Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat viij. Capittel.

1. Uan het toerichten der lampen op den kandelaer, 6. van offeren ende reyninghe der Leuiten ten dienste des Heeren, 16. in de stede aller eerstegeboorten der kinderen Israels, 24. van der seluen ouderdom ende ontledighinghe aen den dienst der hutten.

A.1

ENde de Heere sprack met Mose, ende seyde:

2

Spreeckt met Aaron, ende segt tot hem: ^a Wanneer du de lampen op settest, so saltuse also setten, dat sy alle seuen ^b voorwaerts den kandelaer lichten.

a Exodus 25.d.31.

b Dat is, de tappen of snuyten aenden lampen, sal hy na den voorhanghe richten, dat het voor den kandelaer oft tusschen den kandelaer ende voorhanghe licht zy.

3

Ende Aaron dede also, ende settede de lampen op, voorwaerts den kandelaer te schijnen, als de Heere Mose gheboden hadde.

4

Ende de kandelaer was dicht gout, beyde synen schacht ende syne bloemen, na den ghesichte dat de Heere Mose ghewesen hadde: also maeckte hy den kandelaer.

5

Ende de Heere sprack met Mose, ende seyde:

6

Neemt de Leuiten wt den kinderen Israels, ⁺ ende reynichtse.

+ Der Leuiten reyninghe.

7

Also saltu dan met hen doen, dat duse reyninighest: Du salt ^c sondewater op hen sprengen, ende sullen alle hare hayren reyn af scheeren, ende wasschen hare kleederen, so zijn sy reyn.

c Ontsondighen is so vele als los spreken: daervan heetet water daer sy mede los ghesproken worden, sondewater.

8

Dan sullen sy nemen eenen ionghen osse, ende zijn spijsoffer ^d† meelbloemen met olye ghemengt: ende eenen anderen ionghen osse saltu ten sondoffer nemen.

d† and. semelmeel

9

Ende salt de Leuiten voor de hutte des ^e† Bescheydts brenghen, ende de gantsche menichte der kinderen Israels vergaderen.

e† And. Stifts, oft ghetuyghenisses.

B.10

Ende de Leuiten voor den Heere brenghen, ende de kinderen Israels sullen hare handen op de Leuiten legghen.

11

Ende Aaron sal de Leuiten voor den Heere beweghen, van den kinderen Israels, op dat sy dienen moghen, aen den ampte des Heeren.

12

Ende de Leuiten sullen hare handen op het hooft der ossen legghen, ende de eene sal ten sondoffer, de andere ten brandoffer den Heere ghemaect worden om de Leuiten te versoenen.

13

Ende salt de Leuiten voor Aaron, ende syne sonen setten, ende voor den Heere beweghen.

14

Ende saltse also scheyden vanden kinderen Israels, dat sy myne zijn.

15

Daer na sullen sy in gaen, dat sy dienen in der hutten des Bescheyts: also saltuse reynigen ende beweghen:

16

Want sy zijn mijn ghifte vanden kinderen Israels, ^f ende ick hebse my ghenomen, voor alle dat zijn moeder breeckt, namelicken, voor de eerstegheboorten aller kinderen Israels.

f Nu. 3.b.12.e.41.

17

^g Want alle eerstegeboorten onder den kinderen Israels, zijn myne, beyde der menschen ende des vees, sindt der tijt dat ick alle eerstegheboorten in Egypten lande, sloech, ende heylichdese my.

g Exodi 13.a.2. Numeri 3.b.13. Hesek. 44.d.30. Luce 2.c.23.

18

Ende nam de Leuiten aen, voor alle eerstegeboorten onder den kinderen Israels,

19

Ende gafse tot een ghifte Aaron ende synen sonen, wt den kinderen Israels, dat sy dienen aen den ampte der kinderen Israels, in der hutte des Bescheyts, de kinderen Israels te versoenen: op dat daer gheen plage en zy onder den kinderen Israels, so sy hen ghenaken wilden totten Heylichdom.

C.20

Ende Mose, met Aaron, met tsamen der gantscher menichte der kinderen Israels, deden met den Leuiten, alles, als de Heere Mose gheboden hadde.

21

Ende de Leuiten ontsondichden hen, ende wiesschen hare kleederen, ende Aaron beweechdese voor den Heere, ende versoendese, dat sy reyn werden.

22

Daer na ghinghen sy in, dat sy haer ampt deden inder hutten des Bescheydts, voor Aaron ende synen sonen: als de Heere Mose geboden hadde ouer de Leuiten, so deden sy met hen.

23

Ende de Heere sprack met Mose, ende seyde:

24

Dat isset, dat den Leuiten behoort, ^h van vijf ende twintich Iaren aen, ende daer bouen, zijn sy bequaem int heyr, ende ten dienste inder hutten des Bescheyts.

h Numeri 4.c.23

25

ⁱ Nu, vanden vijftichsten Iare aen, sullen sy ledich zijn vanden ampte des diensts, ende en sullen niet meer dienen:

i 1.Samue. 1.c.23.

26

Maer op den dienst harer broederen ^k wachten, inder hutten des Bescheyts, des ampts ymmers en sullen sy niet bedienen: also saltu met den Leuiten doen, dat een yeghelick syne wacht waer neme.

k Of, acht hebben.