Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

1. Paschenfeest houden wort den kinderen Israels gheboden, 6. den verhinderden de veerthiende dach in der anderder maent bestemmet, 13. ende den verachters hare straffe voorgheschreuen, 17. Uanden vyere ende wolcke inder wooninghe, ende wanneer sy reysden.

A.1

ENde de Heere sprack met Mose inder woestijne Sinai, ⁺ inden anderen Iare, daerna als sy wt Egypten lande ghetoghen waren, in der eerster maent, ende seyde:

+ Hier ghebiedt God den kinderen Israels, het Paschenfeest te houden.

2

^a Laet de kinderen Israels Paschen houden te syner tijt.

a Exo. 12.a.3.b.18. Leuitici 23.a.5. Numeri 28.b.16. Deuteron. 16.a.1.

3

Aen den veertienden daghe deser maent, tusschen den auont: te syner tijt sullen sy het houden, na aller syne settinghe ende rechten.

4

Ende Mose sprack met den kinderen Israels, dat sy het Paschen hielden.

5

Ende sy hielden Paschen, aenden veerthienden daghe der eerster maent aen den auont, in der woestijne Sinai: alles als de Heere Mose gheboden hadden, so deden de kinderen Israels.

6

Doe waren daer sommighe mannen onreyn, ouer eenen dooden mensche, dat sy gheenen Paschen houden en konden in dien dage: die traden voor Mose, ende Aaron desseluen daechs,

7

Ende spraken tot ^b† hem: Wy zijn onreyn ouer eenen dooden mensche: waerom sullen wy ^c minder zijn, dat wy onse gauen den Heere niet brenghen en ^d moeten, te syner tijt, onder den kinderen Israels.

b† Anders, hen.

c Of, snooder, verachtelicker, etc. And. gheweeret.

d Of, moghen.

8

Mose sprack tot hen: Staet stille, ick wil hooren, wat v de Heere ghebiet.

9

Ende de Heere sprack met Mose, ende seyde:

B.10

Segt den kinderen Israels, ende spreect: ^e Wanneer yemant onreyn ouer eenen dooden, oft verre van v ouer velt is, ofte onder uwen vrienden, die sal dannoch den Heere Paschen houden.

e 2.Parali. 30.a.1.

11

Doch dat inder anderer maent, ⁺ aen den veerthienden daghe tusschen den auont, ende sal het met ongheheuelden broode ende saussen eten.

+ Paschen in der anderde maent den verhinderden.

12

Ende sullen niets daer van ouerlaten totten morghen: ^f oock gheen been daer van breken, ende sullent na aller wijse des Paschen houden.

f Exod. 12.e.46. Ioan. 19.d.36.

13

Wie nu reyn, ende niet ouer velt en is, ende laet het aenstaen, het Paschen te houden, diens ziele sal wtgheroeyt worden van synen volcke, daerom dat hy zijn gaue den Heere niet ghebracht heeft te syner tijt: hy sal zijn sonde draghen.

14

Ende wanneer een vreemdelinck by v woont, die sal oock den Heere Paschen houden, ende salt houden na der settinghe ende recht des Paschen: dese settinge sal v ghelijck zijn, den vreemden als den landtbesitter.

15

^g Ende des daechs doe de wooninghe opghe-

g Exod. 40.d.34. 1.Regum. 8.b.10. Hesek. 9.a.3.

[fol. 48r]

richt wert, ⁺ bedecktese een wolcke op der hutten der Ghetuyghenisse, ende des auonts, tot aen den morghen was ouer de wooninghe een gedaente des vyers.

+ Van den vyere ende wolcken, ende wanneer sy reysden.

16

Also geschieddet doorgaens, datse de wolcke bedeckte, ende des nachts de ghedaente des vyers.

17

Ende wanneer haer de wolcke ophief vander hutten, so toghen de kinderen Israels: ende aen welcker plaetse de wolcke bleef, daer legherden hen de kinderen Israels.

18

Na den woorde des Heeren toghen de kinderen Israels, ende na synen woorde, legherden sy hen: so langhe de wolcke op de wooninge bleef, so langhe laghen sy stille.

19

^h Ende wanneer de wolcke veel daghen vertooch op der wooninghe, so ⁱ wachteden de kinderen Israels op de wacht des Heeren, ende en toghen niet.

h 1.Corint. 10.a.1.

i Of, hadden acht

C.20

Ende wanneert quam, dat de wolcke op de wooninghe was, eenich ghetal der daghen, so legherden sy hen na den woorde des Heeren, ende toghen na den woorde des Heeren. ⁺

+ Alles na den woorde des Heeren. Dat aenmerckt wel.

21

Wanneer de wolcke daer was, vanden auont totten morgen, ende haer dan verhief, so toghen sy: oft wanneer sy haer des daechs oft des nachts verhief, so toghen sy oock.

22

Wanneer sy oock twee dagen, oft een maent, oft somwijlen langhe op de wooninghe bleef, so laghen de kinderen Israels, ende en toghen niet: ende wanneer sy haer verhief, so toghen sy.

23

Want na des Heeren monde laghen sy, ende na des Heeren monde, toghen sy, dat sy op des Heeren wacht wachteden, na des Heeren woort door Mose.