Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xx. Capittel.

1. Straffe dier, die den Molech haer zaet (dat is, hare kinderen) geuen, 6. waersegghers gheloouen, 9. den ouderen vloecken, 10. ouerspel doen, 11. vaders ofte soons wijuen, 18. een maensuchtighe, 19. moeye, 20. of Ooms wijf beslapen, 13. Item, die buggerie drijuen, 14. dochter ende moeder te ghelijck, 17. suster, 21. of swagherinne nemen, 17. Item dier, die waerseggen of teeckenbedieden, 22. Israel sal hem na des Heeren settingen ende rechten houden, 24. ende een afgesondert volck zijn.

A.1

ENde de Heere sprac met Mose, ende seyde:

2

Segt den kinderen Israels: ^a Wie onder den kinderen Israels, of een vreemdelinc die in Israel woont, van synen zade den Molech gheeft, ⁺ die sal den doot steruen, het volck inden lande die sal hem steenen.

a Leuit. 18.c.21. 2.Regum 21.a.6. Psalm 106.d.37.

+ Molech.

3

Ende ick wil mijn aenschijn setten teghen sodanighen mensche, ⁺ ende wil hem wt synen volcke roeyen, dat hy den Molech van synen zade gegheuen, ende mijn Heylichdom verontreynicht, ende mynen heyligen Naem verontreynicht heeft.

+ Straffe dier, die den Molech haer zaet gegeuen hebben.

4

Ende so het volck inden lande door de vingeren sien worde met dien mensche, die van synen ^* zade den Molech gegheuen heeft, dat het hem niet doodde:

* dat is, syne kinderen.

5

So wil ick doch mijn aenschijn teghen denseluen mensche setten, ende teghen zijn gheslachte, ende wil hem, ende alle die hem ^b† na gehoereert hebben met den Molech, wt haren volcke roeyen.

b† Anders, met hem ghehoereert

6

Wanneer hem een ziele totten waersegghers ende teeckenbedieders keeren sal, ⁺ dat sy hem nahoereert, so wil ick mijn aenschijn tegen de selue ziele setten, ende wiltse wt haren volcke roeyen.

+ Straffe dier, die den waerseggers geloouen.

7

^c Daerom heylicht v, ende weest heylich: want ick ben de Heere uwe God.

c Leuitici 11.e.45 ende 19.a.2. 1.Petri 1.b.15. Numeri 11.b.18. Iosue 3.a.5.

8

Ende houdt myne insettinghen, ende doetse: want ick ben de Heere die v heylicht.

9

^d Wie synen vader of zijn moeder vloect, ⁺ die sal den doot steruen: zijn bloet zy op hem, daerom dat hy synen vader of moeder gheuloeckt heeft.

d Exodi 21.b.17. Deute. 21.b.18. ende 27.b.16 Prouerb. 20.c.20. Matthei 15.a.4.

+ Straffe dier, die synen ouderen vloeckt.

B.10

^e Wie ouerspel doet met yemants wijf, die sal den doot steruen, beyde de ouerspeelder ende de ouerspeedersche, daerom dat hy met zijns naesten wijf ouerspel ghedaen heeft.

e Deute. 22.c.22. Ioannis 8.a.5

11

^f Wanneer yemant by zijns vaders wijf slaept, ⁺ dat hy zijns vaders schaemte gebloot heeft, die sullen beyde den doot steruen: haer bloet zy op hen.

f Leuitici 18.a.8. 9 Deute. 22.d.30. ende 27.c.20.

+ Straffe des Ouerspels.

12

Wanneer yemant by zijns soons wijf slaept, die sullen beyde den doot steruen, want sy hebben een schande begaen: haer bloet zy op hen.

13

^g Wanneer yemant by eenen ionghen slaept, als by eenen wijue, die hebben eenen grouwel ghedaen, ende sullen beyde den doot steruen: haer bloet zy op hen.

g Leuitici 18.c.22 Roman. 1.c.26.

14

^h Wanneer yemant een wijf neemt, ende haer moeder daer toe, die heeft eenen laster begaen: men sal hem met vyere verbranden, ende haer beyde oock, dat daer gheenen laster en zy onder v.

h Leuitici 18.b.17

15

ⁱ Wanneer yemant by een vee leyt, die sal den doot steruen, ⁺ ende het vee salmen verworghen.

i Exodi 22.b.19 Leuitici 18.c.23. Deuter. 27.c.21.

+ Straffe der Sodomitischer sonde.

16

Wanneer een wijf haer erghens tot eenen vee maeckt, dat sy met hem te doen heeft, die saltu dooden, dat vee oock: den doot sullen sy steruen: haer bloet zy op hen.

17

Wanneer yemant zijn suster neemt, zijns vaders dochter, of zijnder moeder dochter, ende haer schaemte besiet, ende sy wederom zijn schaemte, dat is een bloedtschande: die sullen wtgheroeyt worden voor den lieden haers volcks: want hy heeft zijnder suster schaemte ontbloot, hy sal syne misdaet draghen.

18

^k Wanneer een man by eenen wijue slaept, ter tijt haerder krancheyt, ende ontbloot haer schaemte, ende ontdect haer fonteyne, ende sy ontbloot de fonteyne haer bloets, die sullen beyde wt haren volcke gheroeyt worden.

k Leuitici 15.c.24 ende 18.b.19

19

^l Dyner moeder suster schaemte, ende dijns vaders suster schaemte saltu niet ontblooten: want een sodanighe heeft zijn naeste bloeturiendinne ontdeckt, ende sy sullen haer misdaet draghen.

l Leuitici 18.b.12.

C.20

Wanneer yemant by zijns vaders broeders wijf slaept, die heeft zijns Ooms schaemte ontbloot, sy sullen hare sonde draghen, sonder kinderen sullen sy steruen.

21

^m Wanneer yemant zijns broeders wijf neemt, dat is een schandelicke daet: sy sullen sonder kinderen zijn, daerom dat hy heeft zijns broeders schaemte ontbloot.

m Leuit. 18.b.16. Matth. 14.a.4. Deuter. 25.a.5.

22

So houdt nu alle myne Wetten ende rechten, ende doet daer na, op dat v het landt niet wtspouwe, daer ick v in leyde, dat ghy daer in woont.

23

Ende wandelt niet in de wetten der Heydenen, die ick voor v wtstooten sal: ⁿ want sulcx alle hebben sy gedaen, ende ick hebbe eenen grouwel aen hen ghehadt.

n Deuter. 9.a.4.

24

V dan segge ick, Ghy sult gener lant besitten: want ick wil v een landt tot erue gheuen, daer melck ende honich in vloeyt: ick ben de Heere uwe God, die v vanden volcken afghesondert heeft,

25

Dat ghy oock afsonderen sult het reyn vee vanden onreynen, ende onreyne vogelen vanden reynen, ende uwe zielen niet verontreynigen aen vee, aen voghelen, ende aen allen dat op aerden kruypt, ^o dat ick v afgesondert hebbe, dat het onreyn zy.

o Leuitici 11.a.3. Deute. 14.a.4.

26

^p Daerom sult ghy my heylich zijn, want ick de Heere ben heylich, die v afghesondert heeft vanden volcken, op dat ghy mijn waret.

p Leuitici 19.a.2.

27

^q Wanneer een man of wijf een waerseggher of teeckenbedieder zijn sal, die sullen den doot steruen, men salse steenen: haer bloet zy op hen.

q Deuter. 18.b.10 1.Sam. 28.a.7. 2.Regum 21.a.6.