Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xx. Capittel.

MirIam sterft in Kades, 3. het volck twistet met Mose ende Aaron van ghebreke des waters, 8. de Heere gheeft hen water wt den rotzsteen, 12. ende ontseyt Mose ende Aaron, om haer onghelooue, het lant Canaan, 14. Mose sendt bootschap aen den Koninck Edom, 18. die en wil Israel door zijn lant niet laten trecken, so reysen sy van Kades na Hor, 24. daer sterft Aaron na den woorde des Heeren, 28. ende Eleasar koemt in zijn stede.

A.1

ENde de kinderen Israels quamen met de gantsche menichte in de woestijne Zin, ^{+ a} in der eerster maent, ^{b +} ende het volck lach te Kades: ende MirIam sterf aldaer, ende wert aldaer begrauen.

+ Woestijne Zin

a Numeri 33.d.36

b Deuter. 1.e.46.

+ MirIam sterft.

2

Ende de menichte en hadde gheen water, ende vergaderden hen teghen Mose ende Aaron.

3

^c Ende het volck twistede met Mose, ende sprack: Och, dat wy vergaen waren, ^d doe onse broeders verginghen voor den Heere.

c Exod. 17.a.2.

d Nume. 16.d.31.

4

^e Waerom hebt ghy de menichte des Heeren in dese woestijne ghebracht, dat wy hier steruen met onse vee?

e Exodi 17.a.3.

5

Ende waerom hebt ghy ons wt Egypten gheleydt aen desen quaden hoeck, daermen niet saeyen en kan, daer noch vijghen noch wijnstocken, noch granaetappelen en zijn, ende daer toe en isser gheen water te drincken.

6

Mose ende Aaron ginghen vander menichte tot der deure der hutten des ^f† Bescheyts, ende vielen op haer aenghesichte, ende de heerlickeyt des Heeren verscheen hen.

f† And. Stifts, of ghetuyghenisses.

7

Ende de Heere sprack met Mose, ende seyde:

8

^g Neemt den staf, ende vergadert de menichte, du ende dijn broeder Aaron, ende spreect met den rotzsteen voor haren ooghen, die sal zijn water gheuen: ^h also saltu hen water wt den rotzsteen doen hebben, ende de menichte drencken ende haer vee.

g Exodi 17.a.6.

h Psa. 78.b.15.c 20

9

Doe nam Mose den staf voor den Heere, ⁺ als hy hem gheboden hadde.

+ Hier vliet veel waters wt den rotzsteen.

B.10

Ende Mose ende Aaron vergaderden de menichte voor den rotzsteen, ende sprack tot hen: Hoort ghy onghehoorsame: ⁱ Sullen wy v oock water brenghen wt desen rotzsteen?

i Deutero. 32.f.51. Psalm. 78.c.20. ende 105.c.41. ende 106.d.32. Sapient.11.a.4. 1.Corint.10.a.4.

11

Ende Mose hief zijn hant op, ende sloech den rotzsteen met den staf ^k tweemael: doe ginck daer veel waters wt, so dat de menichte dranck, ende haer vee.

k Eenmael hadde hy moeten slaen.

12

De Heere dannoch sprack tot Mose ende Aaron: ^l Daerom dat ghy aen my ^m niet ghelooft en hebt, dat ghy my heylichdet voor den kinderen Israels, en sult ghy dese menichte niet in het lant brenghen, dat ick hen gheuen sal.

l Numeri 27.b.14 Deutero.1.d.37. ende 31.a.2.

m Aenmerckt, Twijffelen is ongelooue ende sonde: ende is hier een mysterium, dat het volck des Wets door synen Leeraer niet en kan salich worden, ende dat om de tijt Christi de ongheloouighe Mose, dat is, het ongeloouich volc, valt.

13

ⁿ Dat is het Twistwater, daer de kinderen Israels met den Heere ouer twisteden, ende hy gheheylicht wert aen hen.

n Exodi. 17.a.7.

14

^o Ende Mose sandt bootschap wt Kades tot den Koninck der Edomiteren: Also laet dy ^p dijn broeder Israel seggen: Du weetst alle de moeyte die ons gheschiet is.

o Iudic. 11.b.17.

p Genes. 25.c.23.

15

Dat onse vaders af in Egypten ghetoghen zijn, ^q ende wy langhen tijt in Egypten ghewoont hebben: ende de Egyptenaers handelden ons ende onse vanders qualick.

q Genes.46.a.6.

16

Ende wy schreydden totten Heere, die heeft onse stemme verhoort, ende eenen Enghel ghesonden, ende ons wt Egypten gheleydt: ^r ende siet, wy zijn tot Kades inder stadt, aen dyne lantpalen.

r Deuter.2.a.3.

17

^s Laet ons door dijn lant trecken: wy en willen niet door de ackers, noch wijnbergen gaen, oock gheen water wt de bornputten drincken: de lantstrate willen wy trecken, noch ter rechter noch ter slinckerhant wijcken, tot dat wy door dyne lantpalen komen.

s Numeri 21.c.22. 1.Mach. 5.e.48.

18

^t De Edomiters daerenteghen spraken tot hen: Du en salt niet door my trecken, oft ick wil dy niet den sweerde teghen trecken. ⁺

t Hesek. 35.a.5. Obad. b.10.

+ De Edomiters willen Israel door haer lant niet trecken laten.

19

De kinderen Israels spraken tot hen: ^u Wy willen op de ghebaende strate trecken: ende so wy dijns waters drincken, wy ende onse vee, so willen wy dat betalen, wy en willen niet dan slechs te voete door trecken.

u Deuter. 2.c.26

C.20

Hy daerenteghen sprack: Du en salt niet door trecken: ^x ende de Edomiters toghen wt, hen teghen, ⁺ met machtigen volcke ende stercker hant.

x Exodi 17.a.8.

+ Van Kades reysen de kinderen Israels te Hor, daer sterft Aaron.

21

^y Also weygherden de Edomiters, Israel te vergunnen, door hare palen te trecken: ende Israel weeck van hen.

y Deu. 2.a.7.c.28.

22

Ende de kinderen Israels braken op van Kades, ^z ende quamen met der gantscher menichte tot Hor aen het gheberchte.

z Num. 33.d.37.

23

Ende de Heere sprack met Mose ende Aaron, te Hor aen het gheberchte, aen de palen des lants der Edomiters, ende seyde:

24

Laet hem Aaron vergaderen tot synen volcke, want hy en sal niet in het lant komen, dat ick den kinderen Israels ghegeuen hebbe, daerom dat ghy mynen monde onghehoorsaem gheweest zijt, by den Twistwater. ^a Neemt dan Aaron, ende synen sone Eleasar, ende leydtse op Hor, in het gheberchte:

a Nume.33.d.38. Deutero.32.f.50.

25

^b Ende treckt Aaron syne kleederen wt, ende

b Exodi 29.c.29.

[fol. 52v]

trecktse Eleasar aen synen sone: ende Aaron sal hem aldaer vergaderen, ende steruen.

27

Doe dede Mose als hem de Heere gheboden hadde, ende klommen op Hor in het geberchte, voor der gantscher menichte.

28

Ende Mose tooch Aaron syne kleederen wt, ende toochse Eleasar aen, synen sone: ^c ende Aaron sterf aldaer bouen op den berch: Mose dan ende Eleasar klommen af vanden berghe. ⁺

c Deutero. 10.a.6. ende 32.f.50.

+ Aarons doot.

29

Ende doe de gantsche menichte sach, dat Aaron wech was, ^d beweenden sy hem dertich daghen, het gantsche huys Israels.

d Deutero. 34.a.8