Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vij. Capittel.

1. Israel en sal gheen verbont met den Heydenen maken, 5. maer sal alle haer afgoderye ende Afgoden kramen te gronde wtroeyen ende verdoen, 9. so wilt de Heere zijn trouwe barmherticheyt, ende menichfuldighen seghen aen hen bewijsen, 22. ende hen het lant allenskens ruymen, 25. Afgodenbeelden salmen met siluer ende gout verbernen, op datmen daer niet in beuanghen en worde.

A.1

VVanneer du de Heere dijn God int lant brengt, ⁺ daer du in komen salt, dat selue in te nemen, ^a ende wtwortelt vele volcken voor dy henen, de Hethiters, Girgositers, Amoriters, Cananiters, Pheresiters, Heuiters, ende Iebusiters, seuen volcken, die grooter ende stercker zijn dan du,

+ Het volc Israel en sal geen verbont met den Heydenen maken

a Deuter. 31.a.3.

2

Ende wanneer de Heere dijn God voor dy gheeft dat duse slaest, so saltuse ^b verbannen, ^c dat du gheen verbont met hen en makest, noch hen gonste en bewijsest,

b Dat is, als een veruloecksel wtroeyen.

c Exodi. 23.d.32. ende 34.b.12. Iosue 23.b.12. 2.Corinth. 6.b.14. Nehem. 13.a.3.

3

Ende du salt met hen gheen vrientschap maken: uwe dochteren en sult ghy haren sonen niet gheuen, ende hare dochteren en sult ghy uwen sonen niet nemen.

4

^d Want sy sullen uwe sonen my afuallich maken, dat sy anderen Goden dienen: so sal dan des Heeren toorn vergrimmen ouer v, ende v haestelick vernielen.

d Als de Moabitische vrouwen deden. Num. 25.a.2.

5

^e Maer also sult ghy met hen doen: hare Altaren sult ghy verscheuren, hare ^f calumnen breken, hare haghen afhouwen, ende haer Afgoden met vyere verbernen.

e Exodi. 34.b.13. Nume. 33.f.51.

f Of, pilaerstijlen breken, haer lustwouden, etc.

6

^g Want du bist een heylich volck den Heere dijnen Gode: ^h dy heeft de Heere dijn God verkoren, ten volcke des eygendoms, wt allen volcken die op Aerden zijn.

g Deute. 14.a.2. ende 26.b.18. 1Petri 2.a.9.

h Exod. 19.a.4.

7

Niet heeft v de Heere aenghenomen ende v verkoren, dat uwer meer ware dan alle volcken, want du bist het ⁱ weynichste onder allen volcken:

i Of, slechtste,

8

Maer dat hy v lief gehadt heeft, ende dat hy synen eedt hielde, ^k dien hy uwen vaderen ghesworen heeft, daerom heeft hy v wtgheleydt met machtigher hant, ende heeft dy verlost vanden huyse des diensts, wt der hant Pharao des Konincx in Egypten.

k Gene. 22.b.16.

9

^l So saltu nu weten, dat de Heere dijn God, een God is, een trouwe God, die het verbondt ende barmherticheyt houdt dien, die hem lief hebben, ende syne gheboden houden, in duysent leden:

l Exod. 20.a.5. ende 34.a.6. Deutero. 4.d.39. Ierem. 32.b.18.

B.10

Ende betaelt dien, die hem haten, voor synen aenghesichte, dat hyse ombrenge: ende en versuymt niet, dat hy dien verghelde voor synen aenghesichte, die hem haten.

11

So behoudt nu de gheboden ende wetten, ende rechten die ick dy heden ghebiede, dat du daer na doest.

12

^m Ende wanneer ghy dese rechten hoort, ende houdtse, ende daer na doet, so sal de Heere dijn God oock houden het verbondt ende barmherticheyt, die hy dynen vaderen ghesworen heeft,

m Exo 23.c.22.c.25 Leuit. 26.a.4. Deuteron. 28.a.1.

13

Ende sal du lief hebben, ende seghenen, ende

[fol. 62r]

vermeerderen: en sal de vrucht dijns lijfs seghenen, ende de vrucht dijns lants, dijn koorn, most ende olye: de vrucht dijner koeyen, ende de vrucht dyner schapen, op den lande dat hy dynen vaderen ghesworen heeft, dy te geuen.

14

Gheseghent saltu zijn bouen allen volcken: ⁿ daer en sal niemant onder dy onuruchtbaer zijn, noch onder dynen vee.

n Exod. 23.c.26.

15

De Heere sal van dy nemen alle kranckheyt, ende en sal dy gheen quade sieckte der Egyptenaren oplegghen, ^o die du beuonden hebst, ende salse alle dynen haters oplegghen.

o Exod. 5.a.3.

16

Du salt alle volcken verslinden, die dy de Heere dijn God gheuen sal: du en salt haerder niet verschoonen, ende haren Goden niet dienen: want dat soude dy een strick zijn.

17

Ist dat ghy dannoch salt in dyner herten segghen: Deses volcx is meer dan ick ben: hoe kan ickse verdrijuen?

18

^p So en vreest dy niet voor hen: gedenckt wat de Heere dijn God Pharao, ende allen Egyptenaren ghedaen heeft,

p Deuter. 20.a.1. Iosue. 8.a.1.

19

Door groote versoeckinghen, die du met dynen ooghen ghesien hebst, ende door teeckenen ende wonder, door een machtige hant ende wtgherecten am, daer dy de Heere dijn God mede wtleydde: also sal de Heere dijn God allen volcken doen, daer du dy voor vreest.

C.20

^q Daertoe sal de Heere dijn God horselen onder hen senden, tot dat het verdaen worde, wat daer ouer is, ende hem verborghet voor dy.

q Exod. 23.c.28. ende 33.a.2. Iosue 24.b.12.

21

^r Laet dy niet grouwelen voor hen, want de Heere dijn God is onder dy, de groote ende verschrickelicke God.

r Exod. 23.c.20. ende 33.a.2.

22

Hy de Heere dijn God sal dese lieden wtroeyen voor dy, eenen na den anderen: ^s du kanstse niet haestelick te niete doen, op dat hen de dieren op den velde teghen dy niet en vermeerderen.

s Exod. 23.c.29. Iosue 11.b.18.

23

De Heere dijn God salse voor dy gheuen, ende salse met groote slaghen verslaen, tot dat hyse verniele.

24

Ende sal dy hare Koninghen in dyne handen gheuen, ende salt haren name te niete doen onder den Hemel: niemandt en sal dy wederstaen, tot dat duse vernielest.

25

De beelden haerder Goden saltu met vyere verbernen, ^t ende en salt niet begheeren des siluers oft gouts, dat daer aen is, ^u oft tot dy nemen, dat du daer niet in en verstrickest: want sulcks is den Heere dynen God eenen grouwel.

t Deuter. 13.b.17.

u Iosue 6.b.18. ende 7.a.1. 2.Macha. 12.e.40.

26

Daerom en saltu den grouwel in dijn huys niet brenghen, dat du niet verbannet wordest, als dat selue is: maer du salt een walghinghe ende grouwel daeraen hebben, want het is verbannen.