Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxviij. Capittel.

1. Eener yeghelicker tijt wert haer offer bestemt, 6. den Sabbath dach, 11. nieu maendach, 16. Paschen, 26. eerstelinghen feest.

A.1

ENde de Heere sprack met Mose, ende seyde:

2

Ghebiet den kinderen Israels, ende spreect tot hen: Den offer mijns broots, dwelck mijn offer des sueten reucks is, sult ghy houden te zijnder tijt, dat ghy het my offert.

3

Ende spreeckt tot hen: ^a Dat zijn de offeren die ghy den Heere offeren sult: Iarighe lammeren die sonder vlecke zijn, daghelicx twee ten daghelickschen brantoffer: ⁺

a Exodi 29.d.38. 1.Para.16.c.40. 1.Esd. 3.a.3. Hebr. 9.a.6.

+ Daghelicks offer.

4

Een lam des morgens, het ander tusschen den auont.

5

^b Daertoe een tienden Epha ^c semelmeels ten spijsoffer, met olye ghemengt die ghestooten is, eens vierdendeels van Hin.

b Num. 15.a.4.

c of, meelbloemen.

6

Dat is een daechlicks brantoffer, dat ghy aen

[fol. 55v]

den berge Sinai offerdet, ten sueten reucke, een vier den Heere.

7

Daertoe zijn dranckoffer, telcken tot eenen lamme een vierendeel van Hin: in het Heylichdom salmen den ^d wijn des dranckoffers offeren den Heere.

d Heb. sicera ofte sechar, dat is, dronckmakighen dranck: Het louter ende onuermengt woordt Gods maeckt alleen de zielen droncken.

8

Het ander lam saltu tusschen den auondt maken, als het spijsoffer des morghens, ende zijn dranckoffer des sueten reucks den Heere.

9

Aen den Sabbathdaghe nu, twee Iarige lammeren sonder vlecke, ende twee tienden semelmeels, ⁺ ten spijsoffer, met olye ghemengt, ende zijn dranckoffer.

+ Sabbathoffer.

B.10

Dat is het brantoffer eens yeghelicken Sabbaths bouen het dagelicks brantoffer met synen dranckoffer.

11

Nu des eersten daechs uwer maenden, ⁺sullet gy den Heere een brantoffer offeren, twee ionge ossen, eenen ram, seuen Iarige lammeren sonder vlecke.

+ Nyeumaentoffer.

12

Ende telcken dry tienden semelmeels ten spijsoffer, met olye ghemengt, tot eenen osse, ende twee tienden semelmeels ten spijsoffer, met olye ghemengt, tot eenen ram.

13

Ende telcken een tienden semelmeels ten spijsoffer met olye ghemengt, tot eenen lamme: dat is, het brandtoffer des sueten reucks, een offer den Heere.

14

Ende haer dranckoffer sal zijn, een halue Hin wijns ten osse, een derdendeel Hin ten ramme, een vierendeel Hin ten lamme: dat is het brantoffer eener yeghelicker maent in het Iaer.

15

Daertoe salmen eenen gheytenbock ten sondoffer den Heere maken, ouer het daghelicksche brantoffer ende zijn dranckoffer.

16

^e Nu aen den veertienden daghe der eerster maent, ⁺ is het Paschen den Heere.

e Exodi 12.b.18. Leuit. 23.a.5. Deut. 16.a.1. Hesek. 45.c.21.

+ Paschenoffer.

17

Ende aen den vijftienden daghe der seluer maent isset Feest: seuen daghen salmen ongeheuelt broot eten.

18

Den eersten dach sal heylich heeten, dat ghy te samen koemt: gheen dienstwerck sult ghy daer in doen.

19

^f Ende sult den Heere brantoffer doen, twee ionghe ossen, eenen ram, seuen Iarighe lammeren sonder vlecke,

f Leuit. 23.a.8.

C.20

Met haren spijsofferen, dry tienden semelmeels met olye ghemengt, op eenen osse, ende twee tienden opten ram:

21

Ende oock een tiende op een lam onder den seuen lammeren.

22

Daertoe eenen bock ten sondoffer, datmen v versoene.

23

Ende sult sulcks doen ^g† aen den morgen, bouen het brantoffer, dwelck een daghelicks brantoffer is.

g† an. behaluen het morgen brantoffer welck etc.

24

Na deser wijse sult ghy alle daghe, seuen daghen lanck, het broot offeren ten offer des sueten reucks den Heere totten dagelickschen brantoffer, daertoe zijn dranckoffer.

25

Ende den seuenden dach sal by v heylich heeten, dat ghy te samen koemt, gheen dienstwerck en sult ghy daerin doen.

26

Ende den dach der ^h† eerstelinghen, ⁺ wanneer ghy offert het nieuwe spijsoffer den Heere, wanneer uwe weken om zijn, sal v heylich heeten, dat ghy te samen koemt, gheen dienstwerck en sult ghy daerin doen.

h† anders, eerste vruchten,

+ Eerstelinghen Feestoffer.

27

ⁱ Ende sult den Heere brantoffer doen, ten sueten reucke, twee ionghe ossen, eenen ram, seuen Iarighe lammeren,

i Leuit. 23.b.18.

28

Met haren spijsoffer, dry tienden semelmeels met olye gemengt, tot eenen osse, twee tienden totten ramme,

29

Ende telcken een tiende op een lam der seuen lammeren.

D.30

Ende eenen gheytenbock v te versoenen.

31

Dit sult ghy doen behaluen het daghelicks brantoffer met synen spijsoffer, sonder vlecke salt zijn: daertoe hare dranckoffer.