Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxiiij. Capittel.

1. Uan olye totten lampen ende candelaren, 5. ende twaelf toonbrooden, 10. van de Wet ouer het lasteren, wt oorsake eens lasteraers, 17. van straffe des dootslaechs ende anderen lijflicken schaden.

A.1

ENde de Heere sprac met Mose, ende seyde:

2

^a Ghebiet den kinderen Israels, dat sy tot dy brengen gestooten suyuer boomolie totten lichten, die bouen in de lampen daghelicx ghegoten werden,

a Exodi 27.c.20.

3

Buyten voor den voorhanck des Ghetuygenisses in der hutten des ^b† Bescheyts: ende Aaron salt toerichten des auonts ende des morgens voor den Heere alle tijdt: dat zy een eewich recht uwen nakomelinghen.

b† and. Sifts, of Getuygenisses

4

Hy sal dan de lampten op den suyueren candelaer toerichten, voor den Heere alle tijdt.

5

^c Ende salt ^d† meelbloeme nemen, ende twaelf koecken daer van backen, twee tienden sal een koeck hebben.

c Exodi 25.d.30.

d† an. semelmeel.

6

Ende saltse leggen telcken sesse op een ^e† geschick op den suyueren disch voor den Heere.

e† an. rije.

7

Ende salt op de selue leggen reynen wierooc, dat het zijn ^f Gedencbrooden, ten ^g vyere den Heere.

f Dat zijn de toonbrooden, welcker hier koecken heeten, daerom dat sy breet waren als koecken: ende zijn Dencbrooden, daerom dat sy daer mede Gode gedencken, ende van hem prediken souden. Gelijc als Christus ons beueelt, dat wy syner gedencken, dat is, synen doot verkondigen ende prediken souden.

g Dat is, offer.

8

Alle Sabbath voort ende voort, sal hyse toerichten voor den Heere, van den kinderen Israels, ten eewighen Verbonde.

9

^h Ende sullen Aarons ende syner sonen zijn, die sullense eten in de heylighe stede: want dat is zijn alderheylichste van den offeren des Heeren ten eewighen rechte.

h Exodi 29.d.32. Leuit. 8.d.31. 1.Sam. 21.a.6. Matth. 12.a.4.

B.10

Daer ginck ymmers eens Israelitischen wijfs sone wt, die eens Egyptischen mans kint was, onder den kinderen Israels, ende twistede in den legher met eenen Israelitischen manne,

11

ⁱ Ende lasterde den ^k Name, ende vloeckte: ^l doe brachten sy hem tot Mose: (doch syne moeder hiet Selomith, een dochter Debri, vanden stamme Dan.)

i Exodi 20.a.7.

k Dewijle daer gheen heyligher naem en is als Gods naem alleen, so seyt hy slecht, den Name.

l Leuit. 5.a.1.

12

^m Ende leyden hem geuangen, tot dat een klaer antwoort werdt door den mont des Heeren.

m Num. 15.d.34.

13

Ende de Heere sprack met Mose, ende seyde:

14

Brengt den vloecker buyten voor den legher, ende laet alle die het ghehoort hebben, hare handen op zijn hooft leggen, ende laet hem de gantsche menichte steenighen.

15

Ende segt de kinderen Israels: ^{+ n} Wie synen Gode vloeckt, die sal syne sonde draghen.

+ Gods lasteringhe verboden.

n Matth. 26.g.65 Ioan. 19.a.7.

16

Wie des Heeren Name lastert, die sal den doot steruen, de gantsche menichte sal hem steenigen: als de vreemdelinck, so sal ooc de lantbesitter zijn: wanneer hy den Name lastert, so sal hy steruen.

17

Wie ergens eenen mensche verslaet, ⁺ die sal den doot steruen.

+ Dootslach, ooc schade aen lijf ende goet verboden.

18

Wie daerentegen een vee verslaet, die salt betalen: lijf om lijf.

19

Ende wie synen naesten verleemt, dien salmen doen, als hy ghedaen heeft.

C.20

^o† Schade om schade, ooghe om ooghe, tandt om tant: als hy heeft eenen mensche verleemt, so salmen hem weder doen.

o† an. Breuck om breucke. Exodi 21.c.23. Deut. 19.c.21. Matth. 5.d.38. Iudicum 1.a.7.

21

Also, dat wie een vee verslaet, die salt betalen: wie eenen mensche verslaet, die sal steruen.

22

Dat sal eenerley recht onder v zijn, den vreemdelinck als den lantbesitter: want ick ben de Heere uwe God.

23

Mose seyde het den kinderen Israels: ende brachten den vloecker buyten voor den leger, ende steenichden hem: also deden de kinderen Israels, als de Heere Mose gheboden hadde.