Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. Uan de Wet der Nazareers, ende hare ordeninghe, 23. van des Priesters seghen totten volcke.

A.1

ENde de Heere sprac met Mose, ende seyde:

2

Segt den kinderen Israels, ende spreect tot hen: Wanneer een man ofte wijf ^a een sonderlicke belofte doet den Heere, hen te onthouden,

a Dese heet op Hebreisch Neser, ende diese houdt Nasir: na welcken oock onse Heere Iesus Christus Nazarenus heet, ende hy is de rechte Nasir. And. hem eens besonderen hooghen dincx onderstaet te belouen een afsonderinghe, dat hy des Heeren afghesonderde zijn wil.

3

Die sal hem van wijn ende stercken dranck onthouden, ^b wijnedick oft stercken drancks edick, en sal hy oock diet drincken, oock niets dat wt wijnbezien ghemaeckt wort: hy en sal noch verssche noch dorre wijnbezien eten,

b Iudic. 13.a.4.b.14. Amos. 2.b.12.

4

So langhe zijn belofte ^c† duert: oock en sal hy niets eten datmen vanden wijnstock maect, noch wijnkeernen, noch basten.

c† Anders, duert sal hy, etc.

5

^d So lange als den tijt sulcker syner beloften duert, en sal gheen scheermes op zijn hooft komen, tot dat den tijt wt zy, die hy den Heere beloeft heeft: want hy is heylich, ende sal het hayr op synen hoofde vrij laten wassen,

d Leuitici 21.a.5. Iudic. 13.a.5.

6

^e Den gantschen tijt ouer, die hy den Heere beloeft heeft, en sal hy tot gheenen dooden gaen.

e Leuitici. 21.a.1. Hesek. 44.c.25.

7

Hy en sal hem oock niet verontreynigen aen den doot zijns vaders, syner moeder, zijns broeders, oft syner suster: want de belofte zijns Gods is op synen hoofde.

8

Ende den gantschen tijt ouer syner beloften, sal hy den Heere heylich zijn.

9

Ende oft yemant voor hem onuersiens haestelick sterft, so wordt het hooft syner beloften verontreynicht: ^f daerom sal hy zijn hooft bescheeren, aen den daghe zijnder reyninge, dat is, aen den seuenden daghe.

f Actuum 18.b.18. ende 21.c.24.

B.10

Ende aen den achtsten dage sal hy twee Tortelduyuen brengen, oft twee ionge duyuen, totten Priester voor der deure der hutten des ^g† Bescheyts.

g† And. Stifts, of getuygenisses.

[fol. 46v]

11

Ende de Priester sal de eene ten sondoffer, ende de ander ten brantoffer maken, ende hem versoenen, daerom dat hy hem aen eenen dooden besondicht heeft, ende also zijn hooft desseluen daechs heylighen:

12

Dat hy den Heere den tijt syner gheloften wthoude: ende sal een Iarich lam brenghen ten schultoffer, doch de verganghen daghen sullen te vergheefs zijn, daerom dat zijn ghelofte verontreynicht is.

13

Dit is de Wet des ^h† verloefden: Wanneer de tijt syner gheloften wt is, so sal men hem brenghen voor de deure der hutten des Bescheyts.

h† anders, afghesonderden:

14

Ende hy sal brenghen zijn offer den Heere, een Iarich lam sonder vlecke ten brantoffer, ende een Iarich schaep sonder vlecke, ten sondoffer, ende eenen Ram sonder vlecke, ten danckoffer.

15

Ende eenen korf met ongheheuelde koecken van ⁱ meelbloeme met olye ghemengt, ende ongheheuelde vladen, met olye bestreken, ende haer spijseoffer ende dranckoffer.

i Of, semelmeels

16

Ende de Priester salt voor den Heere brenghen, ende sal zijn sondoffer ende zijn brandoffer maken.

17

Ende den Ram sal hy ten dranckoffer maken den Heere, met tsamen den korf des ongheheuelden broots, ende sal oock zijn spijsoffer ende dranckoffer maken.

18

^k Ende sal den verloefden het hooft syner geloften bescheeren, voor der deure der hutten des Bescheyts, ende sal het hoofthayr syner gheloften nemen, ende op het vyer worpen, dat onder den danckoffer is.

k Actuum. 21.c.24.

19

Ende sal de ghekoockte schouder nemen van den Ram, ende eenen ongheheuelden koeck wt den korue, ende een ongheheuelde vlade, ende salt den verloefden op syne handen leggen, daer na wanner hy zijn ghelofte af gheschoren heeft.

C.20

Ende salt voor den Heere beweghen: dat is heylich den Priester met der bewegheborst, ende der hefschouderen: daer na mach de verloefde wijn drincken.

21

Dat is de Wet des verloefden, die zijn offer den Heere gheloeft van weghen syner gheloften, buyten dat ghene, wat hy anders vermach: als hy gheloeft heeft, sal hy doen, na de Wet syner gheloften.

22

Ende de Heere sprack met Mose, ende seyde:

23

Segt Aaron ende synen sonen, ⁺ ende spreect: Also sult ghy seggen tot den kinderen Israels, wanneer ghyse seghenet:

+ Der Priesters seghen totten volcke.

24

^l De Heere seghene dy, ende behoede dy.

l Syrach. 36.b.19. Psalm. 115.b.12.

25

De Heere late zijn aenghesichte lichten ouer dy, ende zy dy ghenadich.

26

De Heere heffe zijn aenghesicht ouer dy, ende gheue dy vrede.

27

Want ghy sult mynen naem op de kinderen Israels legghen, dat ickse seghene.