Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxvi. Capittel.

1. Hier gaet het werk aen, 6. den volcke wert verboden, meer te brenghen, ten bouwe des tabernakels, 8. tapijten, 20. berderen, 31. rijchelen, 35. ende voorhanck worden ghemaeckt.

A.1

DOe arbeydden Bezaleel ende Ahaliab, ⁺ ende alle wijse mannen, dien de Heere wijsheyt ende verstant ghegheuen hadde, te weten: Hoe sy allerley werck maken souden, ten dienste des helichdoms, na allen dat de Heere gheboden hadde.

+ Hier gaet nu het werck aen.

2

Ende Mose riep den Bezaleel ende Ahaliab, ende allen wijsen mannen, dien de Heere wijs-

[fol. 32r]

heyt ghegheuen hadde in hare herten, naemlicken, alle die hen willich daertoe aenboden, ende toe traden te arbeyden aen den wercke.

3

Ende sy namen tot hen van Mose alle ^a† heuinge die de kinderen Israels brochten, totten wercke des dienstes des Heylichdoms, op dat het gemaket worde: want sy brochten alle morghen hare ghewillighe gauen tot hem.

a† and. heffinghe

4

Doe quamen alle wijsen, die aen den wercke des Heylichdoms arbeydden, een yeghelick na synen wercke, dat sy maeckten,

5

Ende spraken tot Mose: Het volck brengt te vele, meer dan ten wercke deses dienstes noodt is, dat de Heere te maken gheboden heeft.

6

Doe gheboodt Mose, dat men liete roepen, door het legher, Niemant brenghe meer ^b† ter heuinge des Heylichdoms: ^c† doe hielt het volck ^c† op te brenghen.

b† and heffinghe

c† and. wordt den volcke geweeret,

c† and. ende also verbootmen het volc te offeren

7

Want des dincks was ghenoech tot allerley werck, dat te maken was, ende noch daerouer.

8

^d Also maeckten alle wijse mannen onder den arbeyders, aen den wercke, de wooninge thien tapijten van witter getweernder zijden, ^{+ e†} geler zijden, scharlaken, rosijnroot, Cherubim kunstelick.

d Exod. 26.a.1.

+ Thien Tapijten

e† ande. blauwer

9

De lengde eenes tapijtes was achtentwintich ellen, ende de breyde vier ellen: ende waren alle van eener mate.

B.10

Ende hy knoopte telcken vijf tapijten tsamen een aen het ander.

11

Ende maecte gele ^f† knoopkens aen eenes yeghelickes tapetijs randt, daer sy te samen gheuoecht werden:

f† and. schuffelkens, stricklitskens, oft strickoorkens

12

Telcken vijftich knoopkens aen eenen tapijte, daer een het ander mede vatede.

13

Ende maeckte vijftich gulden rincxkens, ende voechde de tapijten met den rincxkens een aen het ander te samen, dat het eene wooninghe werdt.

14

Ende hy maeckte elue tapijten van gheyten hayr, ⁺ tot der hutten ouer de wooninghe.

+ Elf Tapijten.

15

Dertich ellen lanck, ende vier ellen breet, alle van eener mate.

16

Ende voechde harer vijf te samen op een deel, ende ses te samen op het ander deel.

17

Ende maeckte telcken vijftich knoopkens aen een yegelick tapijte aen den randt, daer sy mede te samen ghehecht werden.

18

Ende maeckte telcken vijftich metalen rincxkens, daer de hutte mede te samen in een gheuoecht werdt.

19

Ende maeckte een decksel ouer de hutte, van roodtachtighen Ramsuellen, ende ouer die noch een decksel van Dasenuellen.

C.20

^g Ende maecte berderen ter wooninge van vueren houte, ⁺ die staen souden.

g Exod. 26.b.15.

+ Berders.

21

Een yeghelick thien ellen lanck, ende ander halue elle breedt.

22

Ende aen eenen yeghelicken twee tappen, daer een aen het ander mede gheset werdt: also maeckte hy alle berderen ter wooninghe.

23

Dat derseluen berderen twintich tegent Zuyden stonden.

24

Ende maeckte veertich silueren voeten daeronder, onder een yegelic berdt twee voeten, aen synen twee tappen.

25

Also ter anderen zijden der wooninge tegent Noorden, maeckte hy oock twintich berderen,

26

Met veertich silueren voeten, onder een yeghelick berdt twee voeten.

27

Nu achter aen der wooninge tegent Westen, maeckte hy ses berderen.

28

Ende twee ander op de twee hoecken der wooninghe achter aen.

29

Dat een yegelick der beyden, hen met synen hoecberde van beneden op ^h paerde, ende bouen aen den hoofde tsamen quame met eenen klammer.

h of, twee tsamen vereenichden

C.30

Dat der berderen achte worden, ende sestien silueren voeten onder eenen yeghelicken twee voeten.

31

Ende hy maeckte rijchels van vueren houte, ⁺ vijue totten berderen op der eener zijden der wooninghe.

+ Rijchelen.

32

Ende vijue op der anderen zijden, ende vijue achter aen teghent Westen.

33

Ende maecte de ^i† rijchelen dat sy midden in den berderen door henen gestooten worden, van eenen eynde ten anderen.

i† and. den middelsten rijchel, dat hy inwendich door de berderen gaen, ende rijchelen soude van etc.

34

Ende ouertooch de berderen met goude, daerentegen hare ringe maecte hy van goude tot den rijchelen, ende ouertooch de rijchelen met goude.

35

Ende maeckte den voorhanck met den Cherubim daer aen konstlic van gheler zijden, ⁺ scharlaken, rosijnroodt, ende witter ghetweernder zijden.

+ Voorhanck.

36

Ende maecte tot derseluen vier pilaerstijlen van vueren houte, ende ouertoochse met goude, ende hare koppen van goude, ende goot daertoe vier silueren voeten.

37

Ende maecte een laken in de deure der hutten, van gheler zijden, scharlaken, rosijnroodt, ende witter ghetweernder zijden ghesticket:

38

Ende vijf pilaren daertoe met haren knoppen: ende ouertooch hare knoppen ende reepen met goude, ende vijf metalen voeten daer aen.