Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiiij. Capittel.

Uan reyninge der malaetscheyt, ende wat offer hy geuen sal, 34. van malaetscheyt der huysen, ende harer reyninge.

A.1

ENde de Heere sprac met Mose, ende seyde:

2

Dat is de Wet ouer den malaetschen, als hy sal ghereynicht worden: ^a Hy sal ten Priester komen.

a Matthei 8.a.4 Marci 1.e.44 Luce 5.b.14 ende 17.b.14

3

Ende de Priester sal wt den leger gaen, ende besien hoe het teecken der malaetscheyt aen den malaetschen heel gheworden is.

4

Ende sal ghebieden dien die te reynighen is, dat hy twee leuendige voghelen neme, die daer reyn zijn, ende Cederen hout, ende rosijnuerwighe wolle, ende Ysop.

5

Ende sal gebieden, den eenen voghel te slachten in eenen aerden vate, aent vlietende water.

6

Ende sal den leuendighen vogel nemen met den Cederen houte, rozijnuerwigher wolle ende Ysop, ende in des gheslachteden voghels bloedt steken, aent vlietende water,

7

Ende besprengen den ghenen die vander malaetscheyt te reynighen is, seuenmael: ende reyninghen hem also, ende late den leuendigen voghel int vrij velt vlieghen.

8

De ghereynichde nu, sal syne kleederen wasschen, ende alle zijn hayr afscheeren, ende hem met water baden, so is hy reyn: daer na ga hy in den legher, doch sal hy buyten syne hutten seuen daghen blijuen.

9

Ende aen den seuenden daghe sal hy alle zijn hayr afscheeren op den hoofde, aen den baerde, aen den ^b ooghebrauwen, dat alle hayren afgeschoren zijn: ende sal syne kleederen wasschen, ende zijn vleesch in water baden, so is hy reyn.

b Of, wijnbrauwen

B.10

Ende aen den achtsten dage sal hy twee lammeren nemen sonder vlecke, ende een iarich schaep sonder vlecke, ende dry tienden ^c meelbloemen ten spijsoffer met olye gemengt, ende een ^d log olye.

c Of, semelmeel

d Log is een kleyne mate, op Hebreisch also ghenaemt: ende als K. Dauid seyt, veruaet 6. eyeren, Andere willen sy zy noch onseker hoe groot sy is,

11

So sal de Priester denseluen ghereynichden, ende dese dinghen setten voor den Heere, voor de deure der hutten des ^e† Bescheyts.

e† Anders, Tuyghenisse.

12

Ende sal het een lam nemen, ende ten schultoffer offeren met de log olye, ende sal sulcks voor den Heere beweghen.

13

Ende daer na dat lam slachten, daermen het sondoffer ende brandtoffer slachtet, naemlick, in der heyligher stede: want gelijck het sondoffer, also is oock het schultoffer des Priesters, want het is het Alderheylichste.

14

Ende de Priester sal vanden bloede nemen van den schuldtoffer, ende den ghereynichden op het lapken des rechteren oors strijcken, ende op den duym zijnder rechter hant, ende op den grooten teen zijns rechteren voets.

15

Daer na sal hy de olye wt den log nemen, ende op syne (des Priesters) slincker hant gieten,

16

Ende met synen rechteren vinger in de olye stippen die in syner slincker hant is, ende sprengen met synen vinger de olye seuenmael voor den Heere.

17

De olye nu die daer ouer is in syner handt, sal hy den ghereynichden op het lapken des rechteren oors strijcken, ende op den rechteren duym, ende op den grooten teen zijns rechteren voets, bouen op het bloet des schultoffers.

18

De olye nu, die daer ouer is in syner hant, sal hy op des gereynichden hooft gieten, ende hem versoenen voor den Heere.

19

Ende sal het sondoffer maken, ende den ghe-

[fol. 38v]

reynichden versoenen, zijnder onreynicheits haluen.

C.20

Ende sal daer na het brandoffer slachten, ende salt op den Altaer offeren, met den spijsoffer, ende hem versoenen, so is hy reyn,

21

^f Is hy dannoch arm, ende met syner hant so vele niet en verweruet, so neme hy een lam ten schultoffer te beweghen, hem te versoenen, ende een thiende semelmeels, met olye ghemengt ten spijsoffer, ende een log olye.

f Leuitici 5.a.7 ende 12.a.8

22

Ende twee tortelduyuen of twee ionge duyuen, die hy met syner hant verweruen kan: dat de een zy een sondoffer, de ander een brandtoffer.

23

Ende brengtse aen den achtsten daghe zijnder reyninghe totten Priester, voor de deure der hutten des Bescheyts, voor den Heere.

24

So sal de Priester dat lam ten schuldtoffer nemen, ende dat log olye, ende salt alle beweghen voor den Heere.

25

Ende dat lam, het schultoffer slachten: ende van den bloede nemen van denseluen schultoffer, ende den ghereychden strijcken op het lapken zijns rechteren oors, ende op den duym zijnder rechter hant, ende op den grooten teen zijns rechten voets.

26

Ende de olye in syne (des Priesters) slincker hant gieten.

27

Ende met synen rechter vingen, de olye die in syner slincker hant is, seuenmael sprenghen voor den Heere.

28

De ouerblijuende in syner hant, sal hy den gereynichden op het lapken zijns rechteren oors, ende op den duym zijnder rechter handt, ende op den teen zijns rechten voets strijcken, bouen op het bloet des schultoffers.

29

De olye die daer ouer is in syner hant, sal hy den ghereynichden op het hooft ghieten, hem te versoenen voor den Heere.

D.30

Ende daer na wt der eender tortelduyue, of ionghe duyue, als syne hant heeft moghen verweruen, een sondoffer.

31

Wt de andere, een brantoffer maken, met tsamen den spijsoffer: ende de Priester sal den ghereynichden also versoenen voor den Heere.

32

Dat zy de Wet van den malaetschen, die met syner hant niet verweruen en kan, wat tot syner reyninghe behoort.

33

Ende de Heere sprack met Mose, ende seyde:

34

Als ghy int lant Canaan koemt, dat ick v ter besittinghe gheue, ⁺ ende sal ergens in eenen huyse uwer besittinge, een malaetsch teecken geuen,

+ Malaetscheyt der huysen.

35

So sal die komen diens dat huys is, ende het den Priester aensegghen, ende spreken: Ick sie het daer voor aen, als zy een malaetsch teecken in mynen huyse.

36

So sal de Priester heeten, dat sy dat huys wtruymen, eer de Priester daer in gaet dat teecken te besien, op dat niet onreyn worde alles wat int huys is: daer na sal de Priester daer in gaen, dat huys te besien.

37

Als hy nu dat teecken besiet, ende vint, dat aen de want des huys, ghele of rootachtige kuylkens zijn, ende haer aensien neerder dan anders dewant is,

38

So sal hy ten huyse ter deure wtgaen, ende dat huys seuen daghen toesluyten.

39

Ende als hy aen den seuenden dage weder koemt, ende siet dat dat teecken voorder gegeten heeft, aen de wandt des huys,

E.40

So sal hy de steenen heeten wtbreken, daer dat teecken in is, ende buyten voor de stadt, aen een onreyn plaetse werpen.

41

Ende dat huys salmen inwendich rontom schrapen, ende sullen den afgheschrapden leem buyten voor de stadt, aen een onreyne plaetse schudden.

42

Ende andere steenen nemen, ende aen gener stede setten, ende anderen leem nemen, ende dat huys ^g bewerpen.

g Of, besetten

43

Als dan dat teecken wederkoemt, ende wtbreeckt aen den huyse, daer na wanneermen de steenen ende den leem wtghebroken, ende dat huys ^h† anders beworpen heeft,

h† Anders, ouerschrapt ende beworpen etcet.

44

So sal de Priester daer in gaen: ende als hy siet, dat dat teecken voorder ghegheten heeft aen den huyse, so isset ghewis een etende malaetscheydt aen den huyse, ende is onreyn.

45

Daerom sal men dat huys afbreken, steenen ende hout, ende alle leem aen den huyse, ende salt buyten voeren voor de stadt, aen een onreyne plaetse.

46

Ende wie in dat huys gaet, so langhe als het toeghesloten is, die is onreyn, tot aen den auont.

47

Ende wie daer in leyt, of daer in eet, die sal syne kleederen wasschen.

48

So daerentegen de Priester, als hy daer in gaet, siet, dat dit teecken niet voorder aen den huyse gegeten heeft, na dien dat huys ⁱ beworpen is, so sal hy het reyn spreken, want dat teecken is heel geworden.

i Of, beset

49

Ende sal ten sondoffer voor dat huys nemen, twee vogelen, Cederen hout, ende rozijnuerwighe wolle, ende Ysop.

F.50

Ende den eenen voghel slachten, in eenen aerden vate, aen een vlietende water.

51

Ende sal nemen dat Cederen hout, de rozijnuerwighe wolle, de Ysope, ende den leuendighen voghel, ende in des gheslachteden voghels bloet steken, aent vlietende water, ende dat huys seuenmael besprenghen.

52

Ende sal also dat huys ontsondigen, met den bloede des vogels, met den vlietenden water, met den leuendigen vogel, met den Cederen houte, met Ysop, ende met rozijnuerwigher wolle.

53

Ende sal den leuendigen voghel laten buyten voor de stadt, int vrije velt vlieghen, ende dat huys versoenen, so isset reyn.

54

Dat is de Wet ouer allerley teecken der malaetscheyt ende schurftheyt.

55

Ouer de malaetscheydt der kleederen ende der huysen.

56

Ouer de buylen, ^k vlechten ende etterwit.

k Of, kruypende schorfheyt of grulicheyt

57

Op datmen wete, wanneer wat onreyns of reyns is: Dat is de Wet van der malaetscheydt.