sal. ⁺

+ Afgoderije verboden.

21

Du en salt dy ^s† gheene hagen van ^t† boomen planten, by den Altaer des Heeren dijns Gods, den welcken du dy makest.

s† And. geen lustwoudt.

t† And. alderley boomen.

22

^u Du en salt dy gheen calomnen oprichten, die de Heere dijn God hatet.

u 1.Sam. 15.b.12. 2.Sam. 18.b.18.