Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxvij. Capittel.

1. De dochters Zelaphehad versoeken erue onder haers vaders broederen, 6. Uerweruent, 8. Ende wert een Wet van erfgoede ende eruen ghegeuen, 12. Mose siet op vanden berge Abarim het beloefde lant, daer hy niet en mach in komen, 15. bidt om eenen trouwen Herder ouer des Heeren volck na hem, 18. ende hoort, hy sal den Iosua, met opleggen der handen ende heerlickheyt, inhulden.

A.1

ENde de dochteren ^a Zelaphehad, ⁺ des soons Hepher, des soons Gilead, des soons Manasse, onder den geslachten Manasse, des soons Ioseph, met namen Mahela, Noa, Hagla, Milca ende Thirza:

a Num. 26.d.33. ende 36.a.2. Iosue 17.a.3.

+ Zelaphehads dochteren.

2

Quamen hiertoe, ende traden voor Mose ende Eleasar den Priester, ende voor de Vorsten ende de gantsche menichte, voor de deure der hutten des ^b† Bescheyts, ende spraken:

b† an. Getuygenisses, of Stifts.

3

Onse vader is ghestoruen in der woestijne, ende en was niet mede onder der menichte, ^c die hen teghen den Heere verhieuen in der rotte Korah, maer is in syner sonde gestoruen, ende en hadde gheene sonen.

c Nu. 16.a.1.d.31.

4

Waeron sal dan onses vaders naem, onder synen geslachte ondergaen, oft hy wel gheenen sone en heeft? gheeft ons oock een goedt, onder onses vaders broederen.

5

Mose bracht haer sake voor den Heere.

6

Ende de Heere sprack tot hem:

7

De dochteren Zelaphehad hebben recht gesproken: ⁺ du salt hen oock een erfgoet onder haers vaders broederen gheuen, ende salt hen haers vaders erue toekeeren.

+ Een wet van erfgoet ende eruen.

8

Ende segt den kinderen Israels: Wanneer yemant sterft, ende en heeft gheene sonen, so sult ghy zijn erue, syner dochteren toekeeren.

9

Heeft hy gheene dochteren, so sult ghy het synen broederen gheuen.

B.10

Heeft hy gheene broederen, so sult ghy het synen ooms gheuen.

11

Heeft hy gheen ooms, so sult ghy het synen naesten vrienden gheuen, die hem toebehooren in synen gheslachte, dat sy het innemen: dat sal den kinderen Israels een wet ende recht zijn, als de Heere Mose gheboden heeft.

12

^d Ende de Heere sprack tot Mose: ⁺ Klimt op dat gheberchte Abarim, ende besiet dat lant, dat ick den kinderen Israels gheuen sal.

d Deut. 1.d.37. ende 3.c.27. ende 4.c.21. ende 32.e.48 ende 34.a.1.

+ Den berch Abarim.

13

Ende wanneer du het ghesien hebst, so saltu dy vergaderen tot dynen volcke, ^e als dijn broeder Aaron vergadert is.

e Num. 20.c.28. Deut. 3.c.27.

14

^f Dewijle ghy mynen woorde onghehoorsaem geweest zijt inder woestijne Zin, ouer den twist der menichte, doe ghy my heyligen soudet, door het water voor hen: ^g dat is het twistwater tot Kades inder woestijne Zin.

f Num. 10.b.12.

g Exodi 17.a.7. Num. 20.b.13. Deut. 9.c.23.

15

Ende Mose sprack metten Heere, ende seyde:

16

De Heere, de God ouer alle leuendige vleesch, wilde doch eenen man setten ouer de menichte,

17

Die voor hen wt ende in ga, ⁺ ende hen wt ende in leyde: dat de menichte des Heeren niet en zy als de schapen sonder Herder.

+ Iosua koemt in Moses stede.

18

^h Ende de Heere seyde tot Mose: ⁱ Neemt Iosua tot dy, den sone Nun, die een man is, in welcken de Gheest is, ende legt dyne handen op hem,

h Deut. 31.a.3.

i 1.Mach. 2.f.55.

19

Ende set hem voor den Priester Eleasar, ende voor de gantsche menichte, ende ghebiet hem voor haren ooghen:

C.20

Ende legt dyne ^k heerlickheyt op hem, dat hem hoore de gantsche menichte der kinderen Israels.

k Dat sal misschien een sonderlicke wijse gheweest zijn, dat Mose den Iosua den staf ofte de hant opt hooft gheleyt heeft: ghelijck als men de Koningen te saluen, ofte de leenen te ontfangen plach.

21

Ende sal treden voor den Priester Eleasar, die sal voor hem raedt vraghen door de wijse des ^l Lichts voor den Heere: na desseluen mont sullen wt ende in trecken, beyde hy, ende alle kinderen Israels met hem, ende de gantsche menichte.

l Dat is dat licht op der borst des hoogen Priesters. Ex. 28.d.38. Daer af seggen sommige: Wanner God heeft op des Priesters vrage geantwoort, dat heet heeft moeten, ia, zijn, so heeft dat licht glantzen van hem gegeuen. Maer dat hebben de Koninghen daerna ghebruyckt, wanneer sy God om raet vraechden. Als 1.Sam. 28. ende 30. an. na den gebruycke des Urim.

22

Mose dede als hem de Heere geboden hadde, ende nam Iosua, ende settede hem voor den Priester Eleasar, ende voor de gantsche menichte.

23

^m Ende leyde syne hant op hem, ende gheboot hem, als de Heere met Mose gesproken hadde.

m Act. 6.a.6. ende 13.a.3. 1.Tim. 4.b.14. ende 5.c.22.