Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

2. Der Kahathiter Leuiten, 15. Aaron ende syner sonen, 22. der Gersoniter, 29. ende der Merariten Leuiten, dienst ende ampt bestemt in het opbreken des heyrs, 34. der Kahathiter, 38. Gersoniter, 42. ende Merariter Leuiten summe, door Mose Aaron ende de Hooftlieden gheuonden.

A.1

ENde de Heere sprack met Mose ende Aaron, ⁺ ende seyde:

+ Ampt der Kahathiter Leuiten.

2

Neemt de summe der kinderen Kahath wt den kindere Leui, na haren gheslachten ende vaderen huysen,

3

Van dertich Iaren aen, ende daerbouen, tot int vijftichste Iaer, ⁺ alle die int heyr bequaem zijn, dat sy doen de wercken inder hutten des ^a† Bescheyts.

+ Hoemen de Hutte met de heylige gereetschap draghen sal.

a† And. Stifts, of getuygenisses.

4

Dat sal nu het ampt der kinderen Kahath in der hutten des Bescheyts zijn, dat het alderheylichste is.

5

^b Wanneer het heyr opbreeckt, so sal Aaron, ende zijn sonen daer in gaen, ende het voorhangsel af nemen, ende de kiste des Ghetuyghenisses daer in winden.

b Nume. 10.b.16. Hier wt ist openbaer, dat de inwendichste tapijten niet bont geweest en zijn, maer een yegelick heeft zijn eygen verwe alleen gehadt. Welcker gele is, die is gantsch ghele gheweest, ende welcker wit, die is gantsch wit gheweest.

6

Ende daerop decken het decksel van Dassenuellen, ende daer bouen op een gantsch ghele decsel wt breyden, ende zijn hantboomen daer toe leggen.

7

Ende ouer den Thoondisch oock een ghele decksel wt breyden, ende daer op setten de schotelen,

[fol. 45v]

lepelen, schalen, ende kannen, wt ende in te gieten, ende het daghelicx broot sal daer op liggen.

8

Ende sullen daer ouer breyden een rozijnroode decksel, ende dat selue bedecken met een decksel van Dassenuellen, ende syne hantboomen daer toe legghen.

9

Ende sullen een ghele decksel nemen, ende daer in winden den kandelaer des lichts, ende syne lampen met synen snutters ende bluschhoornen, ende alle olyuaten die totten ampte behooren.

B.10

Ende sullen om dat alle doen een decksel van Dassenuellen, ende sullense op hantboomen legghen.

11

Also sullen sy oock ouer den gulden Altaer, een ghele decksel wtbreyden, ende de selue bedecken met het decksel van Dassenuellen, ende syne hantboomen, daer toe legghen.

12

Alle de ghereetschap daer sy mede handelen in het Heylichdom, sullen sy nemen, ende ghele decksels daerouer doen, ende met een decksel van Dassenuellen bedecken, ende op hantboomen legghen.

13

Sy sullen oock de asschen vanden Altaer vaghen, ende een scharlaken decksel daer ouer breyden.

14

Ende alle zijn ghereetschap daer op legghen, daer sy mede daer op handelen, koolpannen, krauwels, ^† schoeffelen, beckenen, met alle ghereetschap des Altaers, ende sullen daer ouer breyden een decksel van Dassenuellen, ende syne hantboomen daer toe legghen.

† anders, bessems,

15

Wanneer nu Aaron ende syne sonen, sulcx wtghericht hebben, ende het Heylichdom, ende alle zijn ghereetschap bedeckt: ⁺ wanneer het heyr opbreeckt, daer na sullen de kinderen Kahath daer in gaen, dat sy ^c het draghen: ende en sullen het Heylichdom niet aenroeren, ^d dat sy niet steruen: dit zijn de lasten der kinderen Kahaths aen der hutten des Bescheyts.

+ Kahathiter.

c Numeri. 7.a.9.

d 2.Samu. 6.a.6.

16

Ende Eleasar Aarons des Priesters sone, sal het ampt hebben, dat hy ordinere de olie totten lichte, ende de specerie totten reuckwercke, ende het daghelicx spijsoffer, ende de salfolye: dat hy beschicke de gantsche wooninghe, ende alles wat daer in is, in het Heylichdom, ende syne ghereetschap.

17

Ende de Heere sprack met Mose, ende met Aaron, ende seyde:

18

Ghy sult den stamme des gheslachts der Kahathiters, hen niet laten verderuen, onder den Leuiten.

19

Maer dat sult ghy met hen doen, dat sy leuen ende niet en steruen, ist dat sy aenroeren het Alderheylichste: Aaron ende syne sonen sullen daer in gaen, ende ^e† eenen yeghelicken setten tot synen ampte ende last.

e† anders, het eenen yegelicken afsetten na synen, etc.

C.20

Sy daerenteghen en sullen daer niet in gaen, te sien ^f† onbedeckt het Heylichdom, dat sy niet en steruen.

f† anders, het Heylichdom, so ment inwindet.

21

Ende de Heere sprack met Mose [ende Aaron,] ende seyde:

22

Neemt de summe der kinderen Gerson oock, ⁺ na harer vaderen huysen ende gheslachten,

+ De Gersoniter Leuiten.

23

^g Van dertich Iaren aen, ende daerbouen, tot int vijftichste Iaer, ende ordineert alle, die ten heyre bequaem zijn, dat sy een ampt hebben in der hutten des Bescheyts.

g Nume. 8.c.24.

24

Dat sal dan des gheslachts der Gersoniters ampt zijn, dat sy handelen ende draghen.

25

Sy sullen de tapijten der wooninge, ende der hutten des Bescheyts dragen, ende zijn decksel, ende het decksel van Dassenuellen, dat daer bouen ouer is, ende het laken in der deure der hutten des Bescheyts.

26

Ende het omhangsel des voorhofs, ende het laken in der deure der poorten aen den voorhoue, dwelck rontom de wooninghe ende Altaer gaet, ende hare zeelen, ende alle de ghereetschap haers ampts, ende alles wat tot haren ampte behoort.

27

Na den woorde Aarons ende syner sonen, sal alle het ampt der kinderen Gerson gaen, alles wat sy draghen ende handelen sullen: ende ghy sullet ^h† toesien, dat sy alle haren last wachten.

h† and. ordineren.

28

Dat sal het ampt des geslachts der kinderen der Gersoniters zijn, in der hutten des Bescheyts, ende hare wacht sal onder der hant Ithamar zijn, ⁺ des soons Aarons des Priesters.

+ Ithamars ampt.

29

De kinderen Merari na haren geslachten ende vaders huysen, ⁺ saltu oock ordineren.

+ De Merariter Leuiten.

D.30

Van dertich Iaren aen, ende daer bouen tot int vijftichste Iaer, alle die int heyr bequaem zijn, dat sy een ampt hebben in der hutten des Bescheyts.

31

Op dese lasten dan sullen sy wachten, aen alle haer ampt in der hutten des Bescheyts, dat sy draghen de berderen der wooninge, ende rijchelen, ende de ⁱ calomnen, ende voeten.

i of, pilaer stijlen,

32

Daer toe de calomnen des voorhofs rontom, ende voeten, ende naghelen, ende zeelen, met alle haer ghereetschap, na alle haer ampt: eenen yeghelicken sult ghy zijn deel des lasts aen de ghereetschap, te wachten verordineren.

33

Dat sy het ampt der gheslachten der kinderen Merari, alles dat sy handelen in der hutten des Bescheyts, onder der hant Ithamar des Priesters, Aarons soons.

34

Ende Mose ende Aaron, ⁺ met tsamen den Hooftlieden der menichte, telden de kinderen der Kahathiters na haren gheslachten ende vaders huysen,

+ De summa der Kahatihiter Leuiten.

35

Van dertich Iaren aen, ende daer bouen, tot int vijftichste, alle die int heyr bequaem waren, dat sy een ampt in der hutte des Bescheyts hadden.

36

Ende de summe was, twee duysent, seuen hondert ende vijftich.

37

Dat is de summe der gheslachten der Kahathiters, ⁺ die alle te beschicken hadden in der hutten des Bescheyts, die Mose ende Aaron telden, na den woorde des Heeren door Mose.

+ De Gersoniter Leuiten.

38

De kinderen Gerson werden oock ghetelt, in haren gheslachten ende vaders huysen.

39

Van dertich Iaren ende daer bouen, tot int vijftichste, alle die int heyr bequaem waren, dat sy een ampt in der hutten des Bescheyts hadden.

E.40

Ende de summe was, twee duysent ses hondert ende dertich.

41

Dat is de summe der gheslachten der kinderen Gerson, die alle te beschicken hadden in der hutten des Bescheyts, welcke Mose ende Aaron telden, na den woorde des Heeren.

42

De kinderen Merari werden oock ghetelt, ⁺ na haren gheslachten ende vaders huysen.

+ Der Merariten Leuiten.

43

Van dertich Iaren aen, ende daer bouen, tot int vijftichste, alle die int heyr bequaem waren, dat sy een ampt in der hutten des Bescheyts hadden.

44

Ende de summe was, dry duysent ende twee hondert.

45

Dat is de summa des gheslachtes der kinderen Merari, die Mose ende Aaron telden, na den woorde des Heeren door Mose.

46

De summa aller Leuiten die Mose ende Aaron met den Hooftlieden Israels telden na haren gheslachten ende vaders huysen, ⁺

+ Summa aller Leuiten.

47

Van dertich Iaren ende daer bouen, tot int vijftichste, alle die, die inghinghen te doen, een yeghelick zijn ampt, ende te draghen den last in der hutten des Bescheyts,

48

Was, acht duysent, vijf hondert, ende tachtentich:

[fol. 46r]

49

Die ghetelt werden, na den woorde des Heeren door Mose, een yeghelick tot synen ampte ende last, als de Heere Mose gheboden hadde.