Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xviij. Capittel.

1. De Heere wil, zijn volck sal hem alleen na syne wijse ende rechten houden, 6. verbodene gradus der naeschap ende maechschap, met tsamen maensuchtigen, vermijden, 20. ende hem met gheen Ouerspel, Molechs offer, buggherie verontreynighen, 20. op dat sy niet, als de Heydenen, (die hen met sulcken grouwelen verontreynicht hebben) gestraft, ende wt den lande wtghespout worden.

A.1

ENde de Heere sprac met Mose, ende seyde:

2

Spreeckt met den kinderen Israels, ende segt tot hen: Ick ben de Heere uwe God.

3

Ghy en sult niet doen na de wercken des Egyptischen lants, daer ghy in ghewoont hebt, oock niet na de wercken des lants Canaan, daer ick v in leyden wil: ghy sult v oock na hare wijsen niet houden.

4

^a Maer na myne rechten sult ghy doen, ende myne insettingen sult ghy houden, dat ghy daer in wandelt: want ick bin de Heere uwe God:

a Ezech. 18.a.5

5

Daerom sult ghy myne insettingen houden, ende myne rechten: ^b want welck mensche deselue doet, die sal daer door leuen: want ick ben de Heere.

b Ezech. 20.b.11 Roman. 10.a.5 Galat. 3.b.12

6

Niemandt sal hem tot syner naester bloedturiendinne maken om hare schaemte te blooten: want ick ben de Heere. ⁺

+ Verbodene graden.

7

^c Du en salt dijns vaders ende dyner moeder schaemte niet blooten: het is dijn moeder, daerom saltu haer schaemte niet blooten.

c Gene. 19.d.33 Ezech. 22.b.10

[fol. 40r]

8

^d Du salt dijns vaders wijfs schaemte niet blooten, want het is dijns vaders schaemte.

d 1.Corint. 5.a.1 Leuitici 20.b.11 Deut. 22.d.30 ende 27.c.20

9

^e Du salt dyner ^f suster schaemte, die dijns vaders of dyner moeder dochter is, in huys of buyten huys gheboren, niet blooten.

e Deute. 27.c.22 2.Sam. 13.b.14

f Dese is de rechte stiefsuster beyder ouderen haluen, ende met de halue suster van vader of moeder.

B.10

Du salt dijns soons dochter, of dyner dochter dochter schaemte niet blooten: want het is dijn schaemte.

11

Du salt der ^g dochter dijns vaders wijf, die dynen vader gheboren is, ende dijn suster is, schaemte niet blooten.

g Dat is, de halue suster, mijns vaders rechte dochter, maer niet mijnder moeder dochter.

12

^h Du salt dijns vaders susters schaemte niet blooten, want het is dijns vaders naeste bloedtvriendinne.

h Leuitici 20 b.19

13

Du salt dyner moeder suster schaemte niet blooten, want het is dyner moeder naeste bloetvriendinne.

14

Du salt dijns vaders broeder schaemte niet blooten, dat du zijn wijf nemest, want sy is dijn moeye.

15

ⁱ Du salt dijns soons wijfs schaemte niet blooten, want het is dijns soons wijf: daerom saltu hare schaemte niet blooten.

i Gene. 28.b.18 Ezech. 22.b.11

16

^k Du salt dijns broeders wijfs schaemte niet blooten, want het is dijns broeders schaemte.

k Leuitici 20.c.21 Matthei 14.a.4 Deut. 25.a.5

17

Du salt dijns wijfs met tsamen haerder dochter schaemte niet blooten, noch haers soons dochter, of dochter dochter nemen, hare schaemte te blooten: want het is haer naeste bloeturiendinne, ende is eenen laster.

18

^l Du salt oock dijns wijfs suster niet nemen neuens haer, hare schaemte te blooten, ^m† haer te spijt, dewijle sy noch leeft.

l Gene. 29.c.29

m† Anders, haer te reytzen

19

ⁿ Du salt niet totten wijue gaen, ⁺ dewijle sy hare kranckheyt heeft, in haerder onreynicheyt, hare schaemte te blooten.

n Leuitici 15.c.24 ende 20.b.18 Ezech. 22.b.10

+ Maensuchtige te vermijden.

C.20

^o Du salt oock niet by dijns naesten wijf liggen, ⁺ om haer te bezaden, daermede du dy aen haer verontreynighest.

o 2.Sam. 11.a.4

+ Ouerspel verboden.

21

^p Du salt oock van dynen zade niet gheuen, dat het den ^q Molech verbrandt worde, dat du niet ontheylichst den naem dijns Gods; want ick ben de Heere.

p Leuitici 20.a.2 2.Regum 21.a.6 ende 23.b.10

q Molech was een Afgod, dien sy hare eyghene kinderen te dienste verbrandden, Als Manasse dede, de Koninc Iuda, ende meynden God daer mede te dienen, als Abraham, doe hy Isaac synen sone offerde, maer dewijle dat het God niet beuo en hadde, als hy Abraham dede, was het onrecht. Daerom spreeckt God dat synen naem daer door ontheylicht werdt, want het geschiedde onder Gods name, ende was doch Duyuelsch, gelijck als ooc de Kloesters belofte ende andere opsettinge der menschen vele lieden verderft, onder den Godlicke name, als of het Godsdienst ware.

22

^r Du salt niet by iongen ligghen, als by den wijue, want het is eenen grouwel.

r Roman. 1.c.26 Leuit. 20.b.13

23

^s Du salt oock by gheenen diere ligghen, dat du niet met hem verontreynicht wordest: ende gheen wijf en sal met eenen diere te doen hebben, want het is eenen grouwel.

s Exodi. 22.b.19. Deute. 27.c.21

24

Ghy en sult v in desen gheenen verontreynighen: want in allen desen hebben hen verontreynicht de Heydenen, die ick voor v henen wil wtstooten.

25

Ende het lant is daer door verontreynicht: ende ick wil hare misdaet aen hen te huys soecken, dat het lant zijn inwoonders wtspouwe:

26

Daerom houdt myne insettinghen ende rechten, ende doet niet dese grouwelen, noch de lantbesitter noch de vreemdelinck onder v.

27

Want alle sulcke grouwelen hebben de lieden deses lants gedaen, die voor v waren, ende hebben dat lant verontreynicht:

28

Op dat v dat lant oock niet wtspouwe, wanneer ghy het verontreynicht, ghelijck als het de Heydenen heeft wtgespoghen, die voor v waren.

29

Want die dese grouwelen doen, dier zielen sullen wtgheroeyt worden van haren volcke.

30

Daerom houdt myne insettinghen, dat ghy niet en doet na de grouwelicke zeden, die voor v waren, dat ghy daer niet mede verontreynicht wort, want ick ben de Heere uwe God.