Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 61v]

Dat vi. Capittel.

1. Ghelijck voor int iiij. Capittel een wtlegghinghe is des anderen ghebots, so is hier des eersten, 16. God en salmen niet versoecken, 20. de kinderen salmen in synen gheboden onderrichten.

A.1

DIt zijn dan de Wetten ende ^a gheboden ende rechten, die de Heere uwe God gheboden heeft, dat ghyse leeren ende doen sult inden lande, daer ghy henen treckt, dat selue in te nemen.

a Deutero. 4.a.5. ende 5.d.31.

2

^b Dat du den Heere dynen God vreesest, ende houdest alle syne rechten ende gheboden, die ick dy ghebiede: du ende dyne kinderen ende dyne kints kinderen, alle v leefdaghe, op dat ghy langhe leuet.

b Deuter. 10.b.12.

3

Israel du salt hooren ende behouden, dat du het doest, dat het dy wel ga, ende seer vermeerdert wordest, als dy de Heere dyner vaderen God ghesproken heeft, een lant daer honich ende melck in vloeyt.

4

Hoort Israel, ^c de Heere onse God, is een eenich Heere.

c Deute. 4.d.35. ende 10.b.17.

5

^d Ende du salt den Heere dynen God lief hebben, van gantscher herten, van gantscher zielen, van alle vermoghen.

d Matth. 22.d.37. Marci. 12.c.29. Luce 10.c.27. Deutero. 10.b.12. ende 30.a.6.

6

^e Ende dese woorden, die ick dy heden ghebiede, saltu ter herten nemen,

e Deuter. 11.b.18. ende 32.e.46. Nume. 15.e.40.

7

Ende saltse dynen kinderen ^f scherpen, ende daer van spreken, wanneer du in dynen huyse sittest, oft op den weghe gaest, wanneer du dy neder legst ofte opstaest. ^†

f Dat is, meer ende meer drijuen ende oeffenen dat sy niet en verroesten noch en verdonckeren, maer altijt in gedachtenisse ende woorden, als nieuwe ende klaer blijuen: want somen Gods woort meer handelt, hoe klaerder ende nieuwer het wordt, ende heet billick, hoe langer hoe lieuer: waer men het niet en prijst, so wordt het haest vergeten, ende onkrachtich, etc.

† and. inscherpen.

8

Ende saltse binden ten teecken op dyne hant, ende sullen dy een denckteecken zijn voor dynen ooghen.

9

Ende saltse op dijns huys posten schrijuen, ende aen de poorten.

B.10

^g Wanneer dy nu de Heere dijn God in het lant brenghen sal, dat hy dynen vaderen Abraham, Isaac ende Iacob ghesworen heeft, dy te gheuen, groote ende fijne steden, die du niet ghebout en hebst,

g Iosue. 24.b.13.

11

Ende huysen alles goets vol, die du niet gheuult en hebst, ende wtghehouwen bornputten, die du niet wtghehouwen en hebst, ende wijnberghen ende olyberghen, die du niet gheplant en hebst, dat du etest, ende sat wordest,

12

So hoedt dy, ⁺ dat du des Heeren niet en verghetest, ^h die dy wt Egypten lande, wt den diensthuyse, gheleydt heeft.

+ Afgoderie verboden.

h Deuter. 4.c.20.

13

ⁱ Maer salt den Heere dynen God vreesen, ende hem dienen, ^k ende by sijnen name sweeren.

i Deuter. 10.c.20.

k Esaie 45.c.23. 65.b.15. Ierem. 4.a.2. 1.Samue. 7.a.3. Matth. 4.b.10. Luce 4.a.8.

14

^l Ende en salt ander Goden niet nauolghen, der volcken die rontom v zijn:

l Exod. 32.c.26.

15

Want de Heere dijn God is een ijuerig God onder dy: dat den toorn des Heeren dijns Gods, ouer dy niet en vergrimme, ende verdoe dy van der Aerden. ⁺

+ God salmen niet versoecken.

16

^m Ghy en sult den Heere uwen God niet versoecken, ⁿ als ghy hem versocht te Massa:

m Matth. 4.a.7. Luce 4.b.12.

n Exodi. 17.a.2. Num. 20.a.4. b.13 ende 21.a.5.

17

Maer sult houden de gheboden des Heeren ws Gods, ende syne ghetuyghenissen, ende syne rechten die hy gheboden heeft,

18

Dat du doest, wat recht ende goet is, voor den ooghen des Heeren: op dat het dy wel gae, ende ingaest ende inneemst dat goede lant, dat de Heere ghesworen heeft dynen vaderen.

19

Dat hy veriaghe alle dyne vyanden voor dy, als de Heere ghesproken heeft.

C.20

^o Wanneer nu dijn sone heden oft morghen vraghen sal, ⁺ ende segghen: Wat zijn dat voor ghetuyghenissen, gheboden ende rechten, die v de Heere onse God gheboden heeft?

o Deuter. 4.a.9.

+ De Ioden souden hare kinderen in Gods geboden onderrichten.

21

So saltu dynen sone segghen: Wy waren des Pharaos knechten in Egypten, ende de Heere leydde ons wt Egypten met machtigher hant.

22

Ende de Heere dede groote ende quade teeckenen ende wonder ouer Egypten ende Pharao, ende alle synen huyse, voor onsen ooghen.

23

Ende leydde ons van daer, op dat hy ons inleydde, ende geue ons het lant, dat hy onsen vaderen ghesworen hadde.

24

Ende de Heere heeft ons gheboden te doen na alle dese rechten, dat wy den Heere onsen God vreesen: op dat het ons wel ga alle onse leuedaghe, als het gaet hedens daechs.

25

Ende het sal onse gerechticheyt zijn voor den Heere onsen God, so wy houden ende doen alle dese gheboden, als hy ons gheboden heeft.