Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvij. Capittel.

1. Datmen alle offer voortaen ter deure der wooninge brenghen sal, 10. datmen geen bloet noch aes eten en sal.

A.1

ENde de Heere sprac met Mose, ende seyde:

2

Segt Aaron ende synen sonen, ende allen kinderen Israels, ende spreeckt tot hen, Dat isset dat de Heere gheboden heeft:

3

Wie wt den huyse Israels eenen osse of lam of geyte slachtet inden leger, of buyten den leger,

4

Ende niet voor de deure der hutten des ^a† Bescheyts brengt, dat het den Heere ten offer ghebracht worde, voor de wooninge des Heeren, ^b die sal des bloets schuldich zijn, als die bloet vergoten heeft, ende een sulck mensche sal wtgeroeyt worden wt synen volcke.

a† Anders, Tuygenisse of Stifts

b Daer siestu dat hy niet wilt eyghenen ende selfs verkoren Godsdienst hebben, buyten synen verordenden Godsdienst, daerom noemt hy sulcken offer eenen moorder, so Esaies int 66. ca. oock doet.

5

Daerom sullen de kinderen Israels haren offer, die sy op den vrijen velde offeren willen, voor den Heere brenghen, voor de deure der hutten des Bescheyts totten ^c Priester, ende daer haren danckoffer den Heere offeren.

c Niet, sy selue wt eygender verkiesinghe ende deuocie.

6

Ende de Priester sal het bloet op den Altaer des Heeren sprengen, voor de deure der hutten des Bescheyts, ende het vette aensteken ten sueten reucke den Heere.

7

Ende geensins haren offer, nu voortaen den ^d veltduyuelen offeren, daer sy mede hoereren: dat sal hen een eewich recht zijn by haren nakomelingen.

d Hier worden verstaen Duyuelen die daer rumpelgheesten zijn, ende aen bysunderen plaetsen verschijnen, waer door sy Bedeuaert, valsche teeckenen ende beloften aenrichten, ende heeten op Hebreisch, Schirim, Latijnsch, fauni satyri, etcet.

8

Daerom saltu tot hen seggen: Welcke mensche wt den huyse Israels, of ooc een vreemdelinck, die onder v is, die een offer of brandtoffer doet,

9

Ende brengt het niet voor de deure der hutten des Bescheyts, dat hy het den Heere doe, die sal wtgheroeyt worden van synen volcke.

B.10

^e Ende welcke mensche, hy zy vanden huyse Israels of een vreemdelinck onder v, eenich bloet eet, tot dien wil ick mijn aenschijn setten, ⁺ ende wil hem midden wt synen volcke roeyen.

e Leuitici 7.a.6 ende 17.b.14

+ Bloed te eten verboden.

11

Want des lijfs leuen is inden bloede, ende ick hebbe het v ten Altaer ghegheuen, dat uwe zielen daermede versoent worden: want het bloedt is de versoeninghe voor het leuen.

12

Daerom hebbe ick gheseydt den kinderen Israels: Gheen ziele onder v, sal bloedt eten, oock gheen vreemdelinck die onder v woont.

13

Ende welcker mensche, hy zy vanden huyse Israels of een vreemdelinc onder v, die een dier of vogel vangt in der iacht, datmen eet, die sal desseluen bloet vergieten, ende met aerde bedecken,

14

Want des lijfs leuen is in synen bloede, so lange als het leeft, ⁺ ende ick hebbe den kinderen Israels gheseydt: ^f Ghy en sult gheens lijfs bloedt eten: want des lijfs leuen is in synen bloede: wie het eet, die sal wtgheroeyt worden.

+ Aes ofwat verstickt is, verboden te eten.

f Gene. 9.a.4 Leuitici 3.b.17 ende 19.c.26 Deute. 12.b.16 1.Sam. 14.d.32 Actuum 15.c.29

15

Ende welcke ziele een aes of dat van wildtwerck verscheurt is, eet, hy zy een lantbesitter of vreemdelinck, die sal zijn kleedt wasschen, ende hem met water baden, ende onreyn zijn tot op den auont, so wort hy reyn.

16

So hy syne kleederen niet wasschen, noch hem baden en sal, so sal hy zijn misdaet draghen.