Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xv. Capittel.

1. Uan menigherley offeren, ende hoe vele tot eenen yeghelicken spijse oft dranckoffer behoort, 22. van onwetenheyt ende ghebreckelickheyt die God in synen volcke lijdet, 30. ende sonde door moetwil, 32. een Sabbatbreker wert ghedoodt, 37. de Heere heet ghedenckteeckenen maken aen de kleederen.

A.1

ENde de Heere sprack met Mose, ⁺ ende seyde:

+ Kerckenrecht.

2

Spreect met den kinderen Israels, ende segt to hen: Wanneer ghy int lant uwer wooninghe koemt, dat ick v gheuen sal,

3

Ende willet den Heere offer doen, het zy een brantoffer, oft een offer tot een bysonder belofte, oft een vrijwillich offer, oft uwe Feestoffer, op dat ghy den Heere eenen sueten reuck maect, van runderen oft van schapen.

4

^a Wie nu zijn gaue den Heere offeren wil, die sal het spijsoffer doen, een tienden ^b semelmeels ghemengt met olye, eens vierdendeels van Hin:

a Leuitic. 2.a.1. ende 6.b.14.

b Of, meelbloemen.

5

Ende wijn ten dranckoffer, oock eens vierden deels van Hin, ten brandtoffer, oft ten offer, daer een lam gheoffert wort.

6

Daer nu eenen Ram gheoffert wordt, saltu het spijsoffer maken, twee thienden semelmeels met olye ghemengt, eens derdendeels van Hin:

7

Ende wijn ten dranckoffer, oock des derdendeels van Hin, dat saltu den Heere ten sueten reucke offeren.

8

Wiltu dan een rundt ten brantoffer, oft tot een bysonder beloftoffer, of ten danckoffer den Heere maken,

9

So saltu tot den runde een spijsoffer doen, den thienden semelmeels, ghemengt met olye eens haluen Hin.

B.10

Ende wijn ten dranckoffer, oock een half Hin: dat is een offer den Heere ten sueten reucke.

11

Also saltu doen met eenen osse, met eenen ramme, met eenen schape, van lammeren ende gheyten.

12

Daer na het ghetal is deses offers, daer na sal oock het ghetal der [spijsofferen ende dranckofferen] zijn.

13

Wie een lantbesitter is, die sal sulcx doen, dat hy den Heere offere een offer ten sueten reucke.

14

Ende oft een vreemdelinck by v woont, oft onder v by uwen vrienden is, ende wil den Heere een offer ten sueten reucke doen, die sal doen als ^c† sy doen.

c† And. ghy doet.

15

Der gantscher menichte zy een Wet, beyde v ende den vreemdelinghen: een eeuwighe Wet sal dat zijn uwen nakomelinghen, dat voor den Heere de vreemdelinck zy, als ghy.

16

Een Wet, een recht sal v ende den vreemdelinck zijn, die by v woont.

17

Ende de Heere sprack met Mose, ende seyde:

18

Spreect met den kinderen Israels, ende segt tot hen: ^d Wanneer ghy int lant koemt daer ick v in brenghen sal,

d Exod. 23.c.25. Deutero. 8.b.10.

19

Dat ghy eet vanden broode des lants, so sult ghy den Heere een heffinghe gheuen,

C.20

Namelick, ws deechs eerstelinck, sult ghy eenen koeck ter heffinghe gheuen: ^e als de heffinghe vander schuren,

e Leuitic. 23.b.10.

21

Also sult ghy oock den Heere ws deechs eerstelinck ter heffinghe gheuen, ⁺ by uwen nakomelinghen.

+ Onwetenheyt ende ghebreckelickheyt duldet God hier in synen volcke.

22

^f Ende wanneer ghy door onwetenheyt deser gheboden erghens een niet en doet die de Heere tot Mose ghesproken heeft,

f Leuitic. 4.b.13.

23

Ende alles wat v de Heere door Mose gheboden heeft, vanden daghe aen, doe hy aenhief te ghebieden op uwe nakomelinghen.

24

Wanneer nu de menichte wat onwetende dede, so sal de gantsche menichte eenen ionghen osse wt den runderen ten brandoffer maken, ten sueten reucke den Heere, met synen spijsoffer ende drancoffer, als het recht is, ende eenen gheytenbock ten sondoffer.

25

Ende de Priester sal also de gantsche menichte der kinderen Israels versoenen, so salt hen vergheuen zijn, want het is een onwetenheyt: ende sullen sulcke haer gaue brenghen den Heere ten offer, ende haer sondoffer voor den Heere, ouer hare onwetenheyt.

26

So wort het vergheuen der gantscher menichte der kinderen Israels: daer toe oock den vreemdelinck, die onder v woont, dewijle het gantsche volck is in sulcker onwetenheyt.

27

^g Wanneer daerenteghen een ziele wt onwetenheyt sondighen sal, die sal een Iarige gheyte ten sondoffer brenghen.

g Leuitic. 4.c.27.

28

Ende de Priester sal sodanighe onwetende ziele versoenen met den sondoffer voor de onwetenheyt voor den Heere, dat hyse versoene, so sal het haer vergheuen worden.

29

Ende het sal een Wet zijn, dat ghy voor de onwetenheyt doen sult, beyde den lantbesitter onder den kinderen Israels, ende den vreemdelinck die onder v woont.

D.30

^h Wanneer oock een ziel wt ⁱ moetwille wat doet, het zy een landtbesitter oft vreemdelinck, die heeft den Heere ghelastert: sodanighe ziele sal wtgheroeyt worden wt haren volcke.

h Hebre. 10.c.26.

i Moetwillighe boosheyt, Dat is, een sonde die niet en wil sonde zijn, maer wil recht hebben, als der Ketters, ende Rotten sonde, welcke Gods woort ende Wet veranderen, ende na haren wille bedieden.

31

Want sy heeft des Heeren woort veracht, ende zijn ghebot laten varen: sy sal slechs wtgeroeyt worden, de schult sy hare.

32

Als nu de kinderen Israels inder woestijnen waren, vonden sy eenen man hout lesen aenden Sabbathdaghe.

33

Ende die hem daerop beuonden hadden, doe hy hout las, brachten hem tot Mosen ende Aaron, ende voor de gantscher menichte.

34

^k Ende sy leyden hem gheuanghen: want het en was niet klaer wtghedruckt, watmen met hem doen soude.

k Leuit. 24.b.12.

35

De Heere dan sprack tot Mose: Die man sal den doot steruen, de gantsche menichte sal hem steenen buyten den legher. ⁺

+ Hier wort ghedoodt de Sabbathbreker.

36

Doe brachte hem de gantsche menichte buy-

[fol. 50v]

ten voor den legher, ende steenichden hem dat hy sterf, als de Heere Mose gheboden hadde.

37

^l Ende de Heere sprack tot Mose:

l Deutero. 22.b.12 Matth. 23.a.4.

38

Spreect met den kinderen Israels, ende segt tot hen, dat sy hen ^m† lepkens maken aen de hoecken haerder kleederen, onder alle uwe nakomelinghen, ende ghele snoeren op de lepkens aen de hoecken maken.

m† And. lijstkens maken aenden gheeren harer etc. ende een blau snoerken op de lijstkens aenden gheere, etc.

39

Ende de lepkens sullen v daer toe dienen, dat ghyse aensiet, ende ghedencket aller gheboden des Heeren, ende doense, dat ghy niet ^n† na ws herten duncken, richtet, noch uwen ooghen nahoereert.

n† And. ws, etc. naspeuret.

E.40

Daerom sullet ghy ghedencken, ende doen alle myne gheboden, ende heylich zijn uwen Gode.

41

Ick de Heere uwe God die v wt Egypten lande gheleydt heeft, dat ick uwe God ware: ick de Heere uwe God.