Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxviij. Capittel.

1. Uanden Brantoffer Altaer, 8. Hantuate, 9. Uoorhoue ende haren toebehoorten, 24. Summa des gouts, siluers ende copers, dat aen den gantschen wercke des Tabernakels verarbeydt is.

A.1

ENde maeckte den ^a brantoffer Altaer van vueren houte, ⁺ vijf ellen lanck ende breedt, gelijck viercantich, ende drye ellen hooch.

a Exod. 27.a.1. 2.Para. 1.a.5.

+ Brantoffer altaer.

2

Ende maeckte vier hoornen die wt hem gingen aen syne vier hoecken, ende ouertooch hem met ^b coper.

b Ofte, eerin

3

Ende maeckte allerley tuych tot den altaer, asschpotten ^c† schueffelen, beckenen, krauwelen, koolpannen, alles van coper.

c† anders, bessems

4

Ende maeckte aen den Altaer ^d traliewerck als een nette van metael rontom, van beneden op tot aen de helft des Altaers.

d Ofte, schrenckwerck

5

Ende goot vier rincxkens aen de vier hoecken der metalen traliewerck ten hantboomen. ⁺

+ Handtuat.

6

Deselue maeckte hy van vueren houte, ende ouertoochse met coper,

7

Ende stackse in de ringhen aen de zijden des Altaers, datmen hem daermede droech, ^e ende maeckte hem inwendich hol.

e Exod. 27.a.8.

8

Ende maeckte het ^f† hantuat van coper, ende synen voet oock van coper ^g† teghen de ^h vrouwen, die voor de deure der hutten des ghetuygenisse dienden.

f† and. waschuat

g† anders, met den spiegelen der versamelden, die voor der deure der hutten des bescheyts hen versamelt hadden.

h Dese vrouwen waren de aendachtighe weduwen ende vrouwen, die met vasten ende bidden voor der hutten, Gode dienden. Als 1.Sam. 2. wtwijset, ende Paulus 1.Tim. 5.a.5. Als oock Lucas de heylige prophetinne Hanna roemet [ofte prijset] Luc. 2.d.37.

9

Ende hy maecte den ^i† voorhof teghent Zuyden, met eenen omhanghe hondert ellen lanck, van witter ghetwernder zijden,

i† anders, hof,

B.10

Met haren twintich pilaerstijlen, ende twintich voeten van coper, hare knoopen ende reepen van siluer.

11

Desseluen ghelijcken teghent Noorden, hondert ellen, met twintich pilaerstijlen, ende twintich voeten van metael, hare knoopen ende reepen van siluer.

12

Nu teghent Westen vijftich ellen, met thien pilaerstijlen ende thien voeten, ende hare knoopen ende reepen van siluer.

13

Teghent Oosten vijftich ellen.

14

Vijftien ellen op elcker zijden der poorte aen den voorhof.

15

Telcken met dry pilaerstijlen ende dry voeten.

16

Dat alle omhangen des voorhofs waren van witter ghetwernder zijden.

17

Ende de voeten der pilaerstijlen van metael, ende hare knoopen ende reepen van siluer: also dat hare koppen ouertoghen waren met siluer: daerentegen hare reepen waren silueren, aen allen pilaerstijlen des voorhofs.

18

Ende het laken inder poorte des voorhofs, maecte hy ghesticket van gheler zijden, scharlaken, rosijnroot, ende witter ghetwernder zijden, twintich ellen lanck, ende vijf ellen hooch, na der mate der omhanghen des voorhofs.

19

Daertoe vier pilaerstijlen, ende vier voeten van metael, ende hare knoopen van siluer, ende hare knoopen ouertoghen, ende hare reepen silueren.

C.20

Ende alle naghelen der wooninghe ende des voorhofs rontom, waren van ^k coper.

k Ofte, eerin

21

Dat is nu de summa tot der wooninghe des ghetuyghenisse, ⁺ die vertellet is, als Mose gheseydt heeft, ten Godsdienste der Leuiten, onder der hant Ithamar, Aarons des priesters soons,

+ Summa des gouts, siluers, ende copers, dat in desen wercke verarbeyt is.

22

Die Bezaleel de sone Vri, des soons Hur, van den stamme Iuda, maeckte alle dinck als de Heere Mose gheboden hadde.

23

Ende met hem Ahaliab de sone Ahisamach, vanden stamme Dan, een meester te snijden, te wercken, ende te sticken met gheler zijden, scharlaken, rosijnroot, ende witter zijden.

24

Alle het gout dat daer verarbeyt is in desen gantschen wercke des Heylichdoms, dat totter beweginghe ghegheuen werdt, is neghen ende twintich centener, seuen hondert ende dertich sikel, na den sikel des Heylichdoms.

25

Des siluers dat van der menichte quam, was hondert centener, duysent, seuen hondert, vijf ende tseuentich sikel, na den sikel des Heylichdoms.

26

^l So menich hooft, so menich half sikel, na den sikel des Heylichdoms, van allen die getelt werden van twintich iaren aen, ende daer bouen: ses hondertmael duysent, dry duysent, vijf hondert ende vijftich.

l Exod. 30.b.12.

27

Wt de hondert ^m centeneren siluers, gootmen de voeten des Heylichdoms, ende de voeten des voorhancks, hondert voeten, wt hondert centeneren, telcken eenen centener, ten voete.

m Of, Talenten

28

Ende wt de duysent, seuen hondert ende vijf ende tseuentich sikelen, werden ghemaeckt de pilaerstijlen knoopen, ende hare koppen ouertoghen, ende hare reepen.

29

De beweginghe des metaels was tseuentich centeners, twee duysent ende vier hondert sikelen.

D.30

Daer wt werden gemaect de voeten inde deure der hutten des Bescheyts, ende den metalen Altaer, ende het metalen traliewerck daer aen, ende alle het tuych des Altaers.

31

Daertoe de voeten des voorhofs rontom: ende de voeten der poorte aen den voorhof, alle nagelen der wooninge, ende alle naghelen des voorhofs rontom henen. ⁺

+ Aarons kleederen.