Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxvij. Capittel.

1. Uan der Arcke des ghetuyghenisse met haren hantboomen, 6. Ghenadenstoele, 10. Dissche der schoubrooden, 17. luchter, 25. reuckaltaer, 29. heyliger olye, ende reuckwerck.

A.1

ENde ^a Bezaleel maecte de arcke van vueren houte, ⁺ twee ellen ende een halue lanc, anderhalue elle breedt ende hooch.

a Exod. 25.b.10.

+ De arcke wort ghemaeckt.

2

Ende ouertoochse met louteren goude, binnen ende buyten, ende maecte eenen gulden crans rontom.

3

Ende goot haer vier gulden ringhen aen hare vier hoecken, op elcker zijden twee.

4

Ende maeckte ^* hantboomen van vueren houte, ende ouertoochse met goude.

* ofte, stanghen

5

Ende stackse in de ringhen aen der arcken zijden, datmense draghen konde.

6

Ende maecte den ^b‡ Ghenadenstoel van louteren goude, ⁺ twee ellen ende een halue lanck, ende anderhalue elle breedt.

b‡ and. genadendecksel

+ Genadenstoel.

7

Ende maecte twee Cherubim van dichten goude aen de twee eynden des Ghenadenstoels:

8

Eenen Cherub aen desen eynde, den anderen aen ghenen eynde.

9

Ende de Cherubim breydden hare vleugelen wt van bouen af, ende bedeckten daermede den Ghenadenstoel: ende hare aenschijnen stonden teghen malkanderen, ende saghen op den Ghenadenstoel.

B.10

^c Ende hy maeckte den disch van vueren houte, ⁺ twee ellen lanck, een elle breedt, ende ander halue elle hooch.

c Exod. 25.c.23

+ Tafel.

11

Ende ouertoochse met louteren goude, ende maeckte eenen gulden krans daer omme.

12

Ende maeckte hem eenen lijst daer om, eener handtbreedt hooch, ende maeckte eenen gulden krans rontom de lijste.

13

Ende goot daertoe vier gulden ringen, ende maectese aen de vier hoecken aen syne vier voeten,

14

Hardt aen der lijsten, dat de hantboomen daerin waren, daermen den disch mede droech.

15

Ende maeckte de handtboomen van vueren houte, ende ouertoochse met goude, datmen den disch daermede droech.

[fol. 32v]

16

Ende maeckte oock van louteren goude het tuych op den disch: schotelen, ^d† bekeren, kannen ende schalen, daermen mede wt ende in schenckede.

d† and. lepelen, halue rieten ende vaten daermen mede reynicht, in welcke ghegoten wort.

17

^e Ende maecte den luchter van louteren dichten goude: daer aen was den schacht met rieten, schalen, ⁺ knoopen ende bloemen.

e Exod. 25.d.31.

+ Luchter.

18

Ses rieten ginghen tot synen zijden wt, tot eener yeghelicken zijden dry rieten.

19

Dry schalen waren aen eenen yeghelicken riete met knoopen ende bloemen.

C.20

Aen den luchter waren vier schalen met knoppen ende bloemen.

21

Telcken onder twee ^f rieten eenen knoop: dat also ses rieten wt hem ginghen.

f Ofte, schachten

22

Ende hare knoopen ende rieten daer aen: ende was altemael een dicht louter gout.

23

Ende maecte de seuen lampen met haren licht scheren, ⁺ ende bluschhoornen van louteren goude.

+ Seuen lampen

24

Wt eenen ^g centener fijns gouts maecte hyse, ende alle haer ^h ghetuych.

g ofte, Talent

h ofte, gereetschap anders, vaten

25

ⁱ Hy maeckte oock den Reuckaltaer van vueren houte een elle lanck ende breedt, ⁺ ghelijck viercantich, ende twee ellen hooch met synen hoornen:

i Exod. 30.a.1.

+ Reuckaltaer.

26

Ende ouertooch hem met louteren goude, zijn dack ende syne wanden rontom, ende syne hoornen, ende maeckte hem eenen krants rontom, van louteren goude:

27

Ende twee gulden ringen onder den krants tot beyden zijden, datmen de hantboomen daer in steke, ende hem daermede droeghe.

28

Ende de handtboomen maeckte hy van vueren houte, ende ouertoochse met goude.

29

Ende maeckte de heylighe salue ende reuckwerck van reyner specerije, na der Apotekers konste.