Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Wat lieden men wt den legher doen ende vermijden sal, 5. van bekentenisse der sonden aen den mensche begaen, ende vernoeghinghe ouer derseluen, 12. van ijuer offer eens mans, die van zijns wijfs eere quaet vermoeden heeft, 16. ende wroechandel des priesters aen derseluer.

A.1

ENde de Heere sprac met Mose, ⁺ ende seyde:

+ Malaetsheyt te vermijden:

2

Ghebiet den kinderen Israels ^a dat sy wt den legher brengen alle malaetschen, ende alle die etteruloeden hebben, ende die aen den dooden onreyn gheworden zijn.

a Leuitici 13.e.46 2.Paralip. 26.c.21

3

Beyde mans ende vrouwen sullen sy buyten brengen, voor den legher, dat sy haren leger niet en verontreynigen, daer ick onder hen in woone.

4

Ende de kinderen Israels deden also, ende brachtense buyten voor den leger, als de Heere tot Mose gheseyt hadde.

5

Ende de Heere sprack met Mose, ende seyde:

6

Segt den kinderen Israels, ⁺ [ende spreect tot hen:] ^b Wanner een man oft vrouwe erghens een sonde teghen eenen mensche doet, ende hem aen den Heere daer mede besondicht, so heeft die ziele een schult op haer.

+ Schuldtoffer.

b Leuitici 6.a.3.

7

^c Ende sy sullen haer sonde bekennen die sy ghedaen hebben, ende sullen haer schult versoenen met der hooftsumme, ende daer bouen het vijfste deel daer toe doen, ende dien gheuen, aen dien sy hen verschuldicht hebben.

c Leuitici 5.a.5.

8

Is dan niemant daer, dien men de schult betalen soude, so salmen het den Heere gheuen voor den Priester, noch ouer den Ram der versoeninghe daer hy mede versoent wort.

9

Desghelijcken sal alle heffinghe van alle dat de kinderen Israels heylighen, ende den Priester offeren, syne zijn.

B.10

Ende wie wat heylicht, dat sal oock syne zijn: ende wie den Priester wat geeft, dat sal ooc syne zijn.

11

Ende de Heere sprack met Mose, ende seyde:

12

Segt den kinderen Israels, ende spreeckt tot hen: ^d Wanneer ergens eens mans wijf haer verliepe, ⁺ ende haer aen hem besondichde,

d Deuter. 22.b.13.

+ Een grouwelic ijueroffer, wanneer een man zijn wijf niet en gheloofde, der eeren haluen.

13

Ende haer yemant vleesschelicken besliepe, ende het werde doch den man verborghen voor synen ooghen, ende wort bedeckt dat sy onreyn gheworden is, ende en kanse niet ouertuyghen, want sy en is daer niet in begrepen,

14

Ende de ^e ijuergheest ontsteeckt hem, dat hy om zijn wijf ^f ijuert, sy zy onreyn oft niet onreyn,

e Of, heftighen hertbrant.

f Of, met hertbrant ontsteken wort,

15

So sal hyse totten Priester brengen, ende een offer ouer haer brenghen, den thienden Epha gherstenmeels, ende en sal gheen olye daer op gieten, noch wieroock daer op leggen: want het is een ijueroffer, ende ^g een wroegheoffer dat de misdaet wroecht.

g Wroeghen heet hier, openbaren, verklaghen, ende de sonde aen den dach brenghen. Anders, denckoffer dat de misdaet gedenckt.

16

So salse de Priester hiertoe brengen, ende voor den Heere setten,

17

Ende des ^h heylighen waters nemen in een Aerden vat, ende stof vanden vloer der wooninghe int water doen,

h Nume. 19.b.10.

18

Ende sal dat wijf voor den Heere setten, ende haer hooft ontblooten, ende dat wroegeoffer dat een ijueroffer is, op haer hant legghen, ende de Priester sal in syner hant, bitter veruloeckt water hebben,

19

Ende sal dat wijf besweeren, ende tot haer segghen: Heeft dy gheen man beslapen, ende bist van dynen manne niet geloopen, dat du dy verontreynicht hebst, so en sullen dy dese bittere veruloeckte wateren, niet schaden.

C.20

So du daerenteghen van dynen manne bist gheloopen, dat du onreyn bist, ende heeft dy yemant beslapen, behaluen dijn man,

21

(So sal de Priester dat wijf besweeren met sulcken vloeck, ende sal tot haer segghen:) De Heere sette dy ten vloecke ende ter vermaledijdinghe onder dynen volcke, dat de Heere dyne heupe ^i† veruuylen, ende dynen buyck swellen late:

i† And. veruallen

22

So gae nu dat veruloeckte water in dijn lijf, dat dynen buyck swelle, ende dyne heupe veruuyle: ende dat wijf sal segghen: Amen, amen.

23

Also sal de Priester desen vloeck op een ^k† cedel schrijuen, ende met den bitteren water afwasschen,

k† And. boeck, etc.

24

Ende sal den wijue, vanden bitteren veruloeckten water te drincken geuen: ^l† ende wanneer dat veruloeckte bitter water in haer ghegaen is,

l† and. dat dat, etc. in haer gae.

25

So sal de Priester van harer hant dat ijueroffer nemen, ende ten spijsoffer voor den Heere beweghen, ende op den Altaer offeren.

26

Namelicken, hy sal een hant vol des spijsoffers nemen tot haren wroegeoffer, ende op den Altaer aensteken, ende daer na den wijue dat water te drincken gheuen.

27

Ende wanneer sy dat water gedroncken heeft, is sy onreyn, ende heeft haer aen haren man besondicht, so sal dat veruloecte water in haer gaen, ende haer bitter zijn, dat haer den buyck swellen ende de heupe veruuylen sullen, ende dat wijf sal eenen vloeck zijn onder haren volcke.

28

Is daerenteghen een sodanich wijf niet verontreynicht, maer reyn, so en sal het haer niet schaden, dat sy kan ^m swangher worden.

m Of, met kinde.

29

Dat is de ijuerwet, als een wijf van haren man loopt, ende onreyn wort.

D.30

Oft als eenen man den ijuergheest ontsteect, dat hy om zijn wijf ijuert: dat hyse sette voor den Heere, ende de Priester met haer, alles na dese Wet.

31

Ende de man sal ontschuldich zijn aen der misdaet, daerenteghen dat wijf sal haer misdaet draghen.