Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xv. Capittel.

1. 16. Uan zaetuloeyighe mannen, ende dinghen, die sy of hen aenroeren, 13. van harer reyninge, 19. van bloetuloeten der vrouwen, 28. ende harer reyninghe.

A.1

ENde de Heere sprack met Mose ende Aaron, ⁺ ende seyde:

+ Andere onreynicheyt der mannen ende vrouwen.

2

Spreect met den kinderen Israels, ende segt tot hen: Als een man aen synen vleesche, eenen vloet heeft, deselue is onreyn:

3

Maer dan is hy onreyn aen desen vloet, als zijn vleesch vanden vloede ettert of verstopt is.

4

Alle legher daer hy op leyt, ende alles daer hy op sit, sal onreyn worden.

5

Ende wie synen legher aenroert, die sal syne kleederen wasschen, ende hem met water baden, ende onreyn zijn tot op den auont.

6

Ende wie hem set daer hy gheseten heeft, die sal syne kleederen wasschen, ende hem met water baden, ende onreyn zijn tot op den auont.

7

Wie zijn vleesch aenroert, die sal syne kleederen wasschen, ende hem met water baden, ende onreyn zijn tot op den auont.

8

Also hy zijn speecksel werpt op dien die reyn is, die sal syne kleederen wasschen, ende hem met water baden, ende onreyn zijn tot op den auondt.

9

Ende den zadel daer hy op rijdt, sal onreyn worden.

B.10

Ende wie ergens wat aenroert, dat onder hem is geweest, die sal onreyn zijn tot op den auont: ende wie sulcks draecht, die sal syne kleederen wasschen, ende hem met water baden, ende onreyn zijn tot op den auont.

[fol. 39r]

11

Ende wien hy aenroert, ende niet te voren de handen wasschet, die sal syne kleederen wasschen, ende hem met water baden, ende onreyn zijn tot op den auont.

12

Als hy een aerden vat aenroert, dat salmen breken, doch het houten vat salmen met water wasschen.

13

^a Ende als hy reyn wort van synen vloet, so sal hy seuen daghen tellen, na dien hy reyn geworden is, ende syne kleederen wasschen, ende zijn vleesch met vlietende water baden, so is hy reyn.

a Leuitici 6.c.28 ende 11.d.33.

14

Ende aen den achsten daghe sal hy twee tortelduyuen of twee ionghe duyuen nemen, ende voor den Heere brengen, voor de deure der hutten des ^b† Bescheyts, ende den Priester gheuen.

b† Anders, Ghetuygenisse, stifts

15

Ende de Priester sal wt de eene een sondoffer, wt de andere een brantoffer maken, ende hem versoenen voor den Heere, zijns vloets haluen.

16

Wanneer eenen manne in den slaep het zaet ontgaet, die sal zijn gantsch vleesch met water baden, ende onreyn zijn tot op den auont.

17

Ende al dat kleet, ende al dat vel, dat met sulcken zade beuleckt is, sal hy wasschen met water, ende onreyn zijn tot op den auont.

18

Een wijf, by welcker een sodanighe leyt, die sullen hen met water baden, ende onreyn zijn tot op den auondt.

19

Wanneer een wijf haers lijfs bloetuloet heeft, ⁺ die sal seuen dagen wech gedaen worden: wiese aenroert, die sal onreyn zijn tot op den auondt.

+ Bloeduloet der vrouwen.

C.20

Ende alles waer sy opleyt, so langhe als sy haren tijdt heeft, sal onreyn zijn, ende waer sy op sit, sal onreyn zijn.

21

Ende wie haren legher aenroert, die sal syne kleederen wasschen, ende hem met water baden, ende onreyn zijn tot op den auont.

22

Ende wie ergens wat aenroert, daer sy op geseten heeft, sal syne kleederen wasschen, ende hem met water baden, ende onreyn zijn tot op den auont.

23

^c Ende als een man by haer leyt, ende sy haren tijt krijcht by hem, die sal seuen dagen onreyn zijn,

c Leuitici 18.b.19

24

Ende den legher daer hy opgheleghen heeft, sal onreyn zijn.

25

^d Wanneer oock een wijf haren bloedtuloet eenen langen tijt heeft, niet alleen ter ghewoonlicker tijt, maer ooc ouer den gewoonlicken tijt, so sal sy onreyn zijn so langhe als zy vloeyt: gelijck als sy ter tijt harer afsonderinghe, so sal sy oock hier onreyn zijn.

d Matthei 9.c.20

26

Alle den leger daer sy op leyt den gantschen tijt haers vloets, sal zijn als den leger harer afsonderinghe: ende alles waer sy op sit, sal onreyn zijn, ghelijck de onreynicheyt haerder afsonderinge.

27

Wie van dien wat aenroert, die wort onreyn, ende sal syne kleederen wasschen, ende hem met water baden, ende onreyn zijn tot op den auont.

28

Wort sy nu reyn van haren vloet, so sal sy seuen daghen tellen, daer na sal sy reyn zijn.

29

Ende aen den achsten daghe al sy twee tortelduyuen of twee ionghe duyuen nemen, ende totten Priester brenghen voor de deure der hutten des Bescheyts.

D.30

Ende de Priester sal wt der eender maken een sondoffer, wt der anderer een brandtoffer, ende haer versoenen voor den Heere, ouer den vloedt harer onreynicheyt.

31

So sult ghy de kinderen Israels ^e† waerschouwen voor haerder onreynicheydt, dat sy niet en steruen in haerder onreynicheydt, als sy myne wooninghe onreyn maken, die onder v is.

e† Anders, afscheyden van etc.

32

Dat is de Wet ouer dien, die eenen vloet heeft, ende dien het zaet in den slaep ontgaet, dat hy reyn daeruan wort.

33

Ende ouer die, die haren bloetuloet heeft: ende wie eenen vloet heeft, het zy man of wijf, ende als een man by eender onreyner leyt.