Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvi. Capittel.

1. Korah ende syne rotten maken oproer van des Priesterdoms weghen, 5. Mose beroept hem op den Heere ende straft hen, 12. Dathan ende Abiram ontboden, bedrijuen schimp met Mose, 15. so bidt hy met thoorne teghen haer, 16. ende daechtse tsamen met Korah ende synen gantschen rotte, ende Aaron, met reuckwerck voor den Heere. 20. Die heet Mose, Aaron ende de gantsche menichte afstaen vander oproerischen wooninghe, ende beuesticht, 31, door grousame straffe derseluen, 35. ende der twee hondert ende vijftich die reuckwerck offerden, des Mose ordentlicke sendinghe, 37. Eleasar versmedet wt beuele des Heeren der verbranden roockpannen, ende behangt daer den Altaer mede ten gedenckteecken, 41. het volck murmureert ouer de gedoodde, 46. ende 14700. vergaen eer de plaghe voor Aarons roocken ghebetert kan worden.

A.1

ENde ^a Korah de sone Iezehar, ⁺ des soons Kahath des soons Leui, met tsamen Dathan ende Abiram, de sonen Eliab, ende On de sone Peleth, des soons Ruben.

a Nume. 27a.3. Syrac. 45.c.22. Iude b.11. 1.Corint. 10.b.10.

+ Korah ende zijn rot zijn oproerich.

2

Die verhieuen hen teghen Mose met sommighe mannen onder de kinderen Israels, twee hondert ende vijftich, de voorneemste der menichte, Raedtsheeren ende eerlicke lieden.

3

Ende sy vergaderden hen teghen Mosen ende Aaron, ende spraken tot hen: Ghy maeckt des te vele: ^b want de gantsche menichte is ouer al heylich, ende de Heere is onder hen: waerom verheft ghy v ouer de menichte des Heeren?

b Exodi 19.a.5.

4

Doe Mose dat hoorde, viel hy op zijn aenghesicht,

5

Ende sprack tot Korah ende tot synen gantschen rotte: Morghen sal de Heere kondt doen, wie syne zy, wie heylich zy, ende hem offeren sal, wien hy verkiest die hem offeren sal.

6

Dat doet: Neemt v pannen, Korah ende zijn gantsche rot,

7

Ende legt daer vyer in, ende legt daer reuckwerck op, voor den Heere, morghen: wien de Heere verkiest, die zy heylich: ghy makes des te vele, ghy kinderen Leui.

8

^c Ende Mose sprack tot Korah: Lieue, hoort doch ghy kinderen Leui.

c Numeri. 3.a.6.

9

^d Is v dat te ^e slecht, dat v de God Israels afghescheyden heeft, van de menichte Israels, dat ghy voor hem offeren sult, dat ghy dient in het ampt der wooninghe, ende voor de menichte henen tredet te dienen?

d Deutero. 18.a.5.

e Of, gheringhe, kleyne.

B.10

Hy heeft dy, ende alle dyne broederen de kinderen Leui met dy tot hem genomen, ende ghy soeckt nu oock het Priesterdom?

11

Du ende dijn gantsche rot maeckt een oproer teghen den Heere: wat is Aaron, dat ghy tegen hem murmureert?

12

Ende Mose schikte henen, ende liet Dathan ende Abiram eysschen, de sone Eliab: sy spraken daerentegen: Wy komen niet opwaerts.

13

Is dy dat te luttel, dat du ons wt den lande gheleydt hebst, daer melck ende honich in vloeyt, dat du ons doodest inder woestijne, du moest oock noch ouer ons heerschappen?

14

Hoe fijn hebstu ons ghebracht in een lant daer honich ende melck in vloeyt, ende hebst ons ackers ende wijnberghen tot erfdeel ghegeuen? wiltu den ^f lieden oock de ooghen wtbreken? wy en komen niet opwaerts.

f Numeri. 13.d.31.

15

Doe vergrimde Mose seer, ende sprack tot den Heere: Keert dy niet tot haren spijsoffer, ^g ick en hebbe niet eenen Esel van hen ghenomen, ende en hebbe haerder gheene noyt gheen leedt ghedaen.

g 1.Sam. 12.a.3.

16

Ende hy sprack tot Korah: Du ende dijn gantsche rot sullet morghen voor den Heere zijn: Du, ende sy oock, ende Aaron.

17

Ende een yeghelick neme zijn panne, ende legget daer reuckwerck op, ende treedt hier toe voor den Heere, een yeghelick met zijnder panne, dat zijn twee hondert ende vijftich pannen.

18

Ende een yeghelick nam zijn panne, ende leyde daer vyer in, ende leyde daer reuckwerck op, ende traden voor de deure der hutten des ^h Gescheyts: ende Mose ende Aaron oock.

h And. Stifts. of getuygenisses.

19

Ende Korah vergaderde teghen hen de gantsche menichte, voor de deure der hutten des Bescheydts: ende de heerlickheyt des Heeren verscheen voor der gantsche menichte.

C.20

Ende de Heere sprack met Mose ende Aaron, ende seyde:

21

Scheydet v van deser menichte, dat ickse haestelick verdelghe.

22

Sy vielen dan op haer aenghesicht, ⁺ ende spraken: Och God, du bist een God der gheesten alles vleeschs, oft een man ghesondicht heeft, wiltu daerom ouer de gantsche menichte woeden?

+ Mose ende Aarons ghebet.

23

Ende de Heere sprack met Mose, ende seyde:

24

Segt der menichte, ende spreeckt: Wijct rontomme van der wooninge Korah, ende Dathan ende Abiram.

25

Ende Mose stont op, ende ginck tot Dathan ende Abiram, ende de Oudtsten Israels volchden hem na:

26

Ende sprack met der menichte, ende seyde: Wijckt van den hutten deser godloosen menschen, ende en roert niet aen wat hare is, dat ghy niet misschien om en koemt erghens in haerder sonde eene.

27

Ende sy ghinghen op vander wooninghen Korah, Dathan ende Abiram. Maer Dathan ende Abiram ginghen wt, ende traden aen de deure haerder hutten met haren vrouwen, ende sonen ende kinderen.

28

Ende Mose sprack: Daer by sult ghy mercken, dat my de Heere ghesproken heeft, dat ick alle dese wercken doen soude, ende niet wt mijnder herten.

29

Ist dat sy steruen als alle menschen steruen, oft te huyse ghesocht, als alle menschen te huys ghesocht worden, so en heeft my de Heere niet ghesonden.

D.30

Sal daerenteghen de Heere wat niews doen, ⁺ dat de Aerde haren mont op doet, ende verslintse met allen dat sy hebben, dat sy leuendich onderwaerts in de Helle varen, so sult ghy bekennen, dat dese lieden den Heere ghelastert hebben.

+ De straffe Korah ende syner rotten.

31

ⁱ Ende als hy dese woorden hadde alle wtghesproken, scheurde de Aerde onder hen,

i Numeri 26.a.9. ende 27.a.3. Deuteron. 11.a.6. Psalm. 106.b.17.

32

Ende dede haren mont op, ende verslondtse met haren huysen, met allen menschen die by Korah waren, ende met alle hare haue.

[fol. 51r]

33

Ende voeren leuendich onder in de Helle, met allen dat sy hadden, ende de Aerde decktese toe, ende quamen om wt der menichte.

34

Ende het gantsche Israel, dat rondtom hen was, vloodt voor haer gheschrey: want sy spraken: Dat ons de Aerde oock niet en verslinde.

35

Daertoe voer het vyer wt vanden Heere, ⁺ ende verslondt de twee honder ende vijftich mannen, die het reuckwerck offerden.

+ 250. oproerighe vergaen, behaluen Korahs aenhanck.

36

Ende de Heere sprack met Mose, ende seyde:

37

Segt Eleaser den sone Aaron des Priesters, dat hy de pannen opneme wt den brande, ende stroye het vyer hier ende daer.

38

Want de pannen van sulcke sondaers, zijn gheheylicht door hare zielen, datmense tot breedt bleck slae, ende den Altaer daermede behange: want sy zijn gheoffert voor den Heere, ende gheheylicht, ende sullen den kinderen Israels ten teecken zijn.

39

Ende Eleaser de Priester nam de ^k metalen pannen, die de verbrandden gheoffert hadden, ende sloechse tot bleck om den Altaer te behangen.

k Of, coperen.

E.40

Ter ghedachtenisse der kinderen Israels: dat hem niemant vreemts hiertoe en ghenake, die niet en is vanden zade Aarons, te offeren reuckwerck voor den Heere, op dat het hem niet en ga als Korah ende synen Rotte, als de Heere hem gheseyt hadde door Mose.

41

Des anderen morghens nu, murmureerde de gantsche menichte der kinderen Israels tegen Mosen ende Aaron, ende spraken: Ghy hebt des Heeren volck ghedoodt.

42

Ende doe hen de menichte vergaderde tegen Mose ende Aaron, keerden sy hen tot der hutten des Bescheyts: ende siet, doe bedecktet de wolcke, ende de heerlickheyt des Heeren verscheen.

43

Ende Mose ende Aaron ginghen binnen in de hutte des Bescheyts.

44

Ende de Heere sprack met Mose, ende seyde:

45

Maeckt v wt deser menichte, ick wilse haest verdelghen: ende sy vielen op haer aenghesicht.

46

Ende Mose sprack tot Aaron: Neemt de panne, ende doet daer vyer in vanden Altaer, ende legt daer reuckwerck op, ^l ende gaet haestelick tot der menichte, ende versoentse: want het woeden is vanden Heere wtghegaen, ende de plage is aenghegaen.

l Sapient. 18.c.21.

47

^m Ende Aaron nam het, als hem Mose gheseyt hadde, ende liep midden onder de menichte (ende siet, de plage was aenghegaen onder den volcke) ende hy roockte, ende versoende het volck.

m Danie. 3.b.17.

48

Ende stont tusschen den dooden ende leuendighen, doe wert de plaghe ghebetert.

49

Dier nu, ⁺ die aen der plaghe ghestoruen waren, was veerthien duysent ende seuen hondert, wtghenomen die, die met Korah storuen.

+ 14700. der murmureerders vergaen.

50

Ende Aaron quam weder tot Mose, voor de deure der hutten des Bescheyts, ende de plaghe wert ⁿ ghebetert.

n Of, hiel op.