Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Wat men offeren sal voor ghehoorden ende versweghen vloeck, 2. gauloos aenroeren dies, dat onreyn is, 4. lichueerdich sweeren, 16. vergrijpen aent ghewijhede, 17. of aen eenighen gheboden des Heeren door onwetentheyt.

A.1

VVanneer ^a een ziele sondighen sal, ⁺ dat hy eenen vloeck hoort, ende hy dies ghetuyge is, of ghesien of beuonden heeft, ende niet voort van hem gheseydt, die is eender misdaet schuldich.

a Leuitici 24.b.11

+ Schuldtoffer voor de onwetentheydt, dat heetmen vreemde sonde.

2

^b Of wanneer een ziele wat onreyns ^c aenroert, het zy een aes van eenen onreynen ghedierte, of vee, of ghewormte, ende wiste het niet, die is onreyn, ende heeft haer verschuldicht.

b Aggei 2.b.14

c 2.Corint. 6.b.17

3

Of wanneer hy eenen onreynen mensche aenroert, in welckerley onreynicheyt, de mensche onreyn worden kan, ende wistes niet, ende wordt het ghewaer, die heeft hem verschuldicht.

4

Of wanneer een ziele sweert, dat hem wt den monde ontgaet, quaet of wel te doen, als dan eenen mensche een sweeren ontgaen mach, eer hy het bedenct, ende wort het ghewaer, die heeft hem aen dier een verschuldicht.

5

Wanneert nu gheschiet, dat hy hem aen dier een verschuldicht, ende bekent dat hy daer aen ghesondicht heeft,

6

So sal hy voor syne schult deser syner sonde, die hy ghedaen heeft, den Heere brenghen van der kudde, een schaep of geyten moeder ten sondoffer, so sal hem de Priester syne sonde versoenen.

7

^d Vermach hy dannoch gheen schaep, so sal hy brenghen den Heere voor syne schult, die hy ghedaen heeft, twee tortelduyuen, of twee ionghe duyuen, de eene ten sondoffer, de andere ten brantoffer.

d Leuitici 12.a.8

8

Ende salse brenghen den Priester, die sal de eerste ten sondoffer maken, ende haer den kop ^e afnijpen achter den necke, ende doch niet afbreken.

e Of, afknijpen.

9

Ende sal sprenghen met den bloede des sondoffers, aen de wandt des Altaers, ende laet het bloedt dat daer ouer is, wtbloeden, aen des Altaers bodem: dat is het sondoffer.

B.10

De andere sal hy ten brantoffer maken na synen rechte: ende also sal de Priester hem zijn sonde versoenen, die hy ghedaen heeft, so wordt het hem vergheuen.

11

Vermach hy oock niet twee tortelduyuen, of twee ionghe duyuen, so brenghe hy voor syne sonde zijn offer, een thienden deel Ephi semelmeels ten sondoffer: hy sal dannoch gheen olye daer op doen, noch wieroock daer op legghen, want het is een sondoffer.

[fol. 35r]

12

Ende salt totten Priester brengen, so sal dan de Priester een hantuol daeruan nemen ter ghedachtenisse, ende aensteken op den Altaer, ten vyere den Heere: dat is een sondoffer.

13

Ende de Priester sal hem also syne sonde, die hy ghedaen heeft, versoenen, so wordt het hem vergheuen, ende sal des Priesters zijn, als een spijsoffer.

14

Ende de Heere sprack met Mose, ende seyde:

15

Wanneer haer een ziele vergrijpt, dat sy het versiet, ⁺ ende haer besondicht aen het ghene dat den Heere gewijhet is, so sal sy haer schultoffer den Heere brenghen, eenen Ram sonder vlecke van der kudde, die twee sikel siluers weerdt zy, ^f na den sikel des Heylichdoms ten schuldtoffer.

+ Schultoffer.

f Exodi 30.b.13

16

Daertoe wat hy ghesondicht heeft, aen den gewijheden, sal hy wedergheuen, ende het vijfste deel daerouer gheuen: ende salt den Priester gheuen, die sal hem versoenen, met den Ramme des schuldtoffers, so wordet hem vergheuen.

17

Wanneer een ziele sondicht, ende doet erghens tegen een ghebot des Heeren, dat sy niet doen en soude, ende heeft het niet gheweten, die heeft haer beschuldicht, ende is eener misdaet schuldich,

18

Ende sal brenghen eenen Ram, van der kudde sonder vlecke, die eens schuldtoffers weerdt is, totten Priester, die sal hem zijn onwetentheydt versoenen, die hy ghedaen heeft, ende wiste het niet, so werdt het hem vergheuen. Dat is het schuldoffer, dat hy den Heere veruallen is.