Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiij. Capittel.

1. Uan straffe dier, die opentlicken, 6 ofte heymelicken de menschen van den warachtighen God af leyden, 12. Item dier, die hen also verleyden laten, 3. God ondertastet ons ghelooue door teeckenen ende wonderen.

A.1

VVanneer ^a een Prophete oft droomer onder v sal opstaen, ende gheeft dy een teecken oft wonder,

a Matth. 7.b.15.

2

Ende dat teecken oft wonder koemt daer hy dy van geseyt heeft, ende spreect: Laet ons ^b ander Goden na volghen, die ghy niet en kent, ende hen dienen:

b Dese Prophete leert teghen de oude ende beuestichde leere, ende wil (ghelijck hy seyt, andere Goden) de eerste niet laten blijuen. Ende sulcken en salmen niet gheloouen, wanneer hy oock teeckenen dede. Maer in het xviii. cap wort die Prophete verdoemt die niet tegen de eerste maer nieuwe leere voorgeeft, ende deselue sal teeckenen doen, oft niet ghehoort worden.

3

So en saltu niet hooren de woorden sulckers Propheten oft droomers: ^c want de Heere uwe God versoect v, dat hy verneme, oft ghy hem van gantscher herten, ende van gantscher zielen lief hebt.

c Deuter. 8.a.2.

4

^d Want ghy sult den Heere uwen God na volghen, ende hem vreesen, ende syne gheboden houden, ende syner stemme hooren, ende hem dienen, ende hem aenhanghen.

d Ioan. 10.a.4. b.14.16.

5

^e Ende de Propheet oft droomer sal steruen, daerom dat hy vanden Heere uwen God (die v wt Egyptenlande geleydt, ende dy vanden diensthuyse verlost heeft) af te vallen gheleert, ende dy wt den weghe gheleydt heeft, dien de Heere dijn God gheboden heeft, daerin te wandelen, op dat du den boosen van dy doest:

e Ierem. 28.b.16. ende 29.d.32.

6

^f Wanneer dy dijn broeder, dyner moeder sone, of dijne dochter, of het wijf in dynen armen, of dijn vrient, die dy is als dijn herte ouerreden sal heymelick, ende segghen: Laet ons gaen, ende ander Goden dienen, die du niet en kent, noch dyne vaders,

f Sach. 13.a.3. Matth. 5.d.30. ende 18.a.8.

7

Die onder de volcken rondtom v zijn, sy zijn dy na by oft verre, van eenen eynde der Aerden tot aen het ander:

8

So en bewillicht niet, ende en hoort hem niet: ^g oock en sal dijn ooghe syner niet verschoonen, ende en salt dy syner niet ^h ontfermen, noch hem verberghen.

g Deuter. 17.a.5.

h Dat heet God bouen alle dinck belieuen.

9

Maer salt hem verworghen: dyne hant sal de eerste ouer hem zijn, datmen hem doode, ende daer na de hant des gantschen volcx.

B.10

Men sal hem doot steenen, want hy heeft dy willen verleyden vanden Heere dynen God, die dy wt Egyptenlant, vanden diensthuyse geleydt heeft.

11

ⁱ Op dattet het gantsche Israel hoore, ende vreese hem, ende niet meer alsulck quaet voorneme onder v.

i Deuter. 19.c.20.

12

Wanneer du hoorest erghens van eener stadt, die dy de Heere dijn God ghegheuen heeft daer in te woonen, datmen seyt:

13

Daer zijn sommighe kinderen Belials wtghegaen onder dy, ende hebben de burghers haerder stadt verleydt, ende gheseyt: Laet ons gaen, ende andere Goden dienen, die ghy niet en kent.

14

^k So saltu neerstelick ondersoecken, ^l vernemen ende vraghen: ende so haer de waerheyt vint, dat het ghewisse also is, dat de grouwel onder v gheschiet is,

k Deuter. 17.a.4. ende 19.b.18.

l Of, nasoecken.

15

So saltu de burgheren derseluer stadt slaen met des sweerts scherpte, ende hen verbannen met al dat daerin is, ende haer vee, met de scherpte des sweerts.

16

Ende alle haren roof saltu vergaderen midden op de strate, ende met vyere verbernen, beyde stadt ende alle haren roof met malcanderen, den Heere dynen God, dat sy op eenen hoop ligghe eewichlick, ende nemmermeer ghebouwet worde.

17

^m Ende en laet niet van dat verbannen aen dyner hant hanghen, op dat de Heere vander grimmigheyt zijns thoorns afgewendet worde, ende gheue dy barmherticheyt, ende ontferme hem dyner, ende vermeerdere dy, als hy dynen vaderen ghesworen heeft:

m Deuter. 7.c.25. Iosue 7.a.1. 2.Mach. 12.e.40.

18

Daerom dat du de stemme des Heeren dijns Gods ghehoort hebst, te houden alle syne gheboden, die ick dy heden gebiede, dat du doest, wat recht is voor de oogen des Heeren dijns Gods.