Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

1. Uan twee trompetten, ende hoemen die ghebruycken sal. 11. Hoe de kinderen Israels opbreken, ende reysen tot Paran, aen de lantpalen des lants dat hen toegheseyt was, 29. hoe Hobab Mose synen sweer zijn bede ontseyt, 35. ende Mose beyde int trecken ende rusten der kiste, den Heere bidt.

A.1

ENde de Heere sprack met Mose, ⁺ ende seyde:

+ Der Priesteren twee basuynen, bedieden de predicacie des Euangelij. Esaie 58.a.1.

2

^a Maect dy twee trompetten van dichten siluer, dat du harer gebruyct om de menichte te eysschen, ende wanneer het heyr opbreken sal.

a Esaie 58.a.1.

3

Wanneermen met beyden slechtelick blaest, so sal hem tot dy vergaderen de gantsche menichte, voor de deure der hutten des ^b† Bescheyts.

b† And. Stifts, of getuygenisses.

4

Wanneermen alleene met eener slechtelick blaest, so sullen hen tot dy vergaderen de Vorsten ende de Ouersten ouer de duysent in Israel.

5

Wanneer ghy dan trompettet, so sullen de leghers op breken, die teghent Oosten ligghen.

6

Ende wanneer ghy ten anderen male trompettet, so sullen de leghers opbreken, die tegent Suyden ligghen: want als sy reysen sullen, so sullet ghy trompetten.

7

^c Wanneer daerenteghen de menichte te vergaderen is, so sullet ghy slecht blasen, ende niet trompetten.

c Iudicum 3.c.27

8

Doch sulck blasen met den trompetten, sullen de sonen Aarons des Priesters doen: ende sal uwe recht zijn eewichlick by uwen nakomelinghen.

9

Wanneer ghy in eenen strijdt treckt in uwen lande, teghen uwe vyanden, die v ^d quellen, so sullet ghy trompetten metten trompetten, dat uwer ghedacht worde voor den Heere uwen God, ende verlost wordet van uwen vyanden.

d Of, leedt aen doen, verdrucken.

B.10

Desseluen ghelijcken, wanneer ghy vrolick zijt, aen uwen Feesten, ende in uwen Nieuwen maenden, so sullet ghy met de trompetten blasen, ouer uwe brandoffer ende danckoffer, dat het v ter ghedachtenisse zy voor uwen Gode: ick ben de Heere uwe God.

11

Aen den twintichsten daghe in der anderer maent, ⁺ des anderen Iaers, verhief haer de wolcke van der wooninghe der Ghetuyghenisse.

+ Van Sinai reysen sy tot Paran, aen de palen des lants dat hen beloeft was

12

^e Ende de kinderen Israels braken op, ende toghen wt der woestijne Sinai, ende de wolcke bleef in der woestijne Paran.

e Numeri 33.b.16 Deuteron. 1.a.6.

13

De eerste dan braken op, na den woorde des Heeren door Mosen. ⁺

+ Paran.

14

Namelicken, de baniere des legers der kinderen Iuda tooch ten eersten met haren heyre, ende ouer haer heyr was Nahesson, de sone Amminadab.

15

Ende ouer het heyr des stams der kinderen Isaschar, was Nethaneel de sone Zuar.

16

Ende ouer het heyr des stams der kinderen Sebulon, was Eliab de sone Helon.

17

^f Doe brackmen de wooninghe van malcanderen, ende de kinderen Gerson ende Merari toghen voort, ende droeghen de wooninghe.

f Numeri 4.a.5.

18

Daer na tooch de baniere des legers Ruben, met haren heyre, ende ouer haer heyr was EliZur, de sone Zedeur.

19

Ende ouer het heyr des stams der kinderen Simeon, was Selumiel, de sone ZuriSadai.

C.20

Ende Elisaph de sone ^g† Deguel, ouer het heyr des stams der kinderen Gad.

g† And. Dehuel, of Deuel.

21

Doe toghen oock de Kahathiten, ende droeghen het Heylichdom: ^h ende de ghene richteden de wooninghe op, tot dat dese na quamen.

h Daerentusschen dat de Kahathiters het Heylichdom her na droegen, waren dewijle de Gersoniters ende Merariters voorhenen, ende richteden de wooninge op, dat de Kahathiten met der Kiste de wooninge bereyt vonden.

22

Daer na tooch de baniere des leghers der kinderen Ephraim, met haren heyre, ende ouer haer heyr was Elisama, de sone Ammihud.

23

Ende Gamaliel de sone PedaZur, ouer het heyr des stams der kinderen Manasse.

24

Ende Abidan de sone Gideoni, ouer het heyr des stams der kinderen BenIamin.

25

Daer na tooch de baniere des leghers der kinderen Dan met haren heyre: ende so waren de leghers alle op, ende AhiEser de sone AmmiSadai, was ouer het heyr.

26

Ende Pagiel de sone Ochran, ouer het heyr des stams der kinderen Asser.

27

Ende Ahira de sone Enan, ouer het heyr des stams der kinderen Naphthali.

28

^i† So togen de kinderen Israels met haren heyre.

i† And. Dat is den tocht der kinderen Israels met haren heyren, so sy togen.

29

^k Ende Mose sprack tot synen sweer Hobab, den sone Reguel wt Midian: Wy trecken derwaerts aen de stede, daer de Heere van gheseyt heeft: ⁺ Ick wilse v gheuen: so koemt nu met ons, so willen wy het beste by dy doen: want de Heere heeft Israel wat goets toegheseyt.

k Exodi 2.c.

+ Hobab, Mose sweer.

D.30

Hy daerentegen antwoordde: ^l Ick wil niet met v, maer in mijn lant tot mijn maechschap trecken.

l Iudicum 1.b.16. 1.Samuel. 15.a.6.

31

Hy sprack: Lieue, en verlaet ons niet, want du weetst waer wy ons in de woestijne legheren sullen, ende salt onse ooghe zijn.

32

Ende wanneer du met ons treckest, wat de Heere goets aen ons doet, dat willen wy aen dy doen.

33

Also toghen sy vanden berghe des Heeren, ⁺ dry dachreysen, ende de Kiste des Verbonts des Heeren tooch voor hen henen de dry dachreysen, hen te wijsen waer sy rusten souden.

+ De Kiste gaet voor.

34

Ende de wolcke des Heeren was des daechs bouen hen, wanneer sy wt den legher toghen.

35

Ende wanneer de Kiste tooch, so sprack Mose: ^m Heere staet op, laet dyne vyanden verstroyt, ende die dy haten, vluchtich worden voor dy.

m Psalm. 68.a.2.

36

Ende wanneer sy rustede, so sprac hy: Koemt weder Heere tot de veelheyt der duysenden Israels.