Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xviij. Capittel.

1. Uan het ampt ende dienst Aarons, der Priesteren ende Leuiten, 8. ende wat die voor haren dienst hebben sullen, 20. dewijle sy gheen erfgoet en hebben onder haren broederen, 26. van thienden, offeren der Leuiten.

A.1

ENde de Heere sprack tot Aaron: ⁺ Du ende dyne sonen, ende dijns vaders huys met dy, sult de misdaet des Heylichdoms draghen, ende du ende dyne sonen met dy, sult de misdaet ws priesterdoms draghen.

+ Ampt der Leuiten.

2

^a Ende dyne broeders des stams Leui, dijns vaders, saltu tot dy nemen, dat sy by dy zijn, ende dy dienen: du dan, ende dyne sonen met dy, voor der hutte des Ghetuygenissen.

a Numeri 3.a.6. ende 16.a.9.

3

^b Ende sy sullen dijns diensts ende des diensts der gantscher hutten ^c wachten, doch tot de ^* vaten des Heylichdoms, ende tot den Altaer en sullen sy hen niet ghenaken, dat beyde sy ende ghy niet en sterft.

b Deutero.18.a.5.

c Of, waernemen, acht hebben.

* ghereetschap.

4

Maer sy sullen by dy zijn, dat sy des diensts wachten in der hutten des ^d† Bescheyts, in allen ampte der hutten: ende gheen vreemde en sal hem tot v ghenaken.

d† And. Stifts, of getuygenisses.

5

So wacht nu den dienst des Heylichdoms, ende den dienst des Altaers, dat daer nu voortaen niet meer een woeden en kome ouer de kinderen Israels.

6

Want siet, ick hebbe de Leuiten uwe broederen ghenomen wt den kinderen Israels, ende v ghegheuen, den Heere ten gheschencke, dat sy des ampts hanteren inder hutten des Bescheyts.

7

Du daerenteghen ende dyne sonen met dy, sults ws Priesterdoms wachten, dat ghy dient in allerley handel des Altaers, ende inwendich achter den voorhanck: want uwe Priesterdom gheue ick v ten ampte voor een gaue: wanneer hem een vreemde hier toe maect, die sal steruen.

8

Ende de Heere seyde tot Aaron: ^e hebbe dy ghegheuen mijn Hefoffer, van allen dat de kinderen Israels heylighen, voor dijn Priesterlicke ampt, ende dyne sonen, ten eewighen rechte.

e Leuitic. 6.b.17.

[fol. 51v]

9

Dat saltu hebben van de alderheylichsten dat sy offeren: ⁺ alle hare gaue, met allen haren spijsoffer, ende met alle haren sondoffer, ende met allen haren schuldtoffer, dat sy my gheuen, dat sal dy ende dynen sonen het alderheylichste zijn.

+ Wat de Priester ende de Leuiten voor haren dienst hebben sullen.

B.10

Aen de alderheylichste plaetse saltu het eten: wat mannelick is, sal daer van eten, want het sal dy heylich zijn.

11

^f Ick hebbe oock het hefoffer harer gaue, aen allen beweechofferen der kinderen Israels, dy ende dyne sonen, ende dynen dochteren ghegheuen, met dy ten eeuwigen rechte: wie reyn is in dynen huyse, die sal daervan eten.

f Leuitic. 7.d.34.

12

Alle de beste olye, ende alle besten most, ende koorne haerder eerstelinghen, die sy den Heere gheuen, hebbe ick dy ghegheuen.

13

De eerste vrucht alle des, dat in haren lande is, dat sy den Heere brenghen, sal dyne zijn: wie reyn is in dynen huyse, sal daer van eten.

14

Alle het verbannen in Israel, sal dyne zijn.

15

^g Alle dat zijn moeder breect onder allen vleesche, dat sy den Heere brenghen, het zy mensch oft vee, dat sal dyne zijn: doch dat du de eerste menschen vrucht lossen latest, ende de eerste vrucht eens onreynen vees oock lossen latest.

g Exod. 34.b.19.

16

Sy sullent doch lossen, alst een maent oudt is: ende salt het te lossen gheuen voor ghelt, voor vijf sikel, na den sikel des Heylichdoms, ^h die gelt twintich Gera.

h Exodi. 30.b.13. Leuitici. 27.c.25. Numeri.3.e.47. Hesek. 45.b.12.

17

Nu de eerste vrucht van eenen osse, oft lam, oft gheyte, en saltu niet te lossen gheuen, want sy zijn heylich: haer bloet saltu sprengen op den Altaer, ende haer vette saltu aensteken ten offer des soeten reucx den Heere.

18

Haer vleesch sal dyne sijn, ghelijck als oock de bewegheborst, ende de rechte schouder dyne is.

19

Alle hefoffer die de kinderen Israels heylighen den Heere, hebbe ick dy ghegheuen, ende dynen sonen, ende dynen dochteren met dy, ten eeuwighen rechte: dat sal een ⁱ onuerganckelick verbont zijn, eeuwich voor den Heere, dy, ende dynen zade met dy:

i In Hebreisch heet dat een soutverbont, also dat ghelijck het sout het vlees onuerganckelick behoudt, also sal oock dit verbont onuerganckelick zijn. So spreeckt de schrift oock, 2.Parali. 13. God heeft het rijcke Dauid ghegeuen end den synen met eenen soutuerbonde.

C.20

Ende de Heere sprack tot Aaron: ^k Du salt in haren lande niets besitten, oock gheen deel onder hen hebben: want ick ben dijn deel, ende dijn erfgoet onder den kinderen Israels.

k Deuter. 10.a.9. ende 18.a.1. Iosu. 13.b.14.d.33 Hesek. 44.c.28.

21

De kinderen Leui daerenteghen hebbe ick alle thienden ghegheuen in Israel ten erfgoede, voor haer ampt dat sy my doen inder hutten des Bescheyts.

22

Dat hen nu voortaen de kinderen Israels niet en ghenaken tot der hutten des Bescheyts, om sonde op hen te laden, ende steruen.

23

Maer de Leuiten sullen des ampts bedienen inder hutten des Bescheyts, ende sy sullen ghener misdaet draghen, ten eeuwighen rechte by uwen nakomelinghen, ^l ende sy sullen onder den kinderen Israels gheen erfgoet besitten.

l Actuum. 4.d.37

24

Want de thienden der kinderen Israels die sy den Heere heffen, ⁺ hebbe ick den Leuiten ten erfgoede ghegeuen: daerom hebbe ick tot hen gheseyt, dat sy onder den kinderen Israels gheen erfgoet besitten sullen.

+ De Priester ende Leuiten en hebben gheen erfgoet.

25

Ende de Heere sprack met Mose, ende seyde:

26

Segt den Leuiten, ende spreect tot hen: ⁺ Wanneer ghy de thienden neemt vanden kinderen Israels die ick v van hen ghegheuen hebbe tot uwen erfgoede, so sullet ghy daervan een hefoffer den Heere doen, telcken de thiende vanden thienden.

+ De Leuiten sullen de thienden offeren.

27

Ende sullet sulck uwen hefoffer achten, als gaeft ghy koren wt der schure, ende ^m volheyt wt der wijnperssen.

m Dat is most, wijn, olie ende dierghelijcken.

28

Also sult ghy oock het hefoffer den Heere gheuen van allen uwen thienden die ghy neemt vanden kinderen Israels, dat ghy sulck hefoffer des Heeren den priester Aaron gheeft.

29

Van allen dat v ghegeuen wort, sult ghy den Heere allerley hefoffer geuen, van allen ⁿ besten dat daer van gheheylicht wort.

n Op Hebreisch heet dit, vette: daer wt oock de Rijckende vetten heeten, dat is, de beste inden volcke, Psalm. 17.b.10. ende. 78.c.21.

D.30

Ende spreeckt tot hen: Wanneer ghy also het beste daer van heffet, so salt den Leuiten gherekent worden, als een inkomen der schuren, ende als een inkomen der wijnperssen.

31

Ende moecht het eten in allen steden, ghy ende uwe kinderen: want het is uwen loon voor uwe ampt inder hutten des Bescheyts.

32

So en sult ghy gheen sonde op v laden aen het selue, wanneer ghy het beste daeruan heffet, ende niet onwijhet het gheheylichde der kinderen Israels, ende niet en sterft.