Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxi. Capittel.

1. De Midianiten werden bekrijcht, ende krijghen, 8. met tsamen Bileam haerder sonde loon, 11. Mose vertoornt der Midianitischen vrouwen haluen, die onder den roof ghebracht worden, 17. heetse verworghen, met allen wat manlick is, ende alleen der iongen maechden verschoonen, 19. de verontreynichden in strijde, met tsamen allen ghereetschap ende roof, worden ghereynicht, 26. het roof, beyde aen menschen ende vee, in summe genomen, 27. achterblijuers ende wtreysers ghelijck gedeylt, 28. den Heere zijn hefoffer bestemt, 41. den Priester Eleasar, 47. ende den Leuiten ghegheuen, 48. allerley gulden kleynoden vanden Hooftlieden ten gheschencke gheoffert, 54. ende ter gedachtenisse in de hutte voor den Heere ghebracht.

A

ENde de Heere sprack met Mose, ende seyde: ⁺

+ De Midianiten krijghen hare straffe voor de sonde, als bouen int 25. cap ghemeldet.

2

^a Wreeckt de kinderen Israels aen den Midianiten, dat du dy daerna vergaderst tot dynen volcke.

a Num. 25.b.17.

3

Doe sprack Mose metten volcke, ende seyde: Rustet onder v lieden ten heyre tegen de Midianiters dat sy den Heere wreken aen den Midianiten,

4

Wt eenen yeghelicken stamme duysent, dat ghy wt allen stammen Israels, in het heyr schict.

5

Ende sy namen aen wt den duysenden Israels, duysent wt elcken stamme, twaelf duysent gherust ten heyre.

6

Ende Mose schicktese met Pinehas den sone Eleasar des Priesters int heyr, ende de heylighe

[fol. 56v]

kleederen, ende de Luydtrompetten in syne hant.

7

Ende sy voerden het heyr tegen de Midianiten, als de Heere Mose gheboden hadde, ende verworchden alles wat manlick was.

8

^b Daertoe de Koningen der Midianiters verworchden sy met tsamen haren verslaghenen, naemlick: Eui, Rekem, Zur, Hur, ende Reba, de vijf Koninghen der Midianiten: ⁺ Bileam, den sone Beor, verworchden sy ooc metten sweerde.

b Iosue 13.c.21.

+ Bileam werdt verworcht.

9

Ende de kinderen Israels namen gheuangen de vrouwen der Midianiters, ende hare kinderen, alle haer vee, alle haer haue, ende alle hare goeden roofden sy.

B.10

Ende verbranden met vyer alle hare steden, hare wooninghen, ende alle borchten.

11

Ende namen allen roof, ende alles wat te nemen was, beyde, menschen ende vee,

12

Ende brachtent tot Mose, ende tot Eleasar den Priester, ende totter menichte der kinderen Israels, naemlicken de gheuanghenen, ende het ghenomen vee, ende het gheroofde goedt int legher opter Moabiten velt, dat aen de Iordane leyt teghen Iericho.

13

Ende Mose ende Eleasar de Priester gingen hen teghen buyten voor het legher.

14

Ende Mose werdt toornich ouer de Hooftlieden des heyrs, die Hooftlieden ouer duysent ende hondert waren, die wt den heyre ende strijde quamen,

15

Ende sprack tot hen: Waerom hebt ghy alle vrouwen leuen laten?

16

^c Siet, en hebben sy niet de kinderen Israels door Bileams raet afgekeert, ⁺ hen te besondigen aen den Heere, ouer den Peor, ende een plaghe gheschiedde der menichte des Heeren?

c Num. 25.a.2. Apoc. 2.b.14.

+ Bileams raet.

17

^d So verworcht nu alles wat manlick is onder den kinderen, ende alle vrouwen, die eenen man bekent ende bygheleghen hebben.

d Iud. 21.b.11.

18

Doch alle kinderen die van wijfs namen zijn, ende gheenen man bekent, noch byghelegen en hebben, die laet voor v leuen.

19

^e Ende leghert v buyten den legher seuen daghen, alle die yemanden verworcht, ofte verslaghenen aengheroert hebben, dat ghy v ontsondicht aen den derden ende seuenden daghe, met dien die ghy gheuanghen ghenomen hebt.

e Num. 19.b.11. Hagg. 2.b.14.

C.20

Ende alle kleederen ende alle het gereetschap van vellen, ende alle het pelswerck, ende alle houten vaten, sult ghy ontsondighen.

21

Ende Eleasar de Priester sprac totten krijchsvolcke, dat inden strijdt ghetoghen was: Dat is de Wet, ^f welck de Heere Mose geboden heeft:

f Num. 6.c.28. ende 11.d.32.

22

Gout, siluer, metael, ijser, tin, ende loot,

23

Ende alles wat het vyer lijdt, sult ghy door het vyer laten gaen ende reynighen, dat het metten springwater ontsondicht worde: daerenteghen alles wat gheen vyer en lijdt, dat sult ghy door het water gaen laten.

24

Ende sult uwe kleederen wasschen aen den seuenden dage, so wort ghy reyn: daerna sult ghy int legher komen.

25

Ende de Heere sprack met Mose, ⁺ ende seyde:

+ Den roof recht wtghedeylt.

26

^g Neemt de summe des roofs der gheuangenen, beyde aen menschen ende vee, du ende Eleasar de Priester, ende de Ouerste vaders der menichte:

g Deut. 20.b.14. Iosue 8.c.27. ende 22.a.8. 2.Mach. 8.c.22.

27

Ende gheeft de helft dien, die wtghetoghen zijn int heyr, ende den slach gedaen hebben, ^h ende de ander helft der menichte.

h Die te huys blijuen, ende die wtreysden, krijghen euen veel. 1.Sam. 30.c.24.

28

Ende salt den Heere heffen, vanden krijchslieden die int heyr ghetoghen zijn, telcken van vijf hondert een ziele, beyde aen menschen, runderen, eselen ende schapen.

29

Van harer helft saltu het nemen, ende den Priester Eleasar gheuen ter heffinge den Heere.

D.30

Ende van de helft der kinderen Israels, saltu telcken van vijftighen nemen een stuck goedts, beyde, aen menschen, runderen, eselen ende schapen, ende van allen vee, ende salt het den Leuiten geuen, die de wacht waernemen aen der wooninghe des Heeren.

31

Ende Mose ende Eleasar de Priester, deden als de Heere Mose gheboden hadde.

32

Ende den ouerblijuenden buet, die het krijchsvolck gherooft hadde, ⁺ was, sesmael hondert, ende vijf ende tseuentich duysent schapen,

+ Somma der wtbuete.

33

Twee ende tseuentich duysent runderen,

34

Een ende tsestich duysent eselen.

35

Ende de wijfs persoonen, die gheen mannen bekent, noch bygheleghen en hadden, twee ende dertich duysent zielen.

36

Ende de helft, die den genen, die int heyr getoghen waren, toebehoorde, was aen den ghetale, dryhondertmael ende seuen ende dertich duysent, ende vijf hondert schapen.

37

Daeruan werden den Heere, ses hondert vijf ende tseuentich schapen.

38

Item, ses ende dertich duysent runderen, daer van werden den Heere twee ende tseuentich.

39

Item, dertich duysent ende vijf hondert esels: daer van werden den Heere, een ende tsestich.

E.40

Item menschen zielen, sestien duysent zielen: daeruan werden den Heere, twee ende dertich.

41

Ende Mose gaf sulcke heffinge des Heeren, den Priester Eleasar, als hem de Heere geboden hadde.

42

Nu de ander helft, die Mose den kinderen Israels toedeylde, vanden krijchslieden,

43

Naemlicken, de helft der menichte toekomende, was oock dry hondertmael ende seuen ende dertich duysent, ende vijf hondert schapen,

44

Ses ende dertich duysent runderen:

45

Dertich duysent ende vijf hondert eselen,

46

Ende sesthien duysent menschen zielen.

47

Ende Mose nam van deser helft der kinderen Israels, telcken een stuck van vijftigen, beyde des vees ende der menschen, ende gaf het den Leuiten, die de wacht waer namen aen der wooninge des Heeren, als de Heere Mose geboden hadde.

48

Ende de Hooftlieden ouer de duysent des krijchsuolcks, naemlick, die ouer duysent ende ouer hondert waren, traden hiertoe tot Mose,

49

Ende spraken tot hem: Dyne knechten hebben de summe genomen der krijchslieden, die onder onsen handen gheweest zijn, ende daer en ghebreeckt niet een.

F.50

Daerom brenghen wy den Heere gheschencken, wat een yegelick geuonden heeft, van gulden ghereetschap, ketenen, armghesmijde, ringhen, oorringhen ende spanselen, dat onse zielen versoent worden voor den Heere.

51

Ende Mose nam van hen, met tsamen den Priester Eleasar, het goudt allerley ghereetschaps.

52

Ende alles goudts heffinge, dat sy den Heere hieuen, was sesthien duysent ende seuen hondert ende vijftich sikel, vanden Hooftlieden ouer duysent ende hondert.

53

Want de krijchslieden hadden gherooft, een yeghelick voor hemseluen.

54

Ende Mose, met Eleasar den Priester, nam dat goudt vanden Hooftlieden ouer duysent ende hondert, ende brochtent in de hutte des Bescheyts, ter ghedachtenisse der kinderen Israels, voor den Heere.