Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xix. Capittel.

1. Uanden sondoffer der iongher Koe, oft Ueerse, 9. ende sprengwater van haerder asschen ter reyninghe ende ontsondinge der ghener die hen aen eenen dooden, 14. oft sterfhuyse, 16. of verslaghenen, etc. verontreynighen, 13.20. van der straffe der gheener die dat na laten.

A.1

ENde de Heere sprack met Mose ende Aaron, ⁺ ende seyde:

+ Vander roodtachtiger Koe.

2

Dese zede sal een Wet zijn, die de Heere gheboden heeft, ende gheseyt: Segt den kinderen Israels, dat sy tot dy brenghen een rootachtighe Koe sonder vlecke, aen de welcke gheen gebreck en zy, ende daer noch noyt gheen Iock op ghekomen en is.

3

Ende gheeftse den Priester Eleasar, ^a die salse buyten voor het legher brenghen, ende aldaer voor hem slachten laten.

a Hebr. 13.b.11.

4

Ende Eleasar de Priester ^b sal van haren bloede met synen vingher nemen, ende stracks teghen de hutte des ^c† Bescheydts seuenmael sprenghen.

b Hebr. 9.b.13.

c† And. Stifts, of, getuygenisses.

5

^d Ende de Koe voor ^e hem verbeenen laten, beyde haer vel ende vleesch, daer toe haer bloet met haren dreck.

d Exodi 29.b.14. Leuitici. 4.b.11.

e Te weten, voor den Priester.

6

Ende de Priester sal Cederen hout ende Ysope ende rozijnroode wolle nemen, ende op de bernende Koe worpen.

7

Ende sal syne kleederen wasschen, ende zijn lijf met water baden: ende daer na inden legher gaen, ende onreyn zijn totten auont.

8

Ende diese verbrandt heeft, sal oock syne kleederen met water wasschen, ende zijn lijf in water baden, ende onreyn zijn tot aen den auont.

9

Ende een reyn man sal de ^f asschen vander Koe op rapen, ende haer schudden buyten den legher, aen een reyn plaetse, dat sy aldaer bewaert worde voor de menichte der kinderen Israels ten ^g† sprengwater, want het is een sondoffer.

f Hebr. 9.b.13.

g† And. Water der afsonderinge.

B.10

Ende deselue, ⁺ die de asschen van der koe opgheraept heeft, sal zijn kleederen wasschen, ende onreyn zijn tot aenden auont: dit sal een eewich recht zijn den kinderen Israels, ende den vreemdelinghen die onder v woonen.

+ Sprengwater vander Koe met vlietende water.

11

^h Wie nu ergens eenen dooden mensche aenroert, die sal seuen daghen onreyn zijn.

h Nume. 31.b.19. Syrac. 34.d.30. Hagge. 2.b.14.

12

Die sal hem ⁱ hier mede ontsondigen, aenden derden daghe, ende aenden seuenden daghe, so wort hy reyn: ende so hy hem aenden derden daghe ende aenden seuenden daghe niet en ontsondicht, so en sal hy niet reyn worden.

i Te weten, met de assche van der koe.

[fol. 52r]

13

Wanneer oock yemant erghens eenen dooden mensche aenroert, ende hem niet ontsondighen en wilde, die verontreynicht de wooninghe des Heeren, ende sodanighe ziele sal wtgheroeyt worden wt Israel, daerom dat dat sprengwater niet ouer hem ghesprengt is: so is hy onreyn, so langhe als hy hem daer niet van reynighen en laet.

14

^k Dat is de Wet. Wanneer een mensch inder hutten sterft, wie in de hutte gaet, ende alles wat inder hutten is, sal onreyn zijn seuen daghen.

k Hy en spreeckt hier niet van Godes hutten, maer daer de steden inder woestijne in woonden: sulcx moestmen oock inden huysen houden, doe sy in haer lant quamen.

15

Ende alle de opene ^* ghereetschap die gheen decksel noch bant en heeft, is onreyn.

* Of, vaten

16

Oock wie aenroert op den velde eenen verslaghenen met den sweerde, of eenen dooden, oft eens menschen beenderen, oft graf, die is onreyn seuen daghen.

17

So sullen sy nu voor den onreynen nemen, vanden asschen deses verbranden sondoffers, ende vlietende water daer op gieten in een vat.

18

Ende een reyn man sal ^l ysop nemen, ende int water steken, ende de hutte besprenghen, ende alle de ghereetschap, ende alle zielen die daer in zijn: also oock dien, die eens dooden been, oft eenen verslaghenen, oft dooden, oft graf aengheroert heeft.

l Psalm. 51.a.9.

19

De reyne dan sal den onreynen aenden derden daghe, ende aenden seuenden daghe besprenghen, ende hem aenden seuenden daghe ontsondighen. Ende sal syne kleederen wasschen, ende hem in water baden, so wort hy aen den auont reyn.

C.20

Wie daerenteghen onreyn zijn sal, ende hem niet ontsondighen en wil, diens ziele sal wtgheroeyt worden wt der menichte: want hy heeft het Heylichdom des Heeren verontreynicht, ende en is met besprengwater niet besprengt, daerom is hy onreyn.

21

Ende dit sal hen een eeuwich recht zijn: ende die, die met den besprengwater ghesprengt ^m heeft, sal oock zijn kleederen wasschen: ende wie het besprengwater aenroert, die sal onreyn zijn tot aenden auont.

m Anders, is,

22

Ende alles wat hy aenroert, sal onreyn worden: ende welcke ziele hy aenroeren sal, sal onreyn zijn tot aenden auont.