Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxiiij. Capittel.

1. De wijdde des beloefden lants wert hier beschreuen, 17. ende de namen der wtdeylers desseluen benoemt.

A.1

ENde de Heere sprack met Mose, ⁺ ende seyde:

+ De wijdde des beloefden lants.

2

Ghebiet den kinderen Israels, ende spreeckt tot hen: Wanneer ghy int lant Canaan koemt, so sal dat lant, dat v ten erfdeele valt, inden lande Canaan syne lantpalen hebben.

3

^a Den hoeck teghent Suyden, sal beginnen aen der woestijne Zin by Edom, dat uwe lantpalen teghent Suyden zy, van het eynde der souter Zee, die teghent Oosten leyt.

a Iosue 15.a.1.

4

Ende dat de selue lantpale haer ^b kromme, van den Suyden op na Akrabbim, ende gae door Zinna, ende haer eynde vanden Suyden tot KadesBarnea toe, ende kromme aen het dorp ^c Adar, ende gae door Azmon:

b of, booghe.

c of. HazarAdar.

[fol. 58r]

5

Ende ^d kromme haer van Azmon aen de beke Egypti, ende haer eynde zy aen de Zee.

d of, booghe.

6

Nu de lantpale teghent Westen sal dese zijn, naemlicken de groote Zee: die zy uwe lantpale teghent Westen.

7

De lantpale tegent Noorden sal dese zijn: ghy sult meten vander groote Zee, aenden Berch Hor,

8

Ende vanden berch Hor meten, tot datmen tot Hemath koemt, dat haren wtganck zy de lantpale Zedada.

9

Ende dier seluer lantpale sal eynden te Siphron, ende haer eynde zy aen ^e† den dorpe Enan: dat zy uwe lantpale teghent Noorden.

e† and. HazarEnan.

B.10

Ende sult v meten de lantpale tegent Oosten vanden Dorpe Enan tot Sepham.

11

Ende de landtpale sal af gaen van Sepham, na Ribla tot Ain van Oostenwaerts, daerna sal sy afgaen, ende haer krommen op de zijden der Zee Cinereth teghent Oosten,

12

Ende sal af komen aen de Iordane, dat haer eynde zy de Soutzee: dat zy uwe lant met synen lantpalen rontom.

13

Ende Mose gheboot den kinderen Israels, ende seyde: Dat is het lant, dat ghy door het lott onder v deylen sult, dat de Heere geboden heeft den negen stammen ende den haluen stamme te gheuen:

14

^f Want den stamme der kinderen Ruben, des huys haerder vaderen, ende den stamme der kinderen Gad, des huys haerder vaderen, ende den haluen stamme Manasse, hebben haer deel ghenomen,

f Num. 32.d.33.

15

Also hebben de twee stammen, ende de halue stamme haer erfdeel wech op dese zijde der Iordanen, teghen Iericho, teghent Oosten.

16

Ende de Heere sprack met Mose, ende seyde:

17

^g Dat zijn de namen der mannen, ⁺ die het lant onder v deylen sullen: de Priester Eleasar ende Iosua de sone Nun.

g Deut. 3.c.28. Iosue 14.a.1. ende 19.b.15.

+ De namen der wtdeylders des lants Canaan.

18

Daertoe sult ghy nemen eens yegelicken stams Vorsten, het lant wt te deylen.

19

Ende dat zijn der mannen namen: Caleb de sone Iephune des stams Iuda.

C.20

Semuel de sone Amihud, des stams Simeon.

21

Elidad de sone ^h† Chischlon, des stams BenIamin.

h† an. Cislon.

22

Buki de sone Iagli, de Vorst des stams der kinderen Dan.

23

Hanniel de sone Ephod, de Vorst des stams der kinderen Manasse, vanden kinderen Ioseph.

24

Kemuel de sone Siphthan, de Vorst des stams der kinderen Ephraim.

25

Elizaphan de sone Parnach, de Vorst des stams der kinderen Sebulon.

26

Palthiel de sone Asan, de Vorst des stams der kinderen Isaschar.

27

Ahihud de sone Selomi, de Vorst des stams der kinderen Asser.

28

Pedahel de sone Ammihud, de Vorst des stams der kinderen Naphthali.

29

Dit zijnse die de Heere gheboot, dat sy den kinderen Israels, het erue wt deylden in den lande Canaan.