Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxv. Capittel.

1. So het volck hoereert metten Moabitischen vrouwen, ende hen hanget aen den BaalPeor, 4. heet de Heere alle Ouersten in de Sonne hangen, ende den schuldighen ghemeynen man verworgen, 6. den Pinehas, na ernstlicker straffe der onuerschaemder hoererie Simri ende Casbi, 12. gheeft hy een verbont eeuwigen Priesterdoms, 16. ende heet de Midianiten ombrenghen.

A.1

ENde ^a Israel woonde in Sittim: ende het volck hief aen te hoereren metten dochteren der Moabiten,

a Gen. 33.e.49.

2

^b Welcke noodden het volck ten offer haerder Goden: ende het volck att, ende badt hare Goden aen:

b Exodi 34.b.15. Psalm. 106.c.28.

3

Ende Israel hinck hem aen den BaalPeor: doe vergrimde de toorn des Heeren ouer Israel,

4

Ende sprack tot Mose; ^c Neemt alle Ouersten des volcks, ende hangtse den Heere in de sonne, op dat de grimmighe toorne des Heeren van Israel ghekeert worde.

c Iosue 22.b.17. Deut. 4.a.3.

5

Ende Mose sprack totten Richteren Israels: ^d een yeghelick verworghe syne lieden, die hen aen den BaalPeor ghehanghen hebben.

d Exodi 32.c.27.

6

^e Ende siet, een man wt den kinderen Israels quam, ende brachte onder syne broeders een Midianitinne, ende liet Mose toesien, ende de gantsche menichte der kinderen Israels, die daer weenden voor der deure der hutten des ^f† Bescheyts.

e Deut. 23.b.17.

f† an. Ghetuygenisses, of Stifts.

7

^g Doe dat sach Pinehas de sone Eleasar, des soons Aarons des Priesters, stont hy op wt der menichte, ende nam een spiese in zijn hant,

g 1.Mach. 2.c.26.f.54. Psal. 106.d.30.

8

Ende ghinck den Israelitischen manne na tot inden hoeren winckel, ⁺ ende doorstackse beyde, den Israelitischen man ende het wijf, door haren buyck: doe hielt de plaghe op vanden kinderen Israels.

+ Pinehas straft ernstelic de onbeschaemde hoererie.

9

^h Ende daer werden gedoot in der plage, vier ende twintich duysent.

h 1.Cor. 10.a.8.

B.10

Ende de Heere sprack met Mose, ende seyde:

11

ⁱ Pinehas de sone Eleasar, des soons Aarons des Priesters, heeft myne grimmicheyt vanden kinderen Israels gekeert, door synen ^k ijuer om my, dat ick in mynen ijuer de kinderen Israels niet gantsch en verdelchde.

i Syrach 45.c.28. 1.Mach. 2.f.54.

k of, hertbrant,

12

Daerom segt: Siet, ick gheue hem mijn ^l verbont des vreedts,

l Mala. 2.a.5.

13

Ende hy sal hebben, ende zijn zaet na hem, het verbont eens eeuwighen Priesterdoms, daerom dat hy voor synen God gheijuert, ende de kinderen Israels versoent heeft.

14

De Israelitische man dan, die verslagen wert metter Midianitinne, ⁺ hiet Simri, de sone Salu, een Vorst in den huyse des vaders der Simeoniten.

+ Simri.

15

Het Midianitische wijf, dat oock verslaghen wert, ⁺ hiet Casbi, een dochter Sur, die een Vorst was, eens gheslachts onder den Midianiten.

+ Casbi.

16

Ende de Heere sprack met Mose, ende seyde:

17

^m Doet den Midianiten schade, ende slaetse:

m Num. 31.a.2.

18

Want sy hebben v schade ghedaen met harer listicheydt, die sy v ghestelt hebben door Peor, ende door haer suster Casbi, de dochter des Vorsten der Midianiten, die verslaghen is aen den daghe der plage om Peors ^n† wille, ende de plaghe daer na quam. ⁺

n† and. willen,

+ Ca. xxvi. Ende als de plage een eynde hadde, sprack de Heere tot, etc.