Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxij. Capittel.

Ouer de Iordane krijghen met sonderlicker aendringhinghe het lant Gilead, de stamme Gad, Ruben ende de halue stamme Manasse.

[fol. 57r]

A.1

DE kinderen Ruben ende de kinderen Gad hadden seer veel vees, ⁺ ende saghen het lant Iaeser ende Gilead aen, voor bequame plaetsen tot haren vee,

+ Rubeniters, Gadditers, ende den haluen stamme Manasse, bidden om het lant Gilead.

2

Ende quamen ende spraken tot Mose ende den Priester Eleasar, ende totten Vorsten der menichte,

3

Het lant Atrot, Dibon, Iaeser, Nimra, Hesbon, Eleale, Seban, Nebo ende Beon,

4

Dat de Heere gheslaghen heeft voor der menichte Israels, is bequaem ten vee, ende wy dyne knechten hebben vee.

5

Ende spraken voorder: Hebben wy ghenade voor dy geuonden, so geeft dit lant dynen knechten tot eygen, so willen wy niet, ouer de Iordane trecken.

6

Mose sprack tot hen: Vwe broeders sullen in den strijt trecken, ende ghy wilt hier blijuen?

7

Waerom maeckt ghy der kinderen Israels herte wederkeerich, dat sy niet ouer trecken in dat lant dat hen de Heere gheuen sal.

8

^a Also deden uwe vaders ooc, doe ickse wt sandt van KadesBarnea, het lant te besien.

a Num. 13.d.31.

9

Ende doe sy opgekomen waren tot aen de beke Escol, ende saghen het lant, maeckten sy het herte der kinderen Israels wederkeerigh, dat sy niet in het landt en wouden, dat hen de Heere gheuen wilde.

B.10

^b Ende des Heeren toorn vergrimde ter seluer tijt, ende swoer ende seyde:

b Num. 14.c.28. ende 26.g.65. Deut. 2.b.13. Psal. 95.b.11. ende 106.c.26.

11

Dese lieden die wt Egypten ghetoghen zijn, van twintich Iaren ende daer bouen, sullen dat lant niet sien, dat ick Abraham, Isaac ende Iacob gesworen hebbe, daerom dat sy my niet trouwelick nagheuolcht en hebben.

12

Wtghenomen Caleb de sone Iephune des Kenisiters, ende Iosua de sone Nun: want sy hebben den Heere trouwelick nagheuolcht.

13

Also vergrimde des Heeren toorn ouer Israel, ende lietse hier ende daer inder woestijne trecken, veertich Iaer, tot dat een eynde werdt alles des gheslachts, dat quaet ghedaen hadde voor den Heere.

14

Ende siet ghy zijt opghetreden in uwer vaders stede, dat der sondaers dies te meer zijn, ende ghy oock des toorns ende grimmicheydt des Heeren noch meer maeckt teghen Israel.

15

Want so ghy v van hem keert, so sal hyse oock noch langer laten inde woestijne, ende ghy sult dit volck alle verderuen.

16

Doe traden sy toe, ende spraken: Wy willen hier slechts schaephutten bouwen, voor onse vee, ende steden voor onse kinderen.

17

Ende wy willen ons rusten voor aen voor de kinderen Israels, tot dat wijse brengen aen haer plaetse: onse kinderen sullen in de besloten steden blijuen, om der inwoonders wille des lants.

18

Wy willen niet weder te huys keeren, tot dat de kinderen Israels innemen, een yeghelick zijn erue.

19

Want wy en willen niet met hen eruen op gene zijde des Iordaens, maer onse erue sal ons op dese zijde des Iordaens teghent Oosten gheuallen zijn.

C.20

Mose sprack tot hen: ^c Wanneer ghy dat doen wilt, dat ghy v rustet ten strijde voor den Heere,

c Iosue. 1.b.13. ende 4.b.12.

21

So treckt ouer de Iordane voor den Heere, wie onder v gerust is, tot dat hy syne vianden wtdrijue van synen aenghesichte,

22

Ende het lant onderdaen worde voor den Heere: daerna sult ghy om keeren, ende ontschuldich zijn den Heere, ende voor Israel, ende sult dit lant also hebben tot eyghen voor den Heere.

23

So ghy daerentegen so niet doen en wilt, siet, so sult ghy v aen den Heere besondighen, ende sult uwer sonden ghewaer worden, als sy v vinden sal.

24

So bouwet nu steden voor uwen kinderen, ende hutten voor uwe vee, ende doet wat ghy gesproken hebt.

25

De kinderen Gad ende de kinderen Ruben spraken tot Mose: Dyne knechten sullen doen, als mijn heere gheboden heeft.

26

Onse kinderen, vrouwen, haue, ende alle onse vee, sullen in den steden Gilead zijn.

27

Wy daerenteghen dyne knechten, willen alle gherustet ten heyre, inden strijt trecken voor den Heere, als mijn heere ghesproken heeft.

28

^d Doe geboot Mose haerenthaluen den Priester Eleasar, ende Iosua den sone Nun, ende den Ouersten vaderen der stammen der kinderen Israels, ende seyde tot hen:

d Ios. 4.b.12.

29

Wanneer de kinderen Gad ende de kinderen Ruben met v ouer de Iordane trecken, alle gerustet ten strijde voor den Heere, ende v dat lant onderdaen is, so gheeft hen het lant Gilead tot eygen.

D.30

Trecken sy daerenteghen niet met v gherust, so sullen sy met v eruen inden lande Canaan.

31

De kinderen Gad ende de kinderen Ruben antwoordden ende seyden: Als de Heere spreect tot dynen knechten, so willen wy doen.

32

Wy willen gerust trecken voor den Heere int lant Canaan, ende onse erfgoet besitten op dese zijde der Iordane.

33

^e Also gaf Mose den kinderen Gad, ⁺ ende den kinderen Ruben, ende den haluen stamme Manasse, des soons Ioseph, het Koninckrijcke Sihon des Konincks der Amoriten, ende het Koninckrijcke Og, des Konincks tot Basan, het lant metten steden inden gantschen lantpalen rontom.

e Deut. 3.b.12. ende 29.a.8. Ios. 12.a.6. ende 13.a.8. ende 22.a.4.

+ Mose gheeft den tween stammen het Konincrijcke Sihon ende Og, met alle steden, te weten, Gads ende Rubens, ende den haluen stamme Manasse.

34

Doe bouweden de kinderen Gad, Dibon, Ataroth, Aroer,

35

Atroth, Sophan, Iaeser, Iegabea.

36

Bethnimra ende Betharan, besloten steden ende schaephutten.

37

De kinderen Ruben bouweden Hesbon, Eleale, Kariathaim,

38

Nebo, BaalMeon, ende veranderden de namen, ende Sibama, ende gauen den steden namen die sy bouweden.

39

^f Ende de kinderen Machir des soons Manasse, ⁺ ghinghen in Gilead, ende wonnent, ende verdreuen de Amoriten die daerin waren.

f Gene. 50.c.23. Deut. 3.b.10.12.

+ Machir.

E.40

Doe gaf Mose den Machir, den soon Manasse, Gilead, ende hy woonde daerin.

41

Iair nu de sone Manasse, ⁺ ghinck henen, ende wan hare dorpen, ende hietse HauothIair.

+ Iair.

42

Naboth ghinck henen, ende wan Knath met haren dochteren, ⁺ ende hietse Nobah, na synen name.

+ Nobah.