Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxvi. Capittel.

1. Wt oorsake der dochteren Zelaphehad, 6. werdt een wet ghegheuen, dat een yeghelick, het zy vrouwe ofte man, een gade zijns stams ten houwelicke neme, 7. op dat het erfdeel der stammen niet vermengt noch verandert worden.

A.1

ENde de ouerste vaders der geslachten der kinderen Gilead, des soons Machir, die Manasses soon was, vanden gheslachte der kinderen Iosephs, traden toe, ende spraken voor Mose, ende voor den Vorsten, den ouersten vaderen der kinderen Israels, ende seyden:

2

Lieue heer, ^a de Heere heeft geboden, datmen het lant ten erfdeele gheuen soude, door het lott den kinderen Israels, ^b ende du mijn heere hebst geboden door den Heere, datmen het erfdeel Zelaphehad onses broeders synen dochteren gheuen sal.

a Num. 26.f.53.

b Num. 27.a.6. Iosue 15.b.18. ende 17.a.4.

3

Wanneerse yemant wt den stammen Israels ten wijue neemt, so sal onses vaders erfdeel weynigher worden, ende so veel als sy hebben, sal totten erfdeele komen des stams, daer sy henen komen: also wort het lot onses erfdeels ghemindert.

4

Wanneer nu dan het Luydtiaer der kinderen Israels koemt, so sal haer erfdeel totten erfdeele des stams komen, daer sy zijn: also wordt onses vaders erfdeel vermindert, so veel als sy hebben.

5

Mose gheboot den kinderen Israels, na den beuele des Heeren, ende sprack: Den stamme der kinderen Iosephs heeft recht ghesproken.

6

Dat is het dat de Heere ghebiet den dochteren Zelaphehad, ende seyt: ^c Laetse ^d† trouwen, wie het hen beualt, alleen dat sy trouwen onder den gheslachte des stams haers vaders.

c Tob. 1.a.9. ende 7.b.15. 1.Corin. 7.d.39.

d† of ten houwelicke nemen, an. mannen.

7

Op dat het erfdeel der kinderen Israels niet en valle van eenen stamme ten anderen: want een yegelick onder den kinderen Israels sal aenhanghen aen de erue des stams zijns vaders.

8

Ende alle dochteren die erfdeel besitten onder den stammen der kinderen Israels, sullen trouwen eenen vanden geslachte des stams haers vaders: ^e op dat een yeghelick onder den kinderen Israels, zijns vaders erue behoude,

e Leuit. 25.c.25. Iere. 32.a.7. Ruth. 4.a.3.

9

Ende gheen erfdeel van eenen stamme en valle op den anderen: maer een yeghelick hanghe aen zijn erue onder den stammen der kinderen Israels.

B.10

Als de Heere Mose gheboden hadde, so deden de dochteren Zelaphehads,

11

Mahela, Thirsa, Hagla, Milca ende Noa, ende trouden de kinderen haerder Oomen,

12

Des gheslachts der kinderen Manasse, des soons Ioseph: also bleef haer erfdeel aen den stamme des gheslachts haers vaders.

13

Dat zijn de geboden ende rechten, die de Heere geboot door Mose, den kinderen Israels, aen de Iordane teghen Iericho.

Eynde des vierden Boecks Mose.